Ruka 11 - Rapa Nui

He hāpī iŋa o Ietū i te pure

¹ E tahi mahana e pure ꞌana a Ietū. I oti era he kī e tahi o roto o tāꞌana nuꞌu hāpī: —E Ietū, ka hāpī mai koe i a mātou pē hē ana pure; a Iovani Papatito, paꞌi, i hāpī rō i te pure ki tāꞌana nuꞌu hāpī.

² He kī e Ietū: —Pē nei a kōrua ana pure: «E te Matuꞌa o mātou ē, te meꞌe haŋa he moꞌa o te taŋata taꞌatoꞌa i tuꞌu ꞌīŋoa, ꞌe he haka rē atu mo haka tere ōꞌou i a rāua.

³ E vaꞌai mai koe, e te ꞌAtua ē, hai kai paurō te mahana.

⁴ E haka kore koe i te mātou hara, pa he haka rehu iŋa o mātou i te meꞌe ꞌino aŋa mai e te rua. ꞌE, ꞌi te hora o te haka ꞌatu mai, ꞌina koe ko haka rē i a mātou mo viri ki roto i te hara».

⁵ He kī takoꞌa e Ietū: «He ꞌaꞌamu nō nei e tahi: ꞌAhuru mā piti o te pō, e tahi taŋata he eꞌa he oho ki te hare o tōꞌona repahoa ꞌe he kī: “E hoa, ka vaꞌai mai koe e toru haraoa.

⁶ Ko tuꞌu mai ꞌana ki tōꞌoku hare te repahoa e tahi, ꞌe ꞌina ꞌāꞌaku meꞌe mo vaꞌai”.

⁷ »He pāhono e rā hoa mai roto: “Ka eꞌa koe ka oho. ꞌĪ a mātou ko te ŋā poki e hāꞌuru ꞌana ꞌe ko puru ꞌā tōꞌoku ꞌōpani. E ko eꞌa e ko vaꞌai atu a au e tahi meꞌe”.

⁸ »ꞌĪ a au he kī atu: ka ai atu rā hoa e ko haŋa mo eꞌa mo vaꞌai i te meꞌe ki tōꞌona repahoa, pē tū eꞌa iŋa ꞌana ꞌi te taꞌe haka rē i a rāua mo hāꞌuru, ꞌe he vaꞌai i te meꞌe haŋa.

⁹ ꞌO ira, e no-noꞌi ki te ꞌAtua, he vaꞌai atu; e kimi, he haka takeꞌa atu; e pātōtō te ꞌōpani, he mātaki atu.

¹⁰ Ki te kope no-noꞌi, paꞌi, he vaꞌai; ki te kope kimi, he haka takeꞌa; ꞌe ki te kope pātōtō, he mātaki ki a ia.

¹¹ »¿Ko matuꞌa hē te matuꞌa o roto i a kōrua mo vaꞌai hai kōreha veneno ki tāꞌana poki ana no-noꞌi hai ika;

¹² ꞌo hai veriꞌārahu ana no-noꞌi hai māmari?

¹³ Mo ꞌite ia a kōrua mo vaꞌai i te meꞌe riva-riva ki te kōrua ŋā poki, ka ai atu kōrua he nuꞌu hara, ¿e ko taꞌe vaꞌai hō e te Matuꞌa o te raŋi i te ⌊Vārua Maitai⌋ ki te nuꞌu no-noꞌi ki a ia?».

Te mana o Ietū e kī era o ⌊Veresepupa⌋

¹⁴ A Ietū e haka eꞌa ꞌana i te tātane mai roto i te taŋata e tahi, taŋata ko haka mou ꞌana i te reꞌo e rā tātane. I eꞌa era tū tātane era, he haꞌamata rā taŋata he vānaŋa haka ꞌou. He māere te nuꞌu ꞌi tū meꞌe era.

¹⁵ He kī e te tētahi: «A Veresepupa, pūꞌoko o te tātane, i vaꞌai i te mana ki te taŋata ena mo haka eꞌa i te tātane».

¹⁶ ꞌE tētahi atu, ꞌi te haŋa mo haka ꞌatu mo uꞌi pē hē ka meꞌe era a Ietū, he kī mo aŋa e tahi mana.

