Ruka 10 - Rapa Nui

He uŋa iŋa o Ietū i tāꞌana nuꞌu hāpī

¹ I oti era he haꞌataꞌa e Ietū e hitu ꞌahuru mā piti nuꞌu hāpī haka ꞌou ꞌāꞌana, ꞌai ka uŋa hoko rua hoko rua ꞌi raꞌe ki a ia ki te kona taꞌatoꞌa ōꞌona ka tuꞌu era

² koia ko kī: «Te parautiꞌa, nuꞌu rahi te nuꞌu mo toꞌo mo roto i te ⌊haka tere iŋa ꞌāpī o te ꞌAtua⌋, pa he kato iŋa o te kai, ꞌe nuꞌu taꞌe rahi te nuꞌu o rāua te kato. ꞌO ira, ka ani ki te kope ꞌāꞌana te kai, he ꞌAtua, mo ꞌata uŋa hai nuꞌu mo kato.

³ Ka oho; e ꞌite: e uŋa ꞌana a au i a kōrua pa he māmoe ki roto i te nūnaꞌa paiheŋa taehae.

⁴ »ꞌIna ko maꞌu i te moni, i te kirivaꞌe mo mono, ꞌe hai meꞌe mo te ara, ꞌe ꞌina ko noho ana ꞌaroha ki te nuꞌu ꞌi te ara.

⁵ Hare era o kōrua mo tuꞌu, te meꞌe raꞌe, e ꞌaroha pē nei ē: “Ka ai te haumārū ꞌi te hare nei”.

⁶ ꞌE mo ai o te nuꞌu haumārū o nā hare, te kōrua ꞌaroha he tano; ꞌe mo taꞌe ai pē ira, e ko hauhaꞌa te kōrua ꞌaroha.

⁷ Hare era mo toꞌo i a kōrua, e noho ꞌi ira, ꞌe ꞌina ko oho ki hare era ki hare era. E kai ꞌe e unu i te meꞌe mo vaꞌai atu; te taŋata aŋa, paꞌi, e ꞌauhau rō ꞌā.

⁸ »Ka tuꞌu ena kōrua ki te kona e haŋa rō atu ꞌana te nuꞌu, e kai te meꞌe mo vaꞌai atu.

⁹ E haka ora te nuꞌu māui-ui o nā kona ꞌe ꞌai ka kī rō: “Te haka tere iŋa ꞌāpī o te ꞌAtua nā ko hāhine mai ꞌā”.

¹⁰ »ꞌE, ka tuꞌu ena kōrua ki te kona ꞌina he nuꞌu o ira he haŋa mo haka roŋo atu, ka eꞌa ki te ara ꞌai ka kī rō:

¹¹ “¡Te puŋaꞌehu o te kona nei puhia mai ki ruŋa i te mātou vaꞌe ꞌī e mātou he tū-tū mo ꞌite e kōrua pē nei ē: te ūtuꞌa o te ꞌAtua ka topa atu ena, i a kōrua ꞌā! ꞌE, e ꞌite takoꞌa: te haka tere iŋa ꞌāpī o te ꞌAtua nā ko hāhine mai ꞌana”.

¹² ꞌĪ a au he kī atu: te ūtuꞌa mo rā nuꞌu, ꞌi te mahana o te haka ūtuꞌa, ꞌata hau rō atu ki te ūtuꞌa mo te nuꞌu taꞌe tano o ⌊Tōroma⌋.

He ture iŋa o Ietū

¹³ »¡Ko te ꞌaroha i a kōrua, e te nuꞌu o Koratini ē, ꞌe o Vetetaira ē! ꞌĀhani ꞌi Tiro ꞌe ꞌi Tīrone i takeꞌa ai te mana aŋa atu era ki a kōrua, ko ⌊huri nō era ꞌana te nuꞌu o ira i te rāua manaꞌu ki te ꞌAtua⌋ ꞌe ko haka takeꞌa nō era ꞌā hai noho ꞌi roto i te ꞌeo-ꞌeo e uru rō ꞌana i te kahu i aŋa hai pūtē tore.

¹⁴ ꞌE, ꞌi te mahana o te ture hopeꞌa o te ꞌAtua, te ūtuꞌa mo kōrua ꞌata hau rō atu ki te ūtuꞌa mo te nuꞌu o Tiro ꞌe o Tīrone.

¹⁵ »ꞌE a kōrua, e te nuꞌu o Kaperenāū ē, ¿e manaꞌu ena e maꞌu rō i a kōrua ki te raŋi? ¡Ki raro nui era o te pōꞌauahi ka ava ena!».

