Ruka 18 - Rapa Nui

He viꞌe hove ꞌe he pūꞌoko haka tere o te hare ture

¹ Hai ꞌaꞌamu haꞌaauraꞌa i hāpī ai e Ietū ki te nuꞌu mo pure mo oho ki te ꞌAtua ꞌe mo taꞌe haka hōriŋa.

² He kī: «E ai rō ꞌana te taŋata pūꞌoko haka tere o te hare ture o te kona e tahi, ꞌina he moꞌa i te ꞌAtua, ꞌe ꞌina he haŋa ki te taŋata.

³ ꞌI rā kona takoꞌa te viꞌe hove e tahi horo i tāꞌana ture ki rā taŋata mo uꞌi i te rāveꞌa mo haka ūtuꞌa i te kope ararua i ture ai.

⁴ »Meꞌe rahi te mahana o rā viꞌe i oho mo vānaŋa ki rā taŋata, ꞌe ꞌina he haŋa mo haka roŋo i tāꞌana ture. He manaꞌu ia e rā taŋata: “Kope taꞌe moꞌa a au i te ꞌAtua ꞌe taꞌe haŋa ki te taŋata.

⁵ Ka ai atu pē ira, ꞌi te taꞌe haka rē i a au e te viꞌe nei, ꞌī a au he hāꞌūꞌū ꞌo hoki mai ꞌo haka ŋāruru-ruru nō mai i tōꞌoku pūꞌoko”».

⁶ He kī e Ietū: «Ka haka topa rā kōrua i te manaꞌu ki te pūꞌoko haka tere taꞌe tano era o te hare ture.

⁷ Mo ai pē ira e manaꞌu era, ¿e ko hāꞌūꞌū hō te ꞌAtua ki te nuꞌu haꞌataꞌa e ia māꞌana pure ki a ia paurō te mahana? ¿E haka tiaki mau rō e te ꞌAtua?

⁸ ꞌĪ a au he kī atu: e ko roa he hāꞌūꞌū. ꞌE, hora era o te ⌊Poki o te taŋata⌋ ka tuꞌu haka ꞌou mai ena, ¿e ai nō ꞌana hō te taŋata ⌊haka moe i te manaꞌu⌋ ꞌi ruŋa i te ꞌAtua?».

He pure iŋa o te kope hoko rua

⁹ He ꞌaꞌamu takoꞌa e Ietū i te ꞌaꞌamu haꞌaauraꞌa nei mo te nuꞌu manaꞌu ko rāua nō te nuꞌu aŋa i te meꞌe tī-tika ki te mata o te ꞌAtua ꞌe te tētahi nuꞌu ꞌina:

¹⁰ «He oho e rua taŋata he pure ꞌi te Kona Haꞌamuri ꞌAtua: e tahi he ⌊fariseo⌋, ꞌe te rua he taŋata haka ꞌauhau i te nuꞌu hai moni mo te rōmano.

¹¹ »He māroa rā fariseo he pure a roto i a ia ꞌā: “E te ꞌAtua ē, he māuru-uru atu a au ꞌo te taꞌe ai ōꞌoku pa he tētahi nuꞌu: he toke-toke, he taparahi-taꞌata, he taiꞌata; ꞌe, takoꞌa, ꞌo te taꞌe ai ōꞌoku pa he taŋata era ai, haka ꞌauhau i te nuꞌu hai moni mo te rōmano.

¹² A au e tapu rō ꞌana i te kai e rua mahana ꞌi te tāpati ꞌe e haꞌataꞌa rō ꞌana e tahi tara mōꞌou o roto o te hoꞌe ꞌahuru tara ꞌauhau mai o tāꞌaku aŋa, pa he meꞌe kī e ⌊Mōtē⌋”.

¹³ »ꞌE tū kope haka ꞌauhau moni era mo te rōmano, i haka ꞌava-ꞌava i māroa ai ꞌe a raro ꞌā te mata e uꞌi era, he tiŋi-tiŋi koroꞌiti i tōꞌona uma koia ko kī: “¡E te ꞌAtua ē! ¡Ka haka ꞌaroha mai koe; he taŋata hara a au!”.