¹⁷ ꞌI te ꞌite o Ietū i te manaꞌu o rā nuꞌu he kī: «Te henua tamaꞌi ki a rāua ꞌā e tōtōā ꞌana i a rāua ꞌā; ꞌe te huaꞌai moto ki a rāua ꞌā e haꞌataꞌa ꞌana.

¹⁸ Pē ira takoꞌa, mo moto o Rukifero ꞌe o tāꞌana tātane ki a rāua ꞌā, te pūai o tōꞌona haka tere iŋa he ŋaro. »A au e kī atu ena i te meꞌe nei he kī o kōrua e haka eꞌa nei a au i te tātane hai pūai o Veresepupa.

¹⁹ Mo ai pē ira, ¿ꞌa ꞌai te vaꞌai i te pūai ki te nuꞌu hāpī o kōrua mo haka eꞌa i te tātane mai roto i te taŋata? E takeꞌa ena te hape o te kōrua manaꞌu hai meꞌe aŋa e te kōrua nuꞌu hāpī.

²⁰ ꞌE, mo haka eꞌa ōꞌoku i te tātane mai roto i te taŋata hai pūai o te ꞌAtua, ko tuꞌu mai ꞌana ia te ⌊haka tere iŋa ꞌāpī o te ꞌAtua⌋ ki a kōrua.

²¹ »Mo ai o te ꞌaito e maꞌu rō ꞌā i tāꞌana meꞌe mo moto ꞌe e ꞌauario ꞌana i tōꞌona hare, ꞌina e tahi kope mo ravaꞌa mo toꞌo i te meꞌe o roto.

²² Ka ai atu pē ira, mo tuꞌu o te rua ꞌaito ꞌata hau ꞌi te haka kē ꞌe he rē ki a ia, he hiko ia i rā meꞌe maꞌu era ꞌāꞌana mo ꞌauario, he toꞌo i te meꞌe taꞌatoꞌa ai o rā hare, ꞌe he tuhaꞌa ki tōꞌona repahoa.

²³ »ꞌĪ a au he kī atu: te kope taꞌe ⌊haka moe i te manaꞌu⌋ ꞌi ruŋa i a au ꞌina he haŋa mai, ꞌe te kope taꞌe hāꞌūꞌū mai mo aŋa i tāꞌaku aŋa e haka hape ꞌā i tāꞌaku aŋa.

Te hoki iŋa o te tātane ki roto i te taŋata

²⁴ »Te tātane e haka eꞌa ena mai roto i te taŋata he oho he kimi a te kona ꞌone taꞌe noho taŋata hai kona mo noho. ꞌI te taꞌe ravaꞌa, he manaꞌu: “ꞌĪ a au he hoki ki te hare mai ira a au i haka eꞌa mai ai”.

²⁵ »Ka hoki era rā tātane, he takeꞌa i rā taŋata pa he hare e riva rō ꞌā mo noho, ko purumu ko haka riva-riva ꞌana.

²⁶ He oho rā tātane he tari ki ira e hitu tātane ꞌata hau ꞌi te taparahi-taꞌata ki a ia, he uru he noho tahi ꞌi roto i tū taŋata era, ꞌe he ꞌata ꞌati rō atu ꞌai rā taŋata ki te hora raꞌe era».

Ko ai mau te nuꞌu koa

²⁷ E kī e oho nō ꞌā a Ietū i te ŋā meꞌe nei, he ohu e te viꞌe e tahi mai roto i te nuꞌu: —¡Ko te koa i te viꞌe haka poreko ꞌe hāpaꞌo i a koe!

²⁸ He pāhono e Ietū: —¡Te koa mau tāꞌau i te nuꞌu ŋaroꞌa ꞌe haꞌatura i te vānaŋa o te ꞌAtua!

Te taŋata o te hora nei

²⁹ Ko ꞌata rahi ꞌana te nuꞌu e taka-taka e oho era. He haꞌamata haka ꞌou ia a Ietū he kī: «Te taŋata o te hora nei taŋata manaꞌu taꞌe tano. E haŋa ꞌana mo aŋa ōꞌoku i te mana, ꞌe, te meꞌe mau nō mo takeꞌa e rāua he tāpaꞌo tuꞌu pa he meꞌe topa ki te perofeta era ko ⌊Hōnā⌋.