¹⁶ He kī ia e Ietū ki tāꞌana nuꞌu hāpī: «Te nuꞌu haka roŋo atu e haka roŋo mai ꞌana; te nuꞌu taꞌe haŋa atu e taꞌe haŋa mai ꞌana; ꞌe te nuꞌu taꞌe haŋa mai e taꞌe haŋa ꞌana ki te kope uŋa mai i a au».

He hoki iŋa o tū nuꞌu era e hitu ꞌahuru mā piti

¹⁷ Tū nuꞌu era e hitu ꞌahuru mā piti e koa rō ꞌana i hoki ai, he kī: —¡E Ietū, ꞌātā ki te tātane i haka roŋo mai ai ꞌi te hora kī o mātou mo eꞌa mai roto i te taŋata hai ꞌīŋoa ōꞌou!

¹⁸ He kī e Ietū: —ꞌĒ-ē, i takeꞌa rō e au i a Rukifero te viri iŋa mai te raŋi pa he ꞌuira.

¹⁹ I vaꞌai rō atu a au i te pūai mo haꞌere o kōrua a ruŋa i te kōreha veneno ꞌe a ruŋa i te veriꞌārahu. I vaꞌai takoꞌa rō atu a au i te pūai mo rē o kōrua ki te meꞌe taꞌatoꞌa aŋa atu e Rukifero. Pē ira i taꞌe topa atu ai e tahi ꞌati.

²⁰ ꞌE, ka ai atu pē ira, te meꞌe o kōrua mo koa: ko pāpaꞌi ꞌā te kōrua ꞌīŋoa ꞌi te raŋi, taꞌe ꞌō ko haka roŋo atu ꞌā te tātane.

He Poki mau nō te meꞌe ꞌite ko ai te Matuꞌa

²¹ ꞌI rā hora, ꞌi te ꞌī o Ietū e te ⌊Vārua Maitai⌋, he toꞌo rō atu ꞌai te koa ꞌe he kī: «He haꞌahana-hana atu a au ki a koe, e Koro, e te ꞌAtua o te raŋi ꞌe o te henua ē, ꞌo te taꞌe haka takeꞌa ōꞌou i taꞌa meꞌe naꞌa ki te nuꞌu manaꞌu ko rāua mau nō te nuꞌu ꞌite ꞌe mārama-rama, ꞌe ki te nuꞌu pa he ŋā poki a koe i haka takeꞌa ai. ꞌĒ-ē, pē ira mau ꞌā koe i haŋa ai, e Koro ē».

²² He kī ia e Ietū ki te nuꞌu: «Ko vaꞌai tahi mai ꞌana te meꞌe taꞌatoꞌa e tōꞌoku Matuꞌa. ꞌIna e tahi taŋata i ꞌite ko ai te Poki, he Matuꞌa mau nō, ꞌe ꞌina e tahi taŋata i ꞌite ko ai te Matuꞌa, he Poki ꞌe he nuꞌu haŋa mau nō e te Poki mo haka ꞌite».

²³ I oti era he hārui he uꞌi a ruŋa i tāꞌana nuꞌu hāpī ꞌe he kī ki rā nuꞌu nō: «Ko te koa i te nuꞌu takeꞌa i te meꞌe takeꞌa ena e kōrua.

²⁴ ꞌĪ a au he kī atu: meꞌe rahi perofeta ꞌe ꞌariki i haŋa mo takeꞌa i te meꞌe takeꞌa e kōrua, ꞌe ꞌina kai takeꞌa; i haŋa mo ŋaroꞌa i te meꞌe ŋaroꞌa e kōrua ꞌe ꞌina kai ŋaroꞌa».

He taŋata riva e tahi o ⌊Tāmāria⌋

²⁵ He oho e tahi ⌊maꞌori o te haka tere hūrio⌋ he vānaŋa ararua ko Ietū mo haka ꞌatu pē hē ka pāhono era, he ꞌui: —E te Maꞌori, ¿he aha tāꞌaku meꞌe mo aŋa mo ravaꞌa e au i te ora ꞌāpī ꞌina he hopeꞌa raꞌa vaꞌai e te ꞌAtua?

²⁶ He pāhono e Ietū: —¿Pē hē e hāꞌaki ena ꞌi ruŋa i te meꞌe pāpaꞌi e ⌊Mōtē⌋? ¿He aha taꞌa meꞌe i taiꞌo?

