Meꞌe Haka Takeꞌa 18 - Rapa Nui

He haka pararaha iŋa o ⌊Vāvīrōnia⌋

¹ I oti era te meꞌe nei, he takeꞌa e au i te merahi tōroꞌa nui-nui e tahi ka topa mai te raŋi. He māꞌeha ia te henua taꞌatoꞌa ꞌi te pūai o tōꞌona ꞌana-ꞌana.

² ꞌE hai reꞌo pūai i kī ai: «¡Ko haka pararaha ꞌā te kona nui-nui era ko Vāvīrōnia! ¡Ko riro ꞌā he kona noho o te tātane, he hare o te tiꞌaporo, hakapupa o te rauhuru atu manu rere kai i te meꞌe hano-hano ꞌe he ꞌana o te ꞌanimare taparahi-taꞌata!

³ Te nuꞌu o te henua taꞌatoꞌa ꞌe te ꞌariki o te kona taꞌatoꞌa ko taꞌero ꞌā ꞌi te aŋa ꞌāꞌana, te auraꞌa, ko haka rē ꞌana i a rāua mo haka tere e te meꞌe taꞌe tano aŋa e ia, he haꞌamuri ki te meꞌe taꞌe he ꞌAtua parautiꞌa. ꞌE te nuꞌu hoꞌo meꞌe o te ao ko ꞌono ꞌā ꞌi te rava hoꞌo e rā viꞌe i tāꞌana meꞌe haŋa ꞌina he hāito».

⁴ He ŋaroꞌa ia e au i te reꞌo haka ꞌou e tahi ꞌi te raŋi e kī ꞌā: «Ka eꞌa kōrua mai te kona ena, e te nuꞌu haꞌataꞌa māꞌaku ē, ꞌo hara kōrua ꞌe ꞌo topa takoꞌa atu te ꞌati ka topa ena ki a ia.

⁵ Tōꞌona hara, paꞌi, ko papa ko iri ꞌā ꞌātā ki te raŋi, ꞌe ꞌina he rehu i te ꞌAtua tāꞌana meꞌe taꞌe tano aŋa».

⁶ He ŋaroꞌa haka ꞌou ia e au i tū reꞌo era e kī ꞌā: «Ka haka hoki ki a ia, e rua haka hoki iŋa, te meꞌe taꞌe tano aŋa era e ia ki te rua. Ka ꞌānoꞌi ka haka pūai te ꞌava mo haka unu ki a ia ki te ꞌava haka unu era e ia ki te rua.

⁷ Ka vaꞌai hai ꞌati ꞌe hai māui-ui ki roto i te ivi, pa he rahi o te teꞌo-teꞌo iŋa ōꞌona, ꞌe pa he rahi o te reka ꞌe o te koa ŋaroꞌa e ia ꞌi tōꞌona noho iŋa era ꞌina he meꞌe haŋa toe. Te viꞌe era he kī nō te aŋa ꞌi roto i tōꞌona māhatu: “A au e noho nei ꞌi te kona nei pa he ꞌariki; taꞌe a au he hove, ꞌe e ko topa mai te ꞌati ki a au”.

⁸ ꞌO ira, ꞌi te mahana mau nō e tahi ka tuꞌu ena te ꞌati mōꞌona: he maruaki, he māui-ui māhatu ꞌe he mate, ꞌe he tutu ꞌi roto i te ahi. E pūai rō ꞌā, paꞌi, te ꞌAtua haka ūtuꞌa i a ia».

⁹ Te ꞌariki taꞌatoꞌa moe era i rā viꞌe koa era ananake ꞌi te aŋa i te meꞌe taꞌe tano e ta-taŋi rō ꞌe e ꞌau-auē rō ka takeꞌa era i te ꞌau, ꞌi te hora e tutu ꞌā i rā viꞌe.

¹⁰ ꞌI te riꞌa-riꞌa ꞌo haka ūtuꞌa takoꞌa i a rāua, mai kōnui ꞌā ka kī era: «¡Ko te ꞌaroha i a koe, e te kona nui-nui ē, e te kona hopeꞌa o te pūai ko Vāvīrōnia ē! ꞌI te hora mau nō e tahi i topa atu ai te ūtuꞌa ꞌi ruŋa i a koe».

¹¹ ꞌE te nuꞌu hoꞌo meꞌe o te ao e taŋi takoꞌa rō ꞌe e ꞌau-auē rō; ꞌina he kope toe, paꞌi, mo hoꞌo i te rāua taoꞌa:

¹² he piru, he parata, he māꞌea hopeꞌa o te nehe-nehe, he poe, he kahu hopeꞌa o te riva-riva aŋa hai rino ꞌe hai sea, tōꞌona kōrore moana ꞌapa mea ꞌe mea-mea; he rauhuru miro ꞌeo; he meꞌe aŋa hai tara erefani, hai miro nehe-nehe, hai ꞌaurī, ꞌe hai māꞌea nehe-nehe;

¹³ he kānera, ꞌe he meꞌe mo haka ꞌeo, he incienso, he manoꞌi, he tāpau miro, he ꞌava, he mōrī, he haraoa mata hopeꞌa o te riva-riva, he tariko, he ꞌanimare haka ꞌamo taoꞌa, he māmoe, he hoi, he pereꞌoa, ꞌe ꞌātā he taŋata hoꞌo mo ꞌekaravo.

