1 KORINTUS 11 - JANJAI BLAU Lem Bahaso Jang Bebilai

¹ Totoaba contoh uku, awei uku kulo temotoa contoh Kristus.

Tetang tutup ulau pado waktau semyang

² Uku mujai udi sebab udi bogoa minget uku ngen temotoa ajaran de uku nelei ngenko.

³ Tapi uku lok udi namen do hal igai, bahwo de jijai ulau tiep tun semanei adeba Kristus; de jijai ulau das pengaten selawei adeba sematen, ngen de jijai ulau das Kristus adeba Allah.

⁴ Amen suang semanei pado waktau bedu'o atau waktau semapei bito kunei Allah neak adep dau tun, makei tutup ulau, mako tun o mino Kristus.

⁵ Ngen amen suang selawei pado waktau bedu'o atau pado waktau semapei bito kunei Allah neak adep dau tun, coa makei tutup ulau, mako selawei o mino sematenne de jijai ulau das diraine. Do'oba serai bae seolah-olah ulau selawei o sudo cenukua.

⁶ Sebab amen suang selawei coa lok makei tutup ulau lebiak baik bukne genuting. Tapi amen suang selawei cenukua ulaune atau genuting bukne, mako do'o suaktau penghinaan bagiak ne. Sebab o lebiak baik si makei tutup ulau.

⁷ Semanei coa perlu makei tutup ulau, sebab si adeba cermin kunei awok ngen kebesaran Allah. Tapi selawei adeba cermin kunei kebesaran semanei,

⁸ sebab semanei coa jenijai kunei selawei; selaweiba de jenijai kunei semanei.

⁹ Semanei coa kulo jenijai utuk kepentingan selawei. Sebelekne selawei jenijai utuk kepentingan semanei.

¹⁰ Seba o, utuk semnang tobo malaikat, suang selawei harus makei tutup ulau sebagai tando bahwo si berade neak beak kuaso sematenne.

¹¹ Kunyau awei'o lem kehidupan ite sebagai tun Kristen, selawei coa idup utuk diraine suang, lepas kunei semanei, ngen semanei kulo coa nam idup suang, lepas kunei selawei.

¹² Kerno, kunyau selawei pertamo jenijai kunei semanei, tapi sesudo'o semanei laher kunei selawei; ngen kute sesuaktau asalne kunei Allah.

¹³ Cubo Saudaro-saudaro suang peker tetang hal yo: Jano baik suang selawei bedu'o ngen Allah neak adep dau tun, coa makei tutup ulau?

¹⁴ Neak ipe bae ite kemliak bahwo amen semanei bukne panjang, do'o coa patut.

¹⁵ Tapi bagiak selawei, buk adeba utuk temutup ulaune. Si bangga ngen buk panjangne.

¹⁶ Kerno o, amen ade de lok tekea tetang masalah yo, uku cuma dapet madeak bahwo baik ite atau jemaat Allah luyenne, cuma temuan kebiasaan lem jemaat; luyen kunei do'o coa gen.

Perjamuan Tuhan

¹⁷ Tetang hal neak beak yo, uku coa mujai udi. Ketiko ko bekopoa utuk semyang, ko coa dapet amal.

¹⁸ Pertamo-tamo uku temi'uk, bahwo neak antaro udi ade kelopok-kelopok de selisiak. Ngen temurut uku bito o ade baneane.

¹⁹ Memang sudo wajar amen neak antaro udi ade selisiak, supayo keten konyo api bae tun Kristen de asli.

²⁰ Tapi pado waktau udi bekopoa, de udi nea iso perjamuan Tuhan.

²¹ Sebab pado waktau embuk, udi bebut mok kembukne suang, sehinggo ade de coa dapet jejano, tapi de luyenne jijai mabuk.

²² Getai awei'o? Jano Saudaro coa temuan umeak? Saudaro dapet embuk ngen menem neak di! Jano Saudaro lok mino jemaat Allah ngen semelek tun-tun peset? Jano de harus uku nadeak ngen udi? Jano uku harus mujai udi? Coa! Debat bae uku coa bakea mujai udi.

²³ Sebab de uku najea ngenko, do'o uku tenimo kunei Tuhan suang: bahwo pado malem o ketiko Yesus, Tuhan ite senreak, Tuhan mok ruti,

²⁴ sesudo Tuhan mucep syukur ngen Allah kerno ruti o, Tuhan megit ruti ngen tangen-Ne, lajau madeak, “Dioba awok-Ku de senreak utuk udi. Neaba dio utuk minget Uku.”

²⁵ Awei'o kulo sesudo mbuk ruti, Tuhan mok caker anggur lajau madeak, “Anggur yo adeba janjai Allah de blau, jijai sah ngen daleak-Ku. Tiep kilai udi menem yo, neaba dio utuk minget Uku.”

²⁶ Memang tiep kilai udi mbuk ruti ngen menem anggur yo, udi melei namen tetang mateine Tuhan, sapei Tuhan teko.

²⁷ Kerno o, tun de embuk ruti ngen menem anggur Tuhan ngen ca'o de coa patut tun o beduso te'adep Tuhan de sudo semreak awok ngen daleak-Ne.

²⁸ Jijai, tiep tun harus merikso awokne kileak, baruba si buliak mbuk ruti ngen menem anggur o.

²⁹ Sebab amen tun embuk ruti ngen menem anggur ngen cao coa dulai bahwo perjamuan o adeba utuk awok Tuhan, tun o embuk ngen menem utuk temimo ukuman Allah kerno diraine suang.

³⁰ Do'oba sebabne dau kunei antaro udi de bolon ngen coa kuet, ngen ade kulo de matei.

³¹ Tapi amen ite merikso dirai ite lebiak dute, ite coa bakea nukum Allah.

³² Tapi amen ite nukum Allah, Tuhan bakea mokoa ite, supayo ite jibeak keno ukum besamo-samo dunio yo.

³³ Kerno o, Saudaro-saudaroku amen udi bekopoa utuk embuk pado perjamauan Tuhan, udi harus saling mbot.

³⁴ Amen ade de nyemen, si harus mbuk dute neak dasei. Amen udi dulai ngen hal yo mako semyangnu coa bakea dapet ukuman kunei Allah kerno dirainu suang. Tetang masalah-masalah de luyen, bakea uku jemlas ngen udi, amen uku teko konyo.