Meꞌe Haka Takeꞌa 19 - Rapa Nui

¹ I oho era he ŋaroꞌa e au i te reꞌo pūai o te nuꞌu riꞌa-riꞌa e kī ꞌā ꞌi te raŋi: «¡Ki haꞌahana-hana tahi tātou i te ꞌAtua! I a ia te eꞌa iŋa o tātou mai roto i te ūtuꞌa o te hara ꞌe te ravaꞌa iŋa i te ora ꞌāpī ꞌina he hopeꞌa raꞌa. I a ia takoꞌa te nui-nui ꞌe te pūai taꞌatoꞌa.

² A ia e ture ena hai tī-tika ꞌe hai parautiꞌa. Ko haka ūtuꞌa ꞌana i tū taiꞌo ꞌite era e te nuꞌu. Hai ia, paꞌi, te taŋata taꞌatoꞌa o te ao i aŋa ai i te meꞌe taꞌe tano. Ko haka ūtuꞌa ꞌana i a ia, ꞌo te tiŋaꞌi ꞌo te haka mate i te tāvini o te ꞌAtua».

³ He ŋaroꞌa haka ꞌou e au i te reꞌo o tū nuꞌu era e kī ꞌā: «¡Ki haꞌahana-hana tahi tātou i te ꞌAtua! Te ꞌau o te ahi tutu era i tū taiꞌo era e ko kore ki te hora hopeꞌa».

⁴ He tū-turi ia te ŋāŋata ra-rahi era e piti ꞌahuru mā maha ꞌe te ŋā meꞌe ora era e hā ꞌātā ka topa rō te tira ki raro ꞌe he haꞌamuri ki te ꞌAtua ꞌi ruŋa i tōꞌona pepe ꞌariki. He kī: «¡He aŋi ꞌā to kōrua! ¡Ki haꞌahana-hana tahi tātou i te ꞌAtua!».

⁵ ꞌE mai te kona pepe noho ꞌariki era i ŋaroꞌa mai ai te reꞌo e tahi e kī ꞌā: «¡Ka haꞌahana-hana kōrua ki te tātou ꞌAtua, e te nuꞌu taꞌatoꞌa moꞌa ꞌe aŋa ki a ia ē, ka hōnui ꞌe ka taꞌe hōnui!».

He hīmene haꞌahana-hana

⁶ He ŋaroꞌa takoꞌa e au i te reꞌo o te nuꞌu rahi tuꞌu pa he heruru ena o te vai topa mai te kona ruŋa nui ꞌe pa he heruru pūai o te pātiri e kī era: «¡Ki haꞌahana-hana tahi tātou i te ꞌAtua! Ko haꞌamata ꞌā, paꞌi, ko haka tere ꞌā te tātou Pūꞌoko Haka Tere, te tātou ꞌAtua hopeꞌa o te pūai.

⁷ Ki koa tahi tātou; ki haꞌahana-hana tātou i a ia ꞌo tōꞌona pūai nui-nui. Ko tano ꞌana, paꞌi, te hora mo te hāipo-ipo o te Māmoe. Ko haka riva-riva ꞌā tāꞌana viꞌe:

⁸ ko uru ꞌana hai kahu vaꞌai ki a ia, kahu aŋa hai rino hopeꞌa o te riva-riva, kahu maꞌitaki ꞌe pura-pura». Te haꞌaauraꞌa o te kahu nei: he meꞌe riva-riva aŋa e te nuꞌu haꞌataꞌa e te ꞌAtua māꞌana.

⁹ He kī mai ia e te merahi: «Ka pāpaꞌi: “Ko te koa i te nuꞌu kī mo oho ki te kai o te hāipo-ipo o te Māmoe”». ꞌE he kī haka ꞌou mai: «Te vānaŋa nei he vānaŋa parautiꞌa o te ꞌAtua».

¹⁰ He tū-turi ia a au a te vaꞌe o rā merahi mo haꞌamuri, ꞌe tē rā ia ka kī mai: «ꞌIna koe ko aŋa i te meꞌe ena; ki te ꞌAtua koe ana haꞌamuri. He tāvini nō, paꞌi, a au o te ꞌAtua pē koe ꞌe pē tuꞌu ŋā taina era, nuꞌu taꞌe haka tapa mai te hāpī parautiꞌa haka ꞌite e Ietū». Te hāpī nei ꞌa Ietū he meꞌe i haka ꞌite e te perofeta hai ⌊Vārua Maitai⌋.