¹⁴ Pē nei ka kī era: «¡Taꞌu meꞌe taꞌatoꞌa riva-riva haŋa era e ko ravaꞌa haka ꞌou e koe; ko ŋaro tahi ꞌana! ¡ꞌIna toe tū kai haŋa rahi era ꞌāꞌau, ꞌe te ŋā meꞌe hopeꞌa era o te hauhaꞌa mo haka nehe-nehe i a koe!».

¹⁵ Te nuꞌu nei, nuꞌu i ꞌono hai rā kona, ꞌi kōnui ka noho era ꞌi te riꞌa-riꞌa ꞌo haka ūtuꞌa takoꞌa i a rāua, ꞌe mai ira ka taŋi ꞌe ka ꞌau-auē era

¹⁶ koia ko kī: «¡Ko te ꞌaroha ꞌō i a koe! E uru era koe hai kahu hopeꞌa o te riva-riva aŋa hai rino, kahu kōrore moana ꞌapa mea ꞌe mea-mea, e haka nehe-nehe era hai piru, hai poe ꞌe hai māꞌea hopeꞌa o te nehe-nehe.

¹⁷ ¡ꞌE ꞌi te hora mau nō e tahi i haka kore tahi ai te hauhaꞌa taꞌatoꞌa ena ōꞌou!». Te kape pahī, te nuꞌu oho ꞌi ruŋa i te pahī, te mataroa ꞌe te nuꞌu aŋa ꞌi roto i te vaikava taꞌatoꞌa he noho ꞌi kōnui era.

¹⁸ I takeꞌa era ko vera ꞌā rā kona ꞌe ko eꞌa ꞌā te ꞌau, he ꞌau-auē koia ko kī: «¡Ko te ꞌaroha ꞌō; ꞌina he rua kona pa he kona nui-nui era!».

¹⁹ He huri ia i te rāua pūꞌoko hai puŋaꞌehu ꞌōꞌone koia ko taŋi e kī era: «¡Ko topa ꞌana te meꞌe taparahi-taꞌata ki tū kona nui-nui era, kona haka ꞌono era i a tātou taꞌatoꞌa i te nuꞌu tere vaikava! ¡ꞌE ꞌi te hora mau nō, paꞌi, e tahi i haka kore tahi ai!

²⁰ ¡Ka koa kōrua, e te meꞌe taꞌatoꞌa noho ꞌi te raŋi ē! ¡ꞌE ka koa kōrua, e te nuꞌu haꞌataꞌa e te ꞌAtua māꞌana ē, e te ⌊ꞌāpōtoro⌋ ē, ꞌe e te perofeta ē! Ko haka ūtuꞌa ꞌana, paꞌi, e te ꞌAtua i te kona era, ꞌo te meꞌe taꞌe tano aŋa atu ki a kōrua».

²¹ I oho era he maꞌu e te merahi pūai e tahi i te māꞌea nui-nui pa he māꞌea oro tariko a ruŋa, he ava ki roto i te vaikava ꞌe he kī: «¡Pē nei ka haka kore ena i a koe, e te kona nui-nui ko Vāvīrōnia ē, ꞌe ꞌina koe e ko takeꞌa haka ꞌou e te taŋata!

²² ¡E ko ŋaroꞌa haka ꞌou te peho o te koneta, o te arpa ꞌe o te puhi ꞌi tuꞌu ara ena! ¡E ko ai haka ꞌou i a koe te nuꞌu aŋa i te rauhuru meꞌe, ꞌe ꞌina takoꞌa e ko ŋaroꞌa haka ꞌou te heruru o taꞌu māꞌea oro tariko ena!

²³ Ki te hora hopeꞌa e ko māꞌeha haka ꞌou koe ꞌi te mōrī o te hakariꞌi, ꞌe e ko ŋaroꞌa haka ꞌou te peho o te ŋoŋoro hāipo-ipo ꞌi tuꞌu ara ena, ꞌi te meꞌe era te nuꞌu hoꞌo meꞌe ꞌāꞌau, he nuꞌu pūai o te ao, ꞌe a koe, hai tahu-tahu ena ꞌāꞌau, e reo-reo era ki te taŋata taꞌatoꞌa».

²⁴ I haka ūtuꞌa ai e te ꞌAtua i tū kona nui-nui era ko Vāvīrōnia ꞌo te ai hai ia i tehe ai te toto o te perofeta, o te nuꞌu haꞌataꞌa e te ꞌAtua māꞌana, ꞌe o te nuꞌu taꞌatoꞌa o te ao mate ꞌi te rua.