YOHANES 1 - JANJAI BLAU Lem Bahaso Jang Bebilai

Firman de sudo jijai manusio

¹ Pado mulone ade Firman; Firman'o besamo-samo ngen Allah ngen Firman'o adeba Allah.

² Si padomulone besamo-samo Allah.

³ Kute sesuatau jenijai ngen Si coa gen Si coa ade suatu kulo de sudo jijai kunei kute de sudo jenijai.

⁴ Lem Si ade idup ngen idup'o adeba te'ang manusio.

⁵ Te'ang'o becahayo lem kelem ngen kelem'o coa nguasone.

⁶ Tekoba suang tun de nutus Allah, genne Yohanes.

⁷ Si teko sebagoi saksai utuk jijai saksai tetang te'ang'o, supayo liwet si kute tun jijai pecayo.

⁸ Si iso te'ang'o, tapi si harus jijai saksai tetang te'ang'o.

⁹ Te'ang de sesungguak'ne, de tem'ang tiep tun, dong teko lem dunio.

¹⁰ Firman bi ade neak lem dunio ngen dunio jenijei liwet Si, tapi dunio coa kemnal Si.

¹¹ Si teko ngen temuan-Ne, tapi tun-tun temuan-Ne o coa temimo Si.

¹² Tapi kute tun de temimo Si neleine kuaso supayo jijai anok-anok Allah, adeba tobo'o de pecayo lem gen-Ne.

¹³ Tun-tun de leherne iso kunei daleak atau kunei kelok jasmani iso kulo ngen kelok suang semanei, seluyen kunei Allah.

¹⁴ Firman'o bi jijai manusio, ngen tinggea neak antaro ite, ngen ite bi kemliak kemulioan-Ne adeba kemulioan de nelei ngen Si sebagoi Anok tunggea Bapa, penuak anugrah ngen de benea.

¹⁵ Yohanes saksai tetang Si ngen menggang, nadeak-Ne: “Dioba Si, de uku maksud ketiko uku madeak: sesudo'o kunei uku bakea teko Si de sudo demute uku, sebab Si biade ayok Uku.”

¹⁶ Kerno kunei kepenuhan-Ne ite kute bi tenimo anugrah demi anugrah.

¹⁷ Sebab Hukum Taurat nelei liwet Musa. Tapi anugrah ngen benea teko liwet Yesus Kristus.

¹⁸ Coa suang tun de perneak kemliak Allah; tapi anok Tunggea Allah, de ade neak das balung Bapa, Siba de madeak-Ne.

Saksai Yohanes

¹⁹ Dioba saksai Yohanes ketiko tun Yahudi kunei Yerusalem mutus kekedau imem ngen tun-tun Lewi ngen si utuk temanye si, “Api Ko?”

²⁰ Yohanes ngakau ngen coa ngike, nadeakne, “Uku iso Rajo Penyelamat.”

²¹ Lajau tobo'o betanye ngen si, “Amen awei'o api? Jano ko Elia?” Yohanes jemawab, “Iso!” Tobo'o betanye igai, “Jano Ko bakea nebai de bakea teko?” Si kulo jemawa, “Iso!”

²² Kerno'o nadeak tobo'o ngen Si, “Api ko? Sebab keme harus melei jawaban ngen tobo'o de mutus keme. Jano nadeaknu tetang dirainu suang?”

²³ Yohanes jemawab, “Uku ba sa'ei tun de menggang neak benei libea: Neluusba dalen Tuhan! Awei de nadeak Nebai Yesaya.”

²⁴ Neak antaro tun-tun de nutus'o ade kekedau tun Farisi.

²⁵ Tobo'o betanye ngen Yohanes, nadeakne, “Amen awei yo, getai Ko membaptis, amen Ko iso Rajo Penyelamat, iso Elia, ngen iso nebai de bakea teko?”

²⁶ Yohanes jemawab tobo'o, “Uku membaptis ngen bioa. Tapi neak tengeak-tengeak udi je Si de coa udi namen.

²⁷ Si de teko sesudo uku. Mukok tilai sepatu-Ne bae uku coa patas.”

²⁸ Hal'o tejijai neak Betania de neak dipoa Bioa Yordan, penan Yohanes membaptis.

Anok Bebirai Allah

²⁹ Bilai menne Yohanes kemliak Yesus teko. Yohanes madeak, “Keliak ba Anok Bebirai Allah de mapus duso dunio.