²⁷ He pāhono e tū taŋata era: —«E haŋa koe ki tuꞌu ꞌAtua hai haŋu taꞌatoꞌa o tuꞌu māhatu, o tuꞌu vārua, o tuꞌu pūai ꞌe o tuꞌu manaꞌu taꞌatoꞌa»; ꞌe «e haŋa ki te rua taŋata pa he haŋa iŋa ena ꞌā ōꞌou ki a koe mau ꞌā».

²⁸ He kī e Ietū: —Ko tano ꞌā taꞌa pāhono. Mo aŋa ōꞌou pē ira, he ravaꞌa e koe te ora ꞌāpī ꞌina he hopeꞌa raꞌa.

²⁹ ꞌE, ꞌi te haŋa o tū kope era mo haka takeꞌa i a ia pa he taŋata tano, he ꞌui ki a Ietū: —¿Ko ai hō te rua taŋata mo haŋa e au?

³⁰ He pāhono e Ietū: «E tahi taŋata ⌊hūrio⌋ he eꞌa he oho a te ara mai Hērutarema ki Herikō. He piri te nuꞌu toke-toke, he toke i tāꞌana meꞌe taꞌatoꞌa koia ko te kahu uru. He toꞌo mai he tiŋaꞌi ki te piꞌi-piꞌi. I oti era he hoa ꞌe he eꞌa he tē-tere.

³¹ »I oho era he vari te ⌊oromatuꞌa⌋ hūrio e tahi a rā kona. I takeꞌa era i rā taŋata, ꞌina kai hāꞌūꞌū; he haka tapa ꞌe he eꞌa he oho rō ꞌai.

³² He tuꞌu takoꞌa ki rā kona e tahi taŋata ⌊rēvita⌋, i uꞌi takoꞌa nō, ꞌe he eꞌa he oho rō ꞌai.

³³ »He vari ia te taŋata e tahi o Tāmāria. I takeꞌa era i rā kope he haka ꞌaroha.

³⁴ He haka hāhine ki tū taŋata era, he rāꞌau hai ꞌava ꞌe hai mōrī, ꞌe he viri hai tapa kahu i te more. I oti era he haka eke ki ruŋa i te muni, he maꞌu he oho ki te hare e tahi ꞌe he noho he hāpaꞌo.

³⁵ »ꞌI te rua mahana, he vaꞌai ki te taŋata era ōꞌona rā hare e rua ⌊renario⌋, he kī: “Ka hāpaꞌo koe i te taŋata nei. Mo ꞌata pau ōꞌou, māꞌaku e ꞌauhau atu ki hoki haka ꞌou mai a au”».

³⁶ He ꞌui ia e Ietū: —Ki taꞌa kī, ¿ko ai o roto o te ŋāŋata era hoko toru i haŋa ki tū taŋata toke era e te nuꞌu?

³⁷ He pāhono e tū taŋata maꞌori haka tere hūrio era: —Ko te taŋata haka ꞌaroha era i a ia. He kī e Ietū: —Ka oho ia koe ka aŋa takoꞌa pē ira.

A Ietū ꞌi te hare o Maratuka

³⁸ He oho ia a Ietū ꞌi tōꞌona ara ꞌātā ka tuꞌu rō ki te kona e tahi ꞌi ira e noho era te viꞌe ko Maratuka te ꞌīŋoa. He haka noho e rā viꞌe i a Ietū ꞌi tōꞌona hare.

³⁹ A Maratuka e ai rō ꞌā tōꞌona taina vahine ko ⌊Māria⌋ te ꞌīŋoa. A ia i noho ai ꞌi te vaꞌe o Ietū e haka roŋo ꞌana i tāꞌana vānaŋa.

⁴⁰ ꞌE, a Maratuka, ꞌi te rahi o te aŋa, he haka hāhine ki a Ietū, he kī: —E Ietū, ¿ꞌina ꞌō koe he haka ꞌaroha i a au? Tōꞌoku taina ena ko haka rē tahi mai ꞌana i te aŋa ki a au. Ka kī mo hāꞌūꞌū mai.

⁴¹ He pāhono e Ietū: —E Maratuka, ko te ꞌaroha i a koe. ¿He aha e haka ŋāruru-ruru tahaŋa ena i tuꞌu pūꞌoko hai ŋā meꞌe taꞌatoꞌa ena?

⁴² E tahi mau nō meꞌe hopeꞌa o te riva-riva, ꞌe ko rā meꞌe te meꞌe haŋa ꞌa Māria, ꞌe ꞌina e tahi kope mo ravaꞌa mo toꞌo i rā meꞌe mai i a ia.