Ruka 3 - Rapa Nui

Ko Iovani Papatito ꞌi ꞌuta

¹ ꞌI te hoꞌe ꞌahuru mā pae matahiti o te haka tere o te ꞌariki rōmano ko Tiverio, ko Pontio Pirato te suerekao o Hūrea. ꞌA ⌊ꞌErore⌋ te haka tere a Karirea, ꞌa Feripe, taina ōꞌona, a Iturea ꞌe a Tarakonite, ꞌe ꞌa Ritania te haka tere te kona era ko Avirene.

² Te ⌊oromatuꞌa hopeꞌa o te ra-rahi⌋ ko ꞌĀnā ararua ko Kaifā. ꞌI rā noho iŋa i vānaŋa rō te ꞌAtua ki a Iovani, he poki ꞌa Taharia, ꞌi te kona ꞌone taꞌe noho taŋata.

³ ꞌE a Iovani i haꞌere rō a te kona taꞌatoꞌa o te rio ko Horotana e kī e oho era ki te taŋata mo huri o te manaꞌu ki te ꞌAtua ꞌe mo haka ⌊papatito⌋, pē ira ana haka kore e te ꞌAtua i te rāua hara.

⁴ Te meꞌe taꞌatoꞌa topa nei pa he meꞌe pāpaꞌi era ꞌā e te perofeta era ko ꞌItaia: «E tahi reꞌo e ohu ꞌā ꞌi te kona ꞌone taꞌe noho taŋata: “Ka haka riva-riva te ara o te ⌊Kiritō⌋; ka mātaki e tahi ara tī-tika.

⁵ Ka tanu te vaha taꞌatoꞌa o te kona maꞌuŋa, ꞌe te kona ruŋa nui ka tono ka haka pararaha. Te ara pōteko-teko ka haka tī-tika, ꞌe te ara pū-pū ka tanu ka haka riva-riva.

⁶ Pē ira ka takeꞌa ena te taŋata taꞌatoꞌa o te ao i te ora uŋa mai e te ꞌAtua”».

⁷ I tuꞌu era te taŋata mo papatito i a rāua, he kī e Iovani: —¡E te huaꞌai o te kōreha veneno ē! ¿ꞌA ꞌai i kī atu e ora rō kōrua mai roto i te ꞌati he ūtuꞌa nā e oho mai ena?

⁸ Ka haka tī-tika te kōrua noho iŋa ki takeꞌa riva-riva ai he parautiꞌa mau ꞌā ko ⌊huri ꞌana te kōrua manaꞌu ki te ꞌAtua⌋. ꞌE, e uꞌi ꞌo kī rō ꞌi roto i a kōrua ꞌā pē nei ē: “¡A mātou he hakaara o ⌊ꞌAparahama⌋; ꞌo ira e tano rō ꞌā a mātou ki te mata o te ꞌAtua!”. ꞌĪ a au he kī atu: te ꞌAtua e tano nō mo haka riro i te ŋā māꞌea nei he hakaara o ꞌAparahama.

⁹ ꞌE ꞌī a au he kī takoꞌa atu: ꞌai te ꞌōhio ko rito ꞌā mo paꞌo i te tumu mai tōꞌona aka. Te tumu taꞌatoꞌa taꞌe hua o te meꞌe riva-riva he paꞌo ꞌe he hoa ki roto i te ahi.

¹⁰ He ꞌui e te nuꞌu: —¿He aha te mātou meꞌe mo aŋa?

¹¹ He pāhono e Iovani: —Te taŋata ai e rua ōꞌona kahu, ka vaꞌai e tahi ki te taŋata ꞌina he kahu; ꞌe te taŋata e ai rō ꞌā tāꞌana kai, ka vaꞌai to te taŋata ꞌina ꞌāꞌana kai.

