Meꞌe Haka Takeꞌa 12 - Rapa Nui

He viꞌe

¹ He takeꞌa ia e au i te meꞌe nui-nui ꞌi te raŋi: he viꞌe e tahi e viri rō ꞌana e te ꞌana-ꞌana o te raꞌā, pa he kahu uru ōꞌona. ꞌI raro i tōꞌona vaꞌe te māhina, ꞌe ꞌi tōꞌona pūꞌoko te hei e hoꞌe ꞌahuru mā piti hetuꞌu o ruŋa.

² E hānautama rō ꞌā rā viꞌe, ꞌe e ꞌau-auē ꞌā ꞌi te mamae o te tūātoto ꞌe ꞌi te māui-ui o te aꞌu poki.

He manuꞌino nui-nui mea-mea e tahi

³ I oti era he takeꞌa haka ꞌou e au i te meꞌe nui-nui e tahi ꞌi te raŋi: he manuꞌino nui-nui mea-mea e tahi. E hitu ōꞌona pūꞌoko, e hoꞌe ꞌahuru tara. ꞌE ꞌi ruŋa i rā ŋā pūꞌoko e huki rō ꞌā e tahi e tahi hei.

⁴ Hai hiku i to-toi ai i te ꞌapa e tahi o te ꞌapa e toru o te hetuꞌu o te raŋi ꞌe he ava ki ruŋa i te henua. He noho ia rā manuꞌino ꞌi muꞌa o tū viꞌe era e aꞌu ꞌā i te poki, mo kai i rā poki ꞌi te hora era ka poreko era.

⁵ He poki tane te poki i poreko, poki māꞌana e haka tere i te taŋata taꞌatoꞌa o te ao hai pūai ꞌe ꞌina he nuꞌu mo rē ki a ia. I poreko era he toꞌo e te merahi i tū poki era, he maꞌu ki muꞌa o te ꞌAtua ꞌe ki muꞌa o tōꞌona pepe noho ꞌariki.

⁶ He tere ia rā viꞌe ki te kona ꞌone taꞌe noho taŋata, kona ꞌi ira i haka riva-riva ai e te ꞌAtua i te kona mo hāpaꞌo i a ia e hoꞌe taꞌutini piti hānere ono ꞌahuru mahana.

⁷ I oho era he haꞌamata te tamaꞌi ꞌi ruŋa i te raŋi: a Mihaera koia ko tōꞌona merahi he moto ki tū manuꞌino nui-nui mea-mea era ꞌe ki tāꞌana vaꞌehau. Ka ai atu hai pūai i tamaꞌi ai rā manuꞌino ki a kuā Mihaera,

⁸ i rē nō a Mihaera, ꞌe kai haꞌatiꞌa e te ꞌAtua mo noho haka ꞌou o rāua ꞌi te raŋi.

⁹ He ava i rā manuꞌino ananake ko tāꞌana vaꞌehau ki ruŋa i te henua. Rā manuꞌino ko te kōreha era o te noho iŋa tuai era ko Rukifero, he kope reo-reo ki te taŋata o te henua taꞌatoꞌa.

¹⁰ He ŋaroꞌa ia e au i te reꞌo pūai e tahi ꞌi ruŋa i te raŋi e kī era: «Ko tano ꞌā te hora era o te rē o te ꞌAtua, hora haka takeꞌa i tōꞌona pūai ꞌAriki, ꞌe hora mo haka tere e te ⌊Kiritō⌋ uŋa e ia. Ko tute ꞌana, paꞌi, i te kope rava tuhi era ꞌi muꞌa o te ꞌAtua, ka pō ka ꞌōtea, i te hape o te taina haka moe i te manaꞌu ꞌi ruŋa i a Ietū.

¹¹ Ko rē ꞌā nei ŋā taina ki rā kope hai toto tehe era o te Māmoe ꞌe hai roŋo riva-riva haka ꞌite era e rāua. ꞌIna kai riꞌa-riꞌa ꞌi te mate, i vaꞌai nō i a rāua mo mate.

¹² ¡E te meꞌe noho ꞌi te raŋi ē, ka koa kōrua! ¡ꞌE, ko te ꞌaroha i a kōrua, e te meꞌe o ruŋa i te henua ꞌe o roto i te vaikava ē, nā ko topa atu ꞌā a Rukifero ko ꞌata riri atu ꞌā ꞌi te ꞌite ꞌina ōꞌona hora toe!».

¹³ I uꞌi era e tū manuꞌino era ko ava mai ꞌana i a ia ki ruŋa i te henua, he tute he oho i tū viꞌe poreko era o te poki.

¹⁴ He vaꞌai ia e te ꞌAtua ki rā viꞌe e rua karā, pa he karā o te manu nui-nui, mo rere mo oho ki tōꞌona kona ꞌi te kona ꞌone taꞌe noho taŋata, he kona e roa rō ꞌā mai tū manuꞌino era, ꞌi ira ka hāpaꞌo era e toru matahiti ꞌe te ꞌafa.

¹⁵ He haka rua ia e tū manuꞌino era i te vai mai roto i tōꞌona haha, mo to-toi i rā viꞌe.

¹⁶ He hāꞌūꞌū e te henua i rā viꞌe, he mātaki i tōꞌona haha ꞌe he ꞌopo tahi i tū vai haka rua era e te manuꞌino.

¹⁷ He ꞌata riri rō atu ꞌai tū manuꞌino era mo rā viꞌe. He eꞌa he oho he moto ki te hakaara haka ꞌou o rā viꞌe, he nuꞌu haꞌatura ki te roŋo o te ꞌAtua ꞌe ki te parautiꞌa haka ꞌite e Ietū.

¹⁸ He oho ia tū manuꞌino era he māroa ꞌi te taha-taha tai.