¹⁴ »ꞌĪ a au he kī atu: te taŋata haka ꞌauhau era i te nuꞌu hai moni mo te rōmano, i hoki era ki tōꞌona hare, ko haka kore tahi ꞌana e te ꞌAtua i tōꞌona hara, ꞌe te taŋata fariseo era, kai haka kore e te ꞌAtua i te hara. Te taŋata haka paka i a ia, pe muꞌa ka oho ena, e haka ka-kata ꞌe e haka haꞌamā rō; ꞌe te taŋata taꞌe haka paka i a ia, pe muꞌa ka oho ena, e haka hōnui rō».

He haꞌamaitai iŋa o Ietū i te ŋā poki

¹⁵ ꞌI te mahana e tahi he maꞌu e te nuꞌu i te ŋā poki mo haꞌamaitai e Ietū. I takeꞌa era e te nuꞌu hāpī ꞌāꞌana, he ture ki rā nuꞌu.

¹⁶ He raŋi e Ietū ki tū ŋā poki era mo oho, ꞌe he kī ki tāꞌana nuꞌu hāpī: «Ka haka rē kōrua i te ŋā poki mo oho mai ki a au. Te ⌊haka tere iŋa ꞌāpī o te ꞌAtua⌋ mo te nuꞌu pa he ŋā poki.

¹⁷ ꞌĪ a au he kī atu: te kope taꞌe haka rē mo haka tika i a ia e te ꞌAtua pa he haka rē iŋa o te ŋā poki mo haka tika i a rāua e te rua, e ko oꞌo ki roto i te haka tere iŋa ꞌāpī ōꞌona».

Ko Ietū ꞌe he kope ꞌono e tahi

¹⁸ He ꞌui e te taŋata ra-rahi ⌊hūrio⌋ e tahi ki a Ietū: —E te Maꞌori riva ē, ¿he aha tāꞌaku meꞌe mo aŋa mo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua?

¹⁹ He pāhono e Ietū: —¿He aha koe e kī mai ena he taŋata riva a au? E tahi mau nō kope riva: he ꞌAtua.

²⁰ A koe ko ꞌite ꞌana i tāꞌana roŋo: ꞌIna ko taiꞌata, ꞌina ko mate te taŋata i a koe, ꞌina ko toke, ꞌina ko reo-reo ꞌe e moꞌa te matuꞌa tane ꞌe te matuꞌa vahine.

²¹ He kī e rā taŋata: —Te ŋā meꞌe taꞌatoꞌa ena ko aŋa ko oho mai era ꞌā e au mai tōꞌoku ꞌāpī iŋa ꞌana.

²² I ŋaroꞌa era e Ietū, he kī: —E tahi aꞌa meꞌe toe mo aŋa: ka oho ka hoꞌo tahi tuꞌu hauhaꞌa, ꞌe ꞌai ka vaꞌai rō te moni mo te nuꞌu veve. Pē ira he ai tuꞌu hauhaꞌa ꞌi ruŋa i te raŋi. ꞌE ꞌai koe ka oho iho mai ꞌi muri i a au mo taŋata hāpī ꞌāꞌaku.

²³ I ŋaroꞌa era i rā vānaŋa, he māui-ui te māhatu ꞌe he haka kiva-kiva ꞌi te rahi o tōꞌona ꞌono.

²⁴ I takeꞌa era e Ietū ko haka kiva-kiva ꞌā, he kī: —¡Ko te aŋa riꞌa-riꞌa ꞌō mo te nuꞌu ꞌono mo oꞌo ki roto i te haka tere iŋa ꞌāpī o te ꞌAtua!

²⁵ I hau rō atu ꞌi te aŋarahi mo te taŋata ꞌono mo haka rē i a ia mo haka tere e te ꞌAtua ki te oꞌo o te kameio a roto i te mata o te ivi.

²⁶ Te nuꞌu ŋaroꞌa i rā meꞌe he ꞌui ki a Ietū: —Mo ai pē ira, ¿ko ai ia te meꞌe mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua?