He rē iŋa o te kope o ruŋa i te hoi

¹¹ He uꞌi atu a au e ha-hata rō ꞌā te raŋi ꞌe he takeꞌa mai te hoi tea-tea e tahi. Te ꞌīŋoa o te kope o ruŋa: «He Kope Aŋa i Tāꞌana Meꞌe Kī» ꞌe «He Kope Parautiꞌa»; hai tī-tika, paꞌi, e haka tere ena i a ia ꞌi te hora kī i te tano ꞌe i te taꞌe tano o te taŋata ꞌe pē ira ꞌā ꞌi te hora o te tamaꞌi.

¹² Tōꞌona mata pa he ura ena o te ahi; e puꞌa rō ꞌā ꞌi te pūꞌoko meꞌe rahi nō atu hei. ꞌI ruŋa i a ia e pāpaꞌi rō ꞌā te ꞌīŋoa e tahi ko ia mau nō te meꞌe i ꞌite i te haꞌaauraꞌa.

¹³ ꞌE tōꞌona ꞌīŋoa takoꞌa: «He Vānaŋa o te ꞌAtua». Te kope nei e uru rō ꞌana i te kahu ko haka ruku ꞌā ꞌi roto i te toto.

¹⁴ ꞌI tuꞌa i a ia e oho atu era te vaꞌehau o te raŋi ꞌi ruŋa i te rāua hoi tea-tea e uru rō ꞌā i te kahu rino tea-tea hopeꞌa o te riva-riva ꞌe maꞌitaki.

¹⁵ Mai roto i te haha o rā kope e eꞌa era te hoe roa-roa kaꞌi-kaꞌi e tahi, ꞌe hai rā hoe ka rē ena ki te taŋata o te henua taꞌatoꞌa. ꞌI tōꞌona haka tere iŋa e haka ūtuꞌa rō i te nuꞌu taꞌatoꞌa taꞌe haꞌatura ki a ia, ꞌe e haka takeꞌa rō i te riri taparahi-taꞌata o te ꞌAtua hopeꞌa o te pūai mo te nuꞌu taꞌe haŋa ki a ia, pa he rei-rei iŋa ena i te vino mo te ꞌava.

¹⁶ ꞌI ruŋa i tōꞌona kahu ꞌe ꞌi ruŋa i tōꞌona hūhā e pāpaꞌi rō ꞌā te ꞌīŋoa nei: «He ꞌAriki o te ꞌariki, he Pūꞌoko Haka Tere o te pūꞌoko haka tere taꞌatoꞌa».

He rē iŋa ki te manuꞌino

¹⁷ I oho era he takeꞌa e au i te merahi e tahi e māroa rō ꞌā ꞌi ruŋa i te raꞌā e ohu pūai ꞌā ki te taꞌatoꞌa manu rere ꞌi vāeŋa o te raŋi, manu kai kiko o te meꞌe mate pē nei ē: «¡Ka oho mai kōrua ka haka taka-taka tahi mo kai i te kai nui-nui o te ꞌAtua,

¹⁸ mo kai i te kiko o te ꞌariki, o te kape o te vaꞌehau, o te taŋata haka kē, o te hoi, o te kope eke o ruŋa, o te taꞌatoꞌa nō: o te nuꞌu ꞌekaravo, o te nuꞌu taꞌe he ꞌekaravo, o te nuꞌu hōnui, ꞌe o te nuꞌu taꞌe hōnui!».

¹⁹ He takeꞌa ia e au i tū manuꞌino taparahi-taꞌata eꞌa era mai roto i te vaikava ꞌe i te ꞌariki o te ao koia ko te rāua vaꞌehau e taka-taka tahi rō ꞌana mo tamaꞌi ki tū kope era o ruŋa i te hoi ꞌe ki tōꞌona vaꞌehau.

²⁰ Te manuꞌino nei ko ꞌa-ꞌaru ꞌā, ꞌe ko ꞌa-ꞌaru takoꞌa ꞌā tū perofeta reo-reo aŋa era ꞌi muꞌa i rā manuꞌino i te mana ꞌe i te tētahi atu meꞌe mo māere o te taŋata. Hai ŋā meꞌe nei i haka rē ai te nuꞌu i a rāua mo tāpaꞌo hai tāpaꞌo o te manuꞌino, ꞌe i haꞌamuri ai i te ꞌītoro aŋa pē ia. I oho era he toꞌo mai he hoa ora i rā manuꞌino ꞌe i rā perofeta reo-reo era ki roto i te pōꞌauahi, kona ꞌi ira e ura ena te azufre.

²¹ ꞌE te nuꞌu moto era ꞌi muri i a rāua i mā-mate ai ꞌi te hoe eꞌa mai roto i te haha o tū kope era o ruŋa i te hoi, ꞌe te manu taꞌatoꞌa kai kiko o te meꞌe mate i kai ai ki te ŋāꞌaha-ꞌaha o te kōpū.