Meꞌe Haka Takeꞌa 1 - Rapa Nui

He haꞌamata

¹ Te meꞌe nei e au e ⌊Iovani⌋ ka pāpaꞌi atu ena he meꞌe e ko roa ka topa rō mai ena, he meꞌe i haka ꞌite e te ꞌAtua ki a Ietū Kiritō mo haka ꞌite mai ki a tātou ki tōꞌona tāvini. Nei meꞌe i haka ꞌite mai ai e Ietū hai meꞌe i haka takeꞌa mai e tōꞌona merahi.

² ꞌE a au e pāpaꞌi atu ena hai parautiꞌa i tāꞌana meꞌe taꞌatoꞌa haka takeꞌa mai era. ꞌE he mataꞌite a au o te roŋo nei o te ꞌAtua ꞌe o te meꞌe taꞌatoꞌa haka ꞌite mai era e Ietū Kiritō.

³ Te ꞌAtua he haꞌamaitai i te kope nō era mo taiꞌo i te puka nei ki te taina ⌊haka moe i te manaꞌu⌋ ꞌi ruŋa i a Ietū, ꞌe he haꞌamaitai takoꞌa i te taina taꞌatoꞌa haka roŋo ꞌe haꞌatura ki te meꞌe hāꞌaki o ruŋa nei; nā, paꞌi, ko hāhine ꞌā te hora mo topa o rā ŋā meꞌe.

⁴ A au a Iovani he ꞌaroha atu ki te nūnaꞌa taŋata hoko hitu haka moe i te manaꞌu ꞌi ruŋa i a Ietū o te ŋā kona era o ꞌĀtia. Ka ai ꞌi ruŋa i a kōrua te riva rahi ꞌe te haumārū o te ꞌAtua o te hora nei, o muꞌa ꞌā ꞌe ka tuꞌu mai ena, o te vārua hoko hitu o muꞌa i tōꞌona pepe noho ꞌariki,

⁵ ꞌe o Ietū Kiritō, he mataꞌite haka ꞌite i te parautiꞌa o ruŋa i te ꞌAtua, ꞌe tāꞌana vānaŋa he parautiꞌa mau ꞌā. A ia he kope raꞌe ora haka ꞌou mai te mate ꞌe ꞌina kai mate haka ꞌou, ꞌe i a ia te parau mo haka tere i te ꞌariki taꞌatoꞌa o te ao. Te Kiritō e haŋa rō mai ꞌā ki a tātou, ꞌe ko haka eꞌa ꞌana i a tātou mai roto i te hara hai toto tehe era ōꞌona.

⁶ Ko haka riro ꞌana i a tātou he nūnaꞌa taŋata haka tere ꞌāꞌana, ꞌe he ⌊oromatuꞌa⌋ aŋa ki te ꞌAtua, he Matuꞌa ōꞌona. ¡Ka ai i a ia te haꞌahana-hana o te taꞌatoꞌa ꞌe te pūai mo haka tere i te ao taꞌatoꞌa ꞌātā ki te hopeꞌa raꞌa! ⌊ꞌĀmene⌋.

⁷ ꞌIna ko rehu: ¡ꞌI ruŋa i te raŋi tea-tea ka oho mai ena a Ietū! Taꞌatoꞌa nō ka takeꞌa ena, ꞌātā te nuꞌu ꞌo-ꞌoka era i a ia. Te taŋata taꞌatoꞌa o te ao taꞌe haka moe i te manaꞌu ꞌi ruŋa i a ia e ŋaroꞌa rō i te māui-ui ki roto i te ivi o ruŋa i a ia. He aŋi mau ꞌā, pē ira ka topa ena.

⁸ Te ꞌAtua o te hora nei, o muꞌa ꞌā ꞌe ka tuꞌu mai ena, ꞌAtua i a ia te pūai taꞌatoꞌa, pē nei e kī ena: «A au he Haꞌamata ꞌe he Hopeꞌa».