¹² Tētahi o te ⌊nuꞌu haka ꞌauhau i te taŋata hai moni mo te rōmano⌋ he haka hāhine takoꞌa mo papatito i a rāua ꞌe he ꞌui: —E te Maꞌori, ¿he aha te mātou meꞌe mo aŋa?

¹³ He kī e Iovani: —ꞌIna ko haka ꞌauhau i te taŋata ꞌata hau ki te moni mau era mo ꞌauhau.

¹⁴ He ꞌui takoꞌa e te tētahi vaꞌehau: —ꞌE, ꞌa mātou, ¿he aha te mātou meꞌe mo aŋa? He pāhono e Iovani: —ꞌIna ko toꞌo i te meꞌe o te rua hai haka riꞌa-riꞌa, ꞌe ꞌina ko tuhi reo-reo i te meꞌe kai aŋa e te rua. Ka koa nō kōrua ꞌi te moni ꞌauhau atu.

¹⁵ ꞌI te huru o te vānaŋa ꞌa Iovani, te taŋata e manaꞌu era: te Kiritō tiaki e rāua e te ⌊hūrio⌋ e ko roa he tuꞌu, ꞌe ꞌi roto i te rāua māhatu ꞌai e manaꞌu era koiꞌite ko Iovani te Kiritō.

¹⁶ ꞌO ira i kī ai e Iovani: —Te parautiꞌa, a au e papatito nei hai vai; ꞌe nā e oho mai ena te kope mo papatito atu hai ⌊Vārua Maitai⌋ ꞌe hai ahi. ꞌAta hau a ia ki a au; ꞌātā e ko tano au mo kume i te hau o tōꞌona kirivaꞌe.

¹⁷ A ia e maꞌu rō ꞌana i tāꞌana meꞌe tuꞌu pa he pātia mo haꞌataꞌa i te kave-kave paka-paka mai roto i te tariko. Te tariko e hāpaꞌo rō ꞌi roto i te hare haꞌaputu tariko, ꞌe te kave-kave e tutu rō ꞌi roto i te ahi taꞌe mate ki te hora hopeꞌa.

¹⁸ Hai meꞌe nei ꞌe hai tētahi atu vānaŋa e haka ꞌite e oho era a Iovani ki te taŋata i te ⌊roŋo riva-riva o te ꞌAtua⌋.

¹⁹ I ture takoꞌa rō ki a ꞌErore, kope haka tere o rā kona, ꞌo te noho ki a ꞌEroria, he viꞌe ⌊hāipo-ipo⌋ o te taina o ꞌErore, ꞌe ꞌo te tētahi atu meꞌe rake-rake aŋa e ia.

²⁰ ꞌE, a ꞌErore, ki tāꞌana meꞌe rake-rake taꞌatoꞌa aŋa, he ꞌāmui e tahi haka ꞌou: he puru i a Iovani ꞌi roto i te hare maꞌuꞌaurī.

He papatito iŋa i a Ietū

²¹ E papatito nō ꞌā a Iovani i te nuꞌu, he papatito takoꞌa i a Ietū. E pure nō ꞌana a Ietū ꞌi rā hora, he ha-hata te raŋi,

²² he turu te Vārua Maitai ki ruŋa i a ia tuꞌu pa he pāroma, ꞌe he ŋaroꞌa e tahi reꞌo ꞌi te raŋi e kī era: «A koe he Poki ꞌāꞌaku, Poki haŋa rahi; ꞌi ruŋa i a koe tōꞌoku koa».

He nuꞌu mai i a rāua i haka ara mai ai a Ietū

²³ Ka toru ꞌahuru matahiti o Ietū i haꞌamata ai i tāꞌana aŋa. Ki te kī o te nuꞌu, a Ietū he poki ꞌa Kōsē. A Kōsē he poki ꞌa ꞌĒrī.

²⁴ A ꞌĒrī he poki ꞌa Matā. A Matā he poki ꞌa Rēvī. A Rēvī he poki ꞌa Merekī. A Merekī he poki ꞌa Hanaī. A Hanaī he poki ꞌa Kōsē.