²⁷ He pāhono e Ietū: —E ko ravaꞌa, ki te hora hopeꞌa, e te kope e tahi mo haka eꞌa i a ia mau ꞌā mai roto i te ūtuꞌa o te hara. Mo te ꞌAtua mau nō e haka eꞌa. ꞌIna, paꞌi, e tahi meꞌe mo taꞌe ravaꞌa e ia mo aŋa.

²⁸ He kī e Pētero: —E Ietū, ko haka rē tahi ꞌana a mātou i te mātou meꞌe ꞌe ko oho atu ꞌā ꞌi muri i a koe.

²⁹ He pāhono e Ietū: —ꞌĪ a au he kī atu: te nuꞌu haka rē i te hare, i te viꞌe, i te taina, matuꞌa ꞌo ŋā poki mo tāvini ki te ꞌAtua,

³⁰ ꞌata rahi te meꞌe mo vaꞌai e te ꞌAtua ꞌi te ao nei ꞌe, pe muꞌa ka oho ena, he vaꞌai i te ora ꞌāpī ꞌina he hopeꞌa raꞌa.

He toru haka ꞌite iŋa o Ietū i tōꞌona mate

³¹ He toꞌo ia e Ietū i tāꞌana nuꞌu hāpī, he haka tapa koia ko kī: «Nā ko ꞌite ꞌā e kōrua: ꞌī tātou e oho ꞌana ki Hērutarema. ꞌI ira ka topa tahi ena te meꞌe pāpaꞌi e te perofeta o ruŋa o te Poki o te taŋata.

³² E vaꞌai rō i a ia ki te rima o te nuꞌu taꞌe he hūrio, e haka ka-kata rō, e vā-vā rō ꞌe e ꞌanu-ꞌanu rō.

³³ E tiŋaꞌi rō hai ꞌuaka ꞌe e tiŋaꞌi e haka mate rō; ꞌe, ꞌi te toru mahana, he ora haka ꞌou».

³⁴ ꞌE tū nuꞌu era ꞌina he aŋi-aŋi, ꞌe ꞌina he ꞌite he aha te meꞌe e vānaŋa era e Ietū; rā meꞌe he meꞌe mo taꞌe aŋi-aŋi vave e rāua ꞌi rā hora.

He haka ora iŋa o Ietū i te taŋata matapō

³⁵ I hāhine era a Ietū ki te kona e tahi te ꞌīŋoa ko Herikō, ꞌi te ara te taŋata matapō e tahi e noho rō ꞌā e no-noꞌi ꞌana hai moni.

³⁶ I ŋaroꞌa era i te rahi o te taŋata, he ꞌui he aha te auraꞌa o rā meꞌe.

³⁷ He pāhono e te nuꞌu: —Ko Ietū era o Nātāreta e vari ꞌana a nei.

³⁸ He ohu ia e tū taŋata matapō era: «¡E Ietū, e te Hakaara o ⌊Tāvita⌋ ē, ka haka ꞌaroha koe i a au!».

³⁹ He ture e te nuꞌu o muꞌa mo mou, ꞌe ꞌai rā taŋata e ꞌata ohu pūai era: «¡E te Hakaara o Tāvita ē, ka haka ꞌaroha koe i a au!».

⁴⁰ He noho a Ietū ꞌe he uŋa mo maꞌu i tū taŋata era. I puā era rā taŋata he ꞌui:

⁴¹ —¿He aha taꞌa meꞌe haŋa mo aŋa atu e au? He pāhono e tū taŋata matapō era: —E Ietū, e haŋa rō ꞌana a au mo ora o tōꞌoku mata.

⁴² He kī e Ietū: —¡Nā he ora tuꞌu mata ꞌo te haka moe ōꞌou i te manaꞌu ꞌi ruŋa i te ꞌAtua!

⁴³ ꞌI tū hora mau era ꞌā he ora rō ꞌai te mata o tū taŋata era. He oho ia ꞌi muri i a Ietū koia ko haꞌahana-hana ki te ꞌAtua. Te nuꞌu taꞌatoꞌa takeꞌa i tū meꞌe era he haꞌahana-hana takoꞌa ki te ꞌAtua.