Meꞌe Haka Takeꞌa 15 - Rapa Nui

E hitu merahi ꞌe e hitu ꞌati

¹ He takeꞌa ia e au ꞌi te raŋi i te meꞌe haka ꞌou e tahi mo māere o te taŋata: he merahi e hitu i a rāua te parau mo haka tano i te ꞌati hopeꞌa e hitu o te ꞌAtua. Hai ŋā ꞌati nei ka haka mao ena te riri o te ꞌAtua.

² He takeꞌa takoꞌa e au te meꞌe tuꞌu pa he vaikava aŋa hai hiꞌo e ꞌānoꞌi rō ꞌana hai ahi. ꞌI muri o rā kona e māroa rō ꞌā te nuꞌu rē ki tū manuꞌino eꞌa era mai roto i te vaikava, ki te ꞌītoro aŋa pē ia ꞌe ki te nūmera o tōꞌona ꞌīŋoa. E maꞌu-maꞌu rō ꞌana i te arpa i vaꞌai e te ꞌAtua.

³ E hīmene ꞌana i te hīmene o te tāvini o te ꞌAtua ko ⌊Mōtē⌋ ꞌe i te hīmene o te Māmoe pē nei ē: «Meꞌe nui-nui ꞌe nehe-nehe te meꞌe taꞌatoꞌa aŋa e koe, e te mātou Pūꞌoko Haka Tere, e te mātou ꞌAtua hopeꞌa o te pūai ē. Te haka tere iŋa ōꞌou ananake ko te taŋata haka tere iŋa tī-tika ꞌe parautiꞌa, e te ꞌAriki o te ao ē.

⁴ ¿Ko ai te meꞌe mo taꞌe moꞌa i a koe, e te mātou Pūꞌoko Haka Tere ē? ¿Ko ai te meꞌe mo taꞌe haꞌahana-hana atu? Ko koe mau nō te meꞌe hara kore. Taꞌatoꞌa nuꞌu o te ao ka haꞌamuri atu ena. Ko takeꞌa ꞌana, paꞌi, e te taꞌatoꞌa: taꞌa meꞌe aŋa meꞌe tī-tika».

⁵ I oti era te meꞌe nei, he takeꞌa e au te ⌊Kona ꞌAta Moꞌa⌋ o roto i te ⌊Karapā Moꞌa⌋ era ꞌi te raŋi e ha-hata rō ꞌā.

⁶ Mai roto i rā kona i eꞌa mai ai tū ŋā merahi era e hitu. E uru rō ꞌana i te kahu maꞌitaki aŋa hai rino e ꞌuira rō ꞌā. E here rō ꞌana a te uma i te rīpena aŋa hai piru.

⁷ He vaꞌai ia ki rā ŋā merahi e te meꞌe ora era e tahi o roto o tū ŋā meꞌe ora era e hā o muꞌa o te ꞌAtua, e tahi e tahi poko-poko aŋa hai piru. Rā ŋā poko-poko ko ꞌī ꞌana e te riri o te ꞌAtua, ꞌAtua tōꞌona ora ꞌina he hopeꞌa raꞌa.

⁸ ꞌE tū Kona ꞌAta Moꞌa era he ꞌī rō atu ꞌai e te meꞌe tuꞌu pa he ꞌau o te ꞌana-ꞌana ꞌe o te pūai o te ꞌAtua, ꞌe ꞌina e tahi kope mo uru ꞌātā ka oti tahi rō te ꞌati era e hitu.