GALATIA 3 - JANJAI BLAU Lem Bahaso Jang Bebilai

Hukum Taurat atau pecayo ngen Kristus

¹ Saudaro-saudaro tun-tun Galatia! Udi kebiak bodong! Api de sudo menghasut udi? Iso Yesus Kristus de senalib o bi uku jemlas ngen sejelas-jelasne ngen udi?

² Cuma dio de lok uku namen kunei udi: Jano udi bi temimo Roh kerno kemerjo hukum agamo atau kerno pecayo ngen Kristus?

³ Jano udi kebodong o? Udi bi muloi idup blau ngen Roh Allah, jano uyo udi lok semleseine ngen kekuatannu suang?

⁴ Jano sio-sio kute de sudo udi meding o? Maso sio-sio!

⁵ Allah melei Roh-Ne ngen udi ngen menea keajaiban-keajaiban neak antaro udi. Jano Allah menea o kerno udi maneu hukum agamo atau kerno udi temi'uk Bito Baik o ngen pecayo ngen Kristus?

⁶ Ngen ca'o o kuloba Abraham pecayo ngen Allah, ngen kerno kepercayoan Abraham o ba si tenimo Allah sebagoi tun de semnang atei Allah.

⁷ Jijai lokba udi sadar bahwo tun de benea-benea royot Abraham adeba tun de pecayo ngen Allah.

⁸ Kiteb Sucai bi kemliak lebiak dute bahwo Allah yakin amen tun-tun iso Yahudi baik igai ngen Allah, amen tobo'o pecayo ngen Allah. Bito Baik o nelei namen lebiak dute ngen Abraham lem janjaine, “Liwet ko, Allah bakea memberkati kute umat manusio neak das bumai.”

⁹ Abraham pecayo, mako si diberkati. Awei o kulo kute tun de pecayo, bakea diberkati besamo-samo Abraham.

¹⁰ Kerno kute tun de idup kunei pekerjaan hukum agamo, kutene idup neak beak kutukan. Sebab ade tetulis, “Terkutukba tun de coa setia kemerjo kute sesuaktau de tertulis lem kiteb hukum agamo.”

¹¹ Coa suang kulo de baik igai ngen Allah kerno kemerjo hukum agamo, kerno, “Tun de benea bakea idup ngen imen.”

¹² Tapi dasar hukum agamo isoba imen, meluyen api de kemerjone, bakea idup kernone.

¹³ Kristus bi mbebas ite kunei kutukan hukum agamo. Si menea o ngen munyau dirai-Ne terkutuk kerno ite. Sebab ade tetulis, “Terkutukba tun de matei genatung neak kieu salib!”

¹⁴ Yesus Kristus bi menea hal o, supayo neak lem Si berkat Abraham sapei ngen bangso-bangso luyen, sehinggo liwet imen ite temimo Roh Allah de jenanjai o.

Hukum Taurat atau janjai Allah

¹⁵ Saudaro-saudaro, baikba uku makei contoh kunei pengalaman bebilai. Amen tun menea suaktau ikatan janjai ngen janjai o bi sah, mako coa suang kulo dapet mbuye janjai o, atau tenambeak ngen sesuaktau kulo.

¹⁶ Janjai-janjai Allah nea Allah utuk Abraham ngen utuk tun royot Abraham. Lem Kiteb Sucai coa tetulis “ngen utuk tun-tun royot Abraham”, de taine dau tun. De tetulis neak di adeba “ngen utuk tun royotnu”, taine do tun bae, adeba Kristus.

¹⁷ Maksudku adeba: janjai Allah bi nea ngen bi sah lebiak dute, coa dapet mbuye ngen hukum agamo, de blau terbit pat otos telau puluak taun sesudo'o, sehinggo janjai o nyep kekutanne.

¹⁸ Sebab, jano de tentau Allah asalne kunei hukum agamo, do'o coa igai asalne kunei janjai; tapi justru das dasar janjaiba Allah bi melei anugerah-Ne ngen Abraham.

¹⁹ Amen awei o, jano maksud hukum agamo? Jawabne adeba bahwo hukum o tenambeak kerno pelanggaran-pelanggaran manusio. Hukum Taurat o berlaku cuma sapei tekone suang royot Abraham, de senbut neak lem janjai Allah ngen Abraham. Hukum Taurat o senapei malaikat-malaikat liwet suang manusio.

²⁰ Nah, harus ade duai pihok, baruba perlu suang perantara. Tapi Allah coa perlu perantara, sebab Si suang bertindok.

Peranan Ukum Agamo

²¹ Jano do'o taine bahwo hukum agamo belawen ngen janjai Allah? Paset bae coa! Sebab amen hukum agamo nelei sebagai suaktau de dapet midup, mako memang kebenaran asalne kunei hukum agamo.

²² Tapi neak lem Kiteb Sucai tetulis bahwo kute umat manusio ade neak beak kuaso duso. Kerno o, pelei de jenanjai das dasar pecayo ngen Yesus Kristus nelei ngen tobo'o de pecayo.

²³ Ayok sapei waktaune utuk pecayo ngen Kristus, ite jenago ketat ngen hukum agamo, ite awei ken'ung sapei imen o dinyatakan.

²⁴ Ngen awei o, hukum agamo jijai sebagai pengawas ite sapei Kristus teko utuk menea ite baik igai ngen Allah kerno ite pecayo ngen Kristus.

²⁵ Uyo, kerno bi waktaune manusio dapet pecayo ngen Kristus, mako ite coa igai diawasi hukum agamo.

²⁶ Sebab udi kute adeba anok-anok Allah liwet imen neak lem Yesus Kristus.

²⁷ Kerno udi kute, dibaptis lem Kristus, jijai udi bi temimo pado dirai udi sifet-sifet Kristus suang.

²⁸ Lem hal yo coa ade tun Yahudi atau tun iso Yahudi, coa ade hamba atau tun merdeka, coa ade semanei atau selawei, kerno udi kute adeba do neak lem Kristus Yesus.

²⁹ Amen udi de Kristus temuan, mako udi adeba royot Abraham. Ngen udi bakea temimo jano de Allah janjai.