³⁰ Te meꞌe topa, paꞌi, ki a ia i aŋa ai mo ꞌite e te nuꞌu o Nīnive: o te ꞌAtua i uŋa i a ia. Pē ira takoꞌa, te meꞌe ka topa ena ki te ⌊Poki o te taŋata⌋ mo haka ꞌite ki te nuꞌu taꞌatoꞌa o te hora nei: o te ꞌAtua a ia i uŋa mai.

³¹ »ꞌI te mahana o te haka ūtuꞌa, hora era mo ture ki te taŋata taꞌatoꞌa, he eꞌa te ꞌariki vahine o Tāvā ꞌe hai ia ka takeꞌa ena te hape o kōrua; i oho nō mai, paꞌi, mai te henua hopeꞌa o te roa mo haka roŋo i te vānaŋa mārama-rama o te ꞌariki era ko ⌊Toromono⌋. ꞌE ꞌi te kona nei te kope ꞌata hau ki a Toromono.

³² »Pē ira takoꞌa, te nuꞌu o Nīnive ka eꞌa ena ꞌi te mahana o te haka ūtuꞌa, ꞌe hai rāua ka takeꞌa ena te hape o kōrua; te nuꞌu o ira, paꞌi, i ŋaroꞌa era i te vānaŋa ꞌa Hōnā, he haka moe tahi i te manaꞌu ꞌi ruŋa i te ꞌAtua. ꞌE ꞌi te kona nei te kope ꞌata hau ki a Hōnā.

Te mata pa he mōrī mo te hakari

³³ »ꞌIna e tahi taŋata haka pura i te hakariꞌi mo haka rē ꞌi raro i te ꞌavahata. E haka rē ena ꞌi te kona ruŋa nui o roto i te hare mo haka māꞌeha o te taŋata.

³⁴ Te mata pa he mōrī haka māꞌeha i te hakari ꞌe pē ira te manaꞌu o te taŋata. Mo riva-riva, he haꞌere a roto i te māꞌeha; ꞌe mo rake-rake, a roto i te pōhāhā.

³⁵ »E uꞌi ꞌo ai he pōhāhā te meꞌe o roto i a koe ꞌe he manaꞌu e koe he mōrī.

³⁶ Mo ai he mōrī nō te meꞌe o roto i tuꞌu hakari, he haka māꞌeha i tuꞌu manaꞌu mo takeꞌa riva-riva i te meꞌe taꞌatoꞌa, pa he takeꞌa iŋa o te meꞌe ꞌi te māꞌeha o te hakariꞌi».

Te huru o te ⌊fariseo⌋ ꞌe o te ⌊maꞌori o te haka tere hūrio⌋

³⁷ I oti era te vānaŋa ꞌa Ietū, he kī e te taŋata fariseo e tahi mo oho mo kai ꞌi tōꞌona hare. I tuꞌu era a Ietū, he uru he noho ꞌi ruŋa i te ꞌamuramaꞌa.

³⁸ He māere tū fariseo era o te taꞌe aŋa o Ietū i te meꞌe rava māhani aŋa e te ⌊hūrio⌋ mo haka tano ki te rāua haka tere iŋa, he hopu i te rima ꞌi raꞌe ꞌe ꞌai ka noho iho ꞌi ruŋa i te ꞌamuramaꞌa mo kai.

³⁹ He kī ia e Ietū: —A kōrua te fariseo e haka tuꞌu rō ꞌana pa he nuꞌu tano ki te mata o te ꞌAtua, ꞌe te parautiꞌa, te kōrua roto e ꞌī rō ꞌā e te meꞌe ꞌino ꞌe e te pohe mo toke, pa he hapaina ꞌo pa he mareti tata e kōrua a te haho nō.

⁴⁰ »¡E te maꞌa-maꞌa ē! ¿Kai ꞌite ꞌana ꞌō kōrua: o te kope ꞌāꞌana i aŋa i te haho i aŋa takoꞌa i te roto?

⁴¹ ꞌO ira, e vaꞌai ki te nuꞌu veve i te meꞌe hai manaꞌu riva-riva; pē ira ana takeꞌa i te maꞌitaki o te roto ꞌe o te haho.

