1 KORINTUS 16 - JANJAI BLAU Lem Bahaso Jang Bebilai

Sedekeak utuk sesamo tun Kristen

¹ Uyo tetang caci de udi lok sendekeak ngen sesamo tun Kristen, uku semayo supayo udi menea sesuoi petunjuk de uku melei ngen jemaat-jemaat neak Galatia.

² Pado bilai pertamo tiep minggau, lokba Saudaro kutene mok pao caci, masing-masing sesuoi ngen pendapatanne. Naikba caci o sapei uku teko, supayo pado waktau o coa perlu igai kenopoa.

³ Konyo amen uku sapei, uku bakea mutus tun-tun de sudo udi tujua. Uku bakea melei ngen tobo'o su'et pengantar, supayo tobo'o mbin caci sedekeak o moi Yerusalem.

⁴ Ngen amen ketenne baik bahwo uku lalau kulo ngen tobo'o, mako uku bakea lalu besamo tobo'o.

Rencano Paulus

⁵ Uku bakea semulau udi sesudo liwet Makedonia, sebab uku beniat utuk liwet neak di.

⁶ Buliak jijai uku bakea tinggea tegoa ngen udi, mukin selamo musim sengok. Sesudo'o udi dapet temulung uku temrus pemaneu moi penan selanjutne.

⁷ Uku coa lok semulau udi cuma sinngih bae. Amen Tuhan mizin, uku lok tinggea agok an ngen udi.

⁸ Sementaro o uku bakea tinggea neak kota yo, neak Efesus, sapei bilai Pentakosta.

⁹ Dau kesempatan neak yo utuk pekerjaan-pekerjaan de ade manfaat, kunyau dau kulo tun de temtang.

¹⁰ Amen Timotius teko, senambutba si ngen baik supayo si meraso tunggea neak antaro udi, sebab si awei uku kulo bekerjo utuk Tuhan.

¹¹ Jibeak sapei ade de cayeak ngen si. Tulungba si supayo si dapet temrus pemaneune igai ngen uku seca'o selamat, sebab uku mbot teko besamo ngen Saudaro-saudaro de luyenne.

¹² Tetang Saudaro ite Apolos, sudo kekedau kilai uku musul si supayo si besamo Saudaro de luyen lalau semulau udi. Tapi si ati meraso yakin bahwo si harus lalau uyo. Tapi amen ade kesempatan konyo, paset si bakea teko.

Penutup su'et

¹³ Lokba udi waspada ngen teguak lem idupnu sebagai tun Kristen. Betindakba seca'o binai ngen jijaiba kuet.

¹⁴ Kute de udi menea, neaba ngen kasih.

¹⁵ Saudaro pasetne kemnal Stefanas ngen keluargone; tobo'o de pertamo-tamo jijai Kristen neak Akhaya. Tobo'o ngen sepenuak atei kerjo kusus utuk melayan umat Allah.

¹⁶ Uku musul ngen bebenea supayo udi temotoa pipinan tun-tun de awei'o, serto tun-tun luyen de kerjo samo ngen melayan besamo tobo'o.

¹⁷ Uku senang das tekone Stefanas, Fortunatus ngen Akhaikus. Tobo'o adeba gitei udi bagiak uku.

¹⁸ Tobo'o bi menea atei uku jijai riang, awei tobo'o menea riang atei nu. Tun-tun awei'o harus nego.

¹⁹ Jemaat-jemaat neak Asia semapei salam tobo'o ngen udi. Akwila ngen Priskila serto jemaat de bekopoa neak umeak tobo'o kulo mbo salam Kristen.

²⁰ Kute Saudaro neak yo semapei salam ngen udi. Sesamo-samo melei seca'o akrab sebagai Saudaro Kristen.

²¹ Uku temambeak neak yo salam de uku temulis suang: Salam kunei ku, Paulus.

²² Tun de coa kemasiak Tuhan, kunyauba si tekutuk! Maranatha – Tuhan keme, tekoba!

²³ Semoga Tuhan Yesus melei berkat ngen Saudaro.

²⁴ Titip salam ngen Saudaro kutene de jijai do ngen Kristus Yesus. Hormat keme, Paulus