2 TESALONIKA 2 - JANJAI BLAU Lem Bahaso Jang Bebilai

Manusio Jahat

¹ Tetang tekone Tuhan te Yesus Kristus, ngen tetang bakea kenopoane ite utuk tinggea besamo Si, dioba de uku minoi nien kunei udi:

² Supayo udi jibeak gacang renyeng ngen liseak kerno adene bito bahwo bi sapei bilaine Tuhan Yesus teko igai. Mukin bito yo asalne kunei suaktau nubuat, atau kunei suaktau ajaran; atau buliak jijai ade de madeak bahwo keme perneak temulis de awei o neak lem saleak do su'et keme.

³ Awei ipe kulo, jibeak munyau tun mike udi. Sebab ayok sapei Bilai o, harusba tejijai hal yo lebiak dute: Dau tun bakea murtad, mengingkari Kristus; ngen Manusio Jahat de takdirne utuk masuk moi nerako, bakea kemten dirai.

⁴ Ngen ombong si bakea melawen ngen melekat dirai neak das kute de senbeak manusio, atau kute ilah de nanggap Allah ngen manusio. Bahkan si bakea temot neak lem Bait Allah ngen melei namen bahwo si adeba Allah.

⁵ Tingetba bahwo uku perneak melei namen kutene o pado waktau uku masiak besamo udi.

⁶ Ngen udi namen jano de uyo masiak temaen tejijaine kutene o. Be pado waktau de sudo tentau Allah, Manusio Jahat o bakea teko.

⁷ Kekuatan de menea kejahatan o bi muloi bekerjo seca'o resio, tapi masiak tenaen. Be amen de tenaene o bi senikia,

⁸ tembeiba keten Manusio Jahat o. Mako amen Tuhan Yesus teko, Si bakea munuak Manusio Jahat o ngen nyabai kunei bibia-Ne, ngen binasone ngen ca'o kemten dirai-Ne pado waktau Si teko.

⁹ Manusio Jahat o bakea teko ngen kuaso de lai kunei Iblis. Si bakea menea kute mecem keajaiban ngen hal-hal luea biaso de penuak ngen pike.

¹⁰ Si bakea makei ca'o kidek utuk sesat tun-tun de bakea binaso. Tobo'o bakea binaso sebab temulok ngen coa senang bito de benea kunei Allah de dapet semlamat tobo'o.

¹¹ Do'oba sebabne Allah mbin kesesatan das tobo'o, de jijai sebab tobo'o pecayo ngen jano de benea.

¹² Akibatne, kute tun de riang ngen duso ngen coa pecayo ngen jano de benea o, bakea nukum.

Udi niliak utuk senlamat

¹³ Saudaro-saudaro de Tuhan kasihi! Keme harus bogoa mucep syukur ngen Allah tetang udi, sebab kunei mulone Allah bi miliak udi utuk senlamat lem Roh de semucai udi ngen lem kebenaran de udi pecayo.

¹⁴ Utuk do'oba Allah menok udi liwet Bito Baik de keme melei namen ngen udi. Allah menok udi, kerno Si lok supayo udi milau meding kemuliaan Tuhan ite Yesus Kristus.

¹⁵ Kerno o, Saudaro-saudaro, tegokba ngen kuet ngen bepegongba terus ngen ajaran-ajaran de sudo keme melei ngen udi, baik seca'o kecek kulo seca'o tetulis.

^16-17 Semoga Tuhan ite Yesus Kristus suang, ngen Allah Bapa ite mibur ngen kemuet ateinu, supayo udi dapet menea ngen melei namen jano de baik. Sebab Allah mengasihi ite, ngen kerno atei-Ne baik Si menea ite tep tabah, serto ma'ep de baik.