⁴² »¡Ko te ꞌaroha i a kōrua, e te fariseo ē! O roto o te hoꞌe ꞌahuru ꞌapa o te meꞌe haka ꞌeo kai ꞌe o te tētahi atu meꞌe ꞌoka mo kai, e haꞌataꞌa ena e tahi o rā ŋā ꞌapa mo te ꞌAtua, pa he meꞌe kī ꞌi ruŋa i te ⌊haka tere iŋa ꞌa Mōtē⌋. Ka ai atu pē ira, ꞌina kōrua he aŋa i te meꞌe haŋa mau e ia, ko te meꞌe ena: he aŋa i te meꞌe tī-tika ꞌe he haŋa ki a ia. He ŋā meꞌe nei te meꞌe o kōrua mo aŋa, ꞌe ꞌina ko taꞌe aŋa te meꞌe raꞌe era.

⁴³ »¡Ko te ꞌaroha i a kōrua, e te fariseo ē! Nuꞌu haŋa kōrua mo noho ꞌi ruŋa i te pepe o te nuꞌu ra-rahi o roto o te ⌊hare pure hūrio⌋, haŋa takoꞌa mo ꞌaroha e te taŋata ꞌi te ara pa he ꞌariki.

⁴⁴ »¡Ko te ꞌaroha i a kōrua! Pa he kona tanu pāpaku kōrua rei-rei e te taŋata ꞌi te taꞌe tāpaꞌo ꞌe ꞌi te taꞌe ꞌite ꞌi raro e ai rō ꞌana te meꞌe piro.

⁴⁵ He kī ia e te maꞌori e tahi o te haka tere hūrio: —E te Maꞌori, taꞌa meꞌe kī ena e taꞌe haka au mai ꞌā i a mātou takoꞌa.

⁴⁶ He kī e Ietū: —¡Ko te ꞌaroha i a kōrua takoꞌa, e te maꞌori o te haka tere hūrio ē! E ꞌata haka ꞌamo ena e kōrua i te roŋo ki te nuꞌu mo haꞌatura, he meꞌe e ko ravaꞌa mo ꞌamo ꞌi te paŋahaꞌa, ꞌe a kōrua ꞌina he aŋa e tahi meꞌe mo haka rehe ꞌiti i te paŋahaꞌa.

⁴⁷ »¡Ko te ꞌaroha i a kōrua! E haka nehe-nehe ena i te kona tanu i te perofeta tiŋaꞌi e te kōrua tupuna.

⁴⁸ Pē ira e ꞌite ena e tano mau rō ꞌā mo kōrua te meꞌe aŋa e rāua; o rāua, paꞌi, i tiŋaꞌi, ꞌe o kōrua i haka nehe-nehe i te kona tanu.

⁴⁹ »ꞌO ira te ꞌAtua hai mārama-rama i kī ai: “E uŋa rō au i te perofeta ꞌe i te ⌊ꞌāpōtoro⌋, ꞌe e tiŋaꞌi e haka mate rō e rāua i te tētahi ꞌe i te tētahi atu e tū-tute rō mo tōtōā”.

⁵⁰ Ki te nuꞌu o te hora nei ka haka ꞌauhau ena e te ꞌAtua i te toto raŋa o te perofeta taꞌatoꞌa mai te haꞌamata iŋa o te ao,

⁵¹ mai te toto o ⌊ꞌĀvere⌋ ꞌātā ki te toto o Taharia tiŋaꞌi haka mate i te oꞌo iŋa o te ⌊Kona Moꞌa⌋ o te Hare o te ꞌAtua ꞌi tuꞌa o te fata. ꞌĪ a au he kī atu: te mate era o rā nuꞌu e haka ꞌauhau tahi rō e te ꞌAtua ki te nuꞌu o te hora nei.

⁵² »¡Ko te ꞌaroha i a kōrua, e te maꞌori o te haka tere hūrio ē!, toꞌo mo kōrua i te tāviri mātaki i te ꞌōpani uru ki te ara parautiꞌa o te ꞌAtua. ꞌE, a kōrua mau ena ꞌā ꞌina he uru ꞌe, takoꞌa, ꞌina he haka rē mo uru i te taŋata e haŋa rō ꞌā mo uru.

⁵³ I eꞌa era a Ietū mai ira, he riri rō atu ꞌai te nuꞌu maꞌori o te haka tere hūrio ꞌe te fariseo. ꞌE mai rā mahana he haꞌamata e rā nuꞌu he haka tāika hai haka ꞌui-ꞌui ki a Ietū

⁵⁴ mo ravaꞌa, hai vānaŋa kī e ia, i te ꞌōtohe mo ꞌa-ꞌaru.