Te ⌊Kiritō⌋ ko haka nui-nui ꞌā

⁹ A au, a Iovani, he taina o kōrua, ꞌe, ꞌi te ai ōꞌoku ꞌa Ietū, a au takoꞌa ꞌi roto i te nūnaꞌa taŋata haka tere e te ꞌAtua, ꞌamo ꞌe haꞌaoromaꞌi i te ꞌati ananake ko kuā kōrua. ꞌE, ꞌi te haka ꞌite ōꞌoku i te roŋo o te ꞌAtua ꞌe ꞌi te vānaŋa o ruŋa i a Ietū, i maꞌu i puru ai i a au ꞌi te motu era ko Patamo.

¹⁰ ꞌI ira, ꞌi te mahana tāpati e tahi, mahana o te ꞌAtua, he haka moe vārua i a au e te ⌊Vārua Maitai⌋, ꞌe he ŋaroꞌa e au i te reꞌo pūai pa he koneta ꞌi tuꞌa i a au

¹¹ e kī mai ꞌā: «E pāpaꞌi ꞌi ruŋa i te puka te meꞌe taꞌatoꞌa ena ka takeꞌa ena e koe ꞌe ꞌai ka haka maꞌu rō ki te ŋā nūnaꞌa taŋata era hoko hitu haka moe i te manaꞌu ꞌi ruŋa i a Ietū o te ŋā kona era o ꞌĀtia: ki Ēfeto, ki ꞌĒtēmīrina, ki Perekamo, ki Tiatira, ki Tare, ki Pīrārēpia, ꞌe ki Rāōrītea».

¹² He hārui a au he uꞌi o ꞌai tū reꞌo era. Te meꞌe i takeꞌa mai he hakariꞌi e hitu aŋa hai piru,

¹³ ꞌe ꞌi vāeŋa o rā ŋā hakariꞌi te kope pa he Poki era ꞌā o te taŋata, e uru rō ꞌana i te kahu roa-roa ꞌātā ki te vaꞌe, e haratuꞌa rō ꞌā a te uma hai rīpena aŋa hai piru.

¹⁴ Te rauꞌoho pūꞌoko ōꞌona pa he tea-tea ena ꞌā o te huru-huru māmoe ꞌo pa he rito-rito ena ꞌā o te huru-huru manu, ꞌe te mata e tuꞌu rō ꞌana pa he ura ena ꞌā o te ahi.

¹⁵ Te vaꞌe e pura rō ꞌā pa he ꞌaurī ko tunu ꞌā ꞌi roto i te rona ꞌe ko haka ꞌuira ꞌā. Tōꞌona reꞌo te pūai pa he heruru ena ꞌā o te vai topa mai ruŋa i te kona ruŋa nui.

¹⁶ ꞌI te rima mataꞌu e hitu hetuꞌu, ꞌe mai roto i te haha e eꞌa era e tahi hoe e kaꞌi-kaꞌi rō ꞌā ararua pāꞌiŋa. Te ꞌāriŋa pa he raꞌā ꞌi te hora pūai o te ꞌana-ꞌana.

¹⁷ I takeꞌa era e au, he tū-turi a au he moe a tōꞌona vaꞌe pa he meꞌe: ko mate ꞌana a au. He haka puā mai ia e rā kope i tōꞌona rima mataꞌu ꞌe he kī mai: «ꞌIna koe ko riꞌa-riꞌa. A au he Raꞌe ꞌe he Hopeꞌa,

¹⁸ he kope e ora rō ꞌā. I mate rō a au, ꞌe, hora nei, he ora he oho mau rō ꞌai ꞌātā ki te hopeꞌa raꞌa. Te tāviri o te mate i a au.

¹⁹ »E Iovani, e pāpaꞌi te meꞌe taꞌatoꞌa ena ka haka takeꞌa atu ena e au: he meꞌe mo topa ꞌi te hora nei ꞌe he meꞌe mo topa pe muꞌa ka oho ena.

²⁰ Te auraꞌa o te ŋā hetuꞌu era e hitu takeꞌa era e koe ꞌi tōꞌoku rima mataꞌu he merahi hoko hitu hāpaꞌo i te ŋā nūnaꞌa taŋata era hoko hitu, ꞌe nei ŋā merahi he pūꞌoko haka tere o rā ŋā nūnaꞌa. ꞌE te auraꞌa o te hakariꞌi piru era e hitu ko te ŋā nūnaꞌa taŋata nei hoko hitu.