³⁰ Siba de uku maksud ketiko uku madeak: Sesudo'o bakea teko suang tun de sudo demute uku, sebab Si bi ade ayok Uku.

³¹ Uku suang bel'o coa namen Si, tapi utuk'o ba uku teko membaptis ngen bioa supayo Si nyato ngen Israel.”

³² Sesudo'o Yohanes besaksai, nadeakne, “Uku bi kemliak Roh Allah tu'un, kunei lenget awei burung daro, ngen tinggea neak das-Ne.

³³ Waktau'o kulo uku coa kemnal Si. Tapi Si, de nutus uku utuk membaptis ngen bioa, sudo berfirman ngen uku, ‘Amen ko kemliak Roh'o tu'un moi das suang tun ngen tinggea neak das-Ne, Siba de bakea membaptis ngen Roh Sucai.’

³⁴ Uku bi kemliak-Ne ngen melei saksai: Si yo ba Anok Allah.”

Penotoa-penotoa Yesus de pertamo

³⁵ Bilai menne Yohanes je neak di igai ngen duai tun penotoane.

³⁶ Ketiko si kemliak Yesus liwet, si madeak, “Keliakba, do'o Anok Domba Allah!”

³⁷ Keduai penotoa'o temi'uk jano de nadeak ne'o, lajau tobo'o temotoa Yesus.

³⁸ Yesus kemliak moi belakang. Si kemliak, bahwo tobo'o temotoa Si lajau madeak ngen tobo'o. Yesus betanye “Jano de udi mesoa?” Jawab tobo'o, “Rabi (Tai ne: Gu'au), neak ipe Ko tinggea?”

³⁹ Si madeak ngen tobo'o, “Maroba, ngen udi bakea kemliakne.” Tobo'o pulo teko ngen kemliak neak ipe Si tinggea. Bilai'o tobo'o tinggea besamo-samo ngen Si; waktau'o kiro-kiro jam pat.

⁴⁰ Saleak suang kunei keduaine de temi'uk kecek Yohanes lajau temotoa Yesus adeba Andreas, pasuak Simon Petrus.

⁴¹ Andreas mulo-mulo magea Simon, pasuakne. Andreas madeak Simon, “Keme sudo temau Rajo Penyelamat.” (Taine: Kristus.)

⁴² Andreas mbin Simon ngen Yesus. Yesus kemliak si ngen madeak, “Ko Simon, anok Yona Ko bakea nelei gen Kefas.” (Kefas serai ngen Petrus, taine: tebo butau.)

Yesus menok Filipus ngen Natanael

⁴³ Bilai menne Yesus mutus utuk berakat moi Galilea. Si temau ngen Filipus, ngen madeak ngen si, “Totoaba Uku!”

⁴⁴ Filipus asalne kunei Betsaida, penan tinggea Andreas ngen Petrus.

⁴⁵ Filipus magea Natanael ngen madeak ngen si, “Keme bi temau Si, de nadeak Musa ngen Kiteb Taurat ngen tobo nebai. Siba Yesus, anok Yusuf kunei Nazaret.”

⁴⁶ Nadeak Natanael ngen si, “Maso sesuatau de baik teko kunei Nazaret?” Nadeak Filipus ngen si, “Maro ngen keliak ba suang!”

⁴⁷ Yesus kemliak Natanael teko ngen Si, lajau madeak tetang Si, “Keliak, dioba suang tun Israel sejati; coa ade kepalsuan lemne!”

⁴⁸ Nadeak Natanael ngen Si, “Awei ipe Bapa kemnal uku?” Jawab Yesus ngen si, “Ayok Filipus manggea ko, Uku bi kemliak ko neak beak pun ara.”

⁴⁹ Nadeak Natanael ngen Si, “Rabi, Ko Anok Allah, Ko Rajo Tun Israel!”

⁵⁰ Yesus madeak, “Jano kerno Uku madeak ngen udi: Uku kemliak ko neak beak pun ara, mako ko pecayo? Ko bakea kemliak hal-hal de lebiak lai kunei'o!”

⁵¹ Lajau nadeak Yesus ngenne, “Uku madeak ngen udi, sesungguakne ko bakea kemliak lenget tukok ngen malaikat-malaikat Allah kenek tu'un ngen Anok Manusio.”