1 Beetero 3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Deyyeho arammetiin aficho akutina

¹ Saggaas on u, deyyeho taba makhaaballetiin aficho akutina. Iꞌda yeela ꞌdee chiꞌ gaasichokoo Yeedi Waakh iraahin laka, yeedi aficho ka menye, jeenteti jiroti oboorrihicho jiro,

² miꞌdabe ichoow jiroti inkaanyite icho jiraan ka a lasoojiito.

³ Eykodi sartiinna atin iseykoddaan uus wahanyeyyohi kharaate iꞌdi maanta tinti lajirfo ichoow ꞌdahabi lagessati ichoow gaaddi gato miige kalday eheynan.

⁴ Eykodi atin iseykoddaan ki goytiin kasoobaho jirtuu tuumman ituumin a eheetti. Jiroti samacchaarenye sir laaye Waakh ortiis ka weyti khumman jira.

⁵ A mehe saggane deyyehoti goorat archiiye munyeenye Waakh khajjeel kakhabte isieykodde. Arammeticho aficho ma kutin.

⁶ Saara iꞌdaase eheete, Aburaaham yeediis raahte, “Kamuraaya,” tidah. Atin albehicheeda tateehiin chaꞌatin haag yeessaane roorro ikhabin.

⁷ Saggaas on u, atinhi arammee taba deyyehotiin jiti samacchaare ka leefiddiya saggi icho wahalhi atin kaaꞌddaran iyahiin kasa. Toro la inkaanyita iꞌdi tahe atin tuumman jiroti Waakh enenyet iꞌdaanu siicho a isleeꞌhessaan. Chaꞌatin iꞌda yeessaan la, walah weysihiin jeycho mele.

Sinati jeenteti haag layeelo liiꞌhelo

⁸ Ayti ꞌdaꞌddaboot, taba atin tuumman maloo kalday khaba, uur isinugleesda, iꞌdi ꞌdooꞌdi uuroo kaldaye u isꞌdoona, isnuglaacha.

⁹ Eti suujoonkoo kiyeelo ommos kiabaaro aal akagutanne, iꞌdaasenyi iweyso Waakh a imaalo. A mehe wihi atin liiwahe a wahaase, ꞌdee buuh ꞌhessaan.

¹⁰ Iꞌdi Chiirnaanneti Waakh tadeeh u, “Eti jiro ꞌdoono, ibeenneti haaggan la argin ꞌdoono, harrabiis suujoon a kahosso, afiis la been a kahosso.

¹¹ Suujoon a kasoonokhti haag a yeelo, nebey a yowti, nebey a ꞌdonꞌdoono.

¹² Iꞌdi tahe indohi Kamur ꞌdooꞌdi fiffissan a katoollaane, dogtiis la weysihicho a ifurantahe. Iꞌdaasenyi Waakh ꞌdooꞌdi suujoon yeelo a ꞌdiiꞌddanyahe.”

¹³ Ayyo wohoo atin yeela chaꞌatin haag yeelin imoontaan?

¹⁴ Iꞌdaasenyi chirri jeenteti wihi fissane atin yeessaan on sina atin loomhicho, a atin liimaale. “Wihi icho karooraan akaroorina, anahina.”

¹⁵ Iꞌdaasenyi uurassiin ka, Kiriisto tuum isisoobahcha iꞌdi Kamur u. Chirri khajjeeli atin Kiriisto kakhabtaan atin laworsate la, tannabda kol dakkhan ayti atin laabtaan khaba. Iꞌdaasenyi waha samacchaar ka ichoow inkaanyit ka yeela.

¹⁶ Toro rubeyti suujoon atin ikacheekan khaba, ꞌdee jirotiinti haaggane jeenteti atin Kiriisto ikakhuuftaan jirtaan ka atin hayhayo hankichokaas ka lakhaanyo a khaatatti.

¹⁷ Wihi deefo, chiꞌiche ꞌdooninti Waakh tahe, a atihi jeenteti at haag iyeessuu sina kaawaarto, atihi jeenteti at suujoon iyeessuu sina kaawaarto ka.

¹⁸ A mehe Kiriisto maantoo kalday on uskeeleen iyumuyye, maantoo addan la uskeeleen ma iyamuut. Eti fissan jeenteti ki khollokkhane iyumuyye ꞌdee inno Waakh inno ikeena. Usuhi weeli enenyetenye layigisye, iꞌdaasenyi Rubeyti Munyee ka omoot lakasookahche.

¹⁹ Ulla a irte rubeyohi ꞌdooꞌdi goorat tuume hidan wori Waakh icheeke.

²⁰ Waha a rubeyohi ꞌdooꞌdi goorat ayti Waakh raahiwwaaye maanti goorat Noowa koobanhi buure dise. Waakh la ꞌdooꞌdaas a isamacchaare. Iꞌdaasenyi et siyyeet kooban goya kijirte kaldaye bicche ikhaatin.

²¹ Biccheha la mehe itoollaan ya, baattissiyoti toolla atin laka atin ribto. Baattissiyota la wohoo sartiin chaafo kabahcho menye, a rubeyti wahanyeyyohi Waakh ka suujoon inno ikacheekan. Baattissiyota la Yeesso Kiriistohi omoot kasookahe ka a atin ribta.

²² Kiriisto la goobi Waakhe inokhte, Waakh dahantiisti miigeet orronte, herti Waakh tuumman ichoow wihi tuummane goobi Waakh ka anto ichoow miig leh ba afiis ma kutaan.