²⁵ A Kōsē he poki ꞌa Matatia. A Matatia he poki ꞌa ꞌĀmō. A ꞌĀmō he poki ꞌa Nāū. A Nāū he poki ꞌa ꞌĒteri. A ꞌĒteri he poki ꞌa Nākai.

²⁶ A Nākai he poki ꞌa Māꞌata. A Māꞌata he poki ꞌa Matatia. A Matatia he poki ꞌa Tēmei. A Tēmei he poki ꞌa Kōteke. A Kōteke he poki ꞌa Hūrā.

²⁷ A Hūrā he poki ꞌa Hoanana. A Hoanana he poki ꞌa Rētā. A Rētā he poki ꞌa Torovāvere. A Torovāvere he poki ꞌa Taratīere. A Taratīere he poki ꞌa Nērī.

²⁸ A Nērī he poki ꞌa Merekī. A Merekī he poki ꞌa ꞌĀrī. A ꞌĀrī he poki ꞌa Kōtama. A Kōtama he poki ꞌa Eremārama. A Eremārama he poki ꞌa ꞌEra.

²⁹ A ꞌEra he poki ꞌa Ietū. A Ietū he poki ꞌa Erietere. A Erietere he poki ꞌa Hōrima. A Hōrima he poki ꞌa Matā. A Matā he poki ꞌa Rēvī.

³⁰ A Rēvī he poki ꞌa Timione. A Timione he poki ꞌa Hura. A Hura he poki ꞌa Kōsē. A Kōsē he poki ꞌa Hōnama. A Hōnama he poki ꞌa Eriatime.

³¹ A Eriatime he poki ꞌa Mereꞌā. A Mereꞌā he poki ꞌa Mēnā. A Mēnā he poki ꞌa Matatā. A Matatā he poki ꞌa Nātana. A Nātana he poki ꞌa ⌊Tāvita⌋.

³² A Tāvita he poki ꞌa Hētē. A Hētē he poki ꞌa ꞌŌveti. A ꞌŌveti he poki ꞌa Vō. A Vō he poki ꞌa Tera. A Tera he poki ꞌa Nātone.

³³ A Nātone he poki ꞌa ꞌAminarava. A ꞌAminarava he poki ꞌa ꞌAramī. A ꞌAramī he poki ꞌa ꞌĀrani. A ꞌĀrani he poki ꞌa ꞌEterone. A ꞌEterone he poki ꞌa Pare. A Pare he poki ꞌa Hūrā.

³⁴ A Hūrā he poki ꞌa Hākovo. A Hākovo he poki ꞌa Itaꞌata. A Itaꞌata he poki ꞌa ꞌAparahama. A ꞌAparahama he poki ꞌa Tere. A Tere he poki ꞌa Nāhoro.

³⁵ A Nāhoro he poki ꞌa Teruko. A Teruko he poki ꞌa Rākau. A Rākau he poki ꞌa Pereke. A Pereke he poki ꞌa ꞌĒvere. A ꞌĒvere he poki ꞌa Tera.

³⁶ A Tera he poki ꞌa Kainā. A Kainā he poki ꞌa ꞌArapakata. A ꞌArapakata he poki ꞌa Teme. A Teme he poki ꞌa Nōē. A Nōē he poki ꞌa Rāmeke.

³⁷ A Rāmeke he poki ꞌa Matutarema. A Matutarema he poki ꞌa ꞌĒnoko. A ꞌĒnoko he poki ꞌa Hārete. A Hārete he poki ꞌa Mārārē. A Mārārē he poki a Kainā.

³⁸ A Kainā he poki ꞌa ꞌĒnō. A ꞌĒnō he poki ꞌa Tē. A Tē he poki ꞌa ⌊ꞌĀtamu⌋, ꞌe a ꞌĀtamu he taŋata aŋa e te ꞌAtua.