Karatia 6 - Rapa Nui

Te meꞌe mo aŋa e te nuꞌu ⌊kiritiano⌋

¹ E te taina, mo takeꞌa e kōrua e tahi taina ⌊haka moe i te manaꞌu⌋ ꞌi ruŋa i a Ietū e hara ꞌā, e hāꞌūꞌū e kōrua e te nuꞌu ko te haka tere iŋa ꞌā e te ⌊Vārua Maitai⌋, mo hoki haka ꞌou ōꞌona a te ara tī-tika. ꞌE ana hāꞌūꞌū, hai haŋa ꞌe hai haumārū. E uꞌi ꞌo haka hara rō atu i a kōrua.

² E hāꞌūꞌū takoꞌa kōrua i te rua mo ꞌamo i tōꞌona ꞌati; pē ira he haka tano kōrua i te meꞌe kī mai e te ⌊Kiritō⌋ mo aŋa.

³ Mo manaꞌu o te kope e tahi ꞌina a ia e ko tano mo hāꞌūꞌū i te rua ꞌi te meꞌe era ꞌata hau rō atu a ia ki rā kope, he meꞌe taꞌe he parautiꞌa, e reo-reo ꞌana ki a ia mau ꞌā.

⁴ Mo tātou mau ꞌā, hoko tahi hoko tahi, e uꞌi hoki e riva-riva rō ꞌā te tātou haka tere iŋa, ꞌe, mo ai pē ira, e koa tātou. ꞌIna e tahi o tātou mo manaꞌu e haka tano ꞌō te tātou haka tere iŋa ki te haka tere haŋa o te rua ana koa iho o tātou.

⁵ Taꞌatoꞌa nō, paꞌi, ko ꞌite ꞌana he aha te meꞌe tano ꞌe te meꞌe taꞌe tano ki te mata o te ꞌAtua.

⁶ Te kope hāpī i te vānaŋa o te ꞌAtua, e hāꞌūꞌū hai meꞌe ai ꞌāꞌana ki te maꞌori hāpī i a ia.

⁷ E uꞌi kōrua ꞌo manaꞌu rō pē nei ē: e ravaꞌa rō e kōrua mo reo-reo ki te ꞌAtua. E kī atu ena a au i te meꞌe nei ꞌo te ai te meꞌe ꞌoka e te taŋata ko rā meꞌe mau ꞌā te meꞌe ka kato era.

⁸ Te kope ꞌoka, paꞌi, i te meꞌe pohe nō e te hakari, te meꞌe mo ravaꞌa he ūtuꞌa o te hara he mate; ꞌe te kope ꞌoka i te meꞌe haŋa e te Vārua Maitai, he ora ꞌāpī ꞌina he hopeꞌa raꞌa.

⁹ ꞌO ira, ꞌina ko rohi-rohi mo hāꞌūꞌū ki te rua. Mo taꞌe rohi-rohi, ꞌi te hora tano he haꞌamaitai a tātou e te ꞌAtua.

¹⁰ Mo ai i a tātou te rāveꞌa mo hāꞌūꞌū, he hāꞌūꞌū tātou, ꞌe he nuꞌu taina haka moe i te manaꞌu ꞌi ruŋa i a Ietū te meꞌe raꞌe o tātou mo hāꞌūꞌū.

He hatu ꞌe he ꞌaroha

¹¹ ¡Ka uꞌi rā te nu-nui o tāꞌaku tiꞌaraꞌa! Hai rima mau nei ꞌā ōꞌoku i pāpaꞌi ai i te vānaŋa nei.

¹² Te nuꞌu kī atu mo hore i te kiri o te kinoŋa, e kī atu ena pē ira mo tano o rāua ki te mata o te nuꞌu ra-rahi o te ⌊hūrio⌋, ꞌo tute i a rāua mo tōtōā ꞌo te hāpī pē nei ē: hai haka moe nō i te manaꞌu ꞌi ruŋa i a Ietū ꞌe ꞌi ruŋa i te meꞌe ravaꞌa e ia hai mate iŋa era ōꞌona ꞌi ruŋa i te tātaurō he eꞌa te taŋata mai roto i te ūtuꞌa o te hara ꞌe he ravaꞌa i te ora ꞌāpī ꞌina he hopeꞌa raꞌa.

¹³ Te parautiꞌa, ꞌina e tahi nuꞌu haꞌatura ki te roŋo taꞌatoꞌa o te ⌊haka tere iŋa ꞌa Mōtē⌋, ꞌātā te nuꞌu hore i te kiri o te kinoŋa. E haŋa ena a rāua mo hore o kōrua i te kiri o te kinoŋa mo teꞌo-teꞌo pē nei ē: ko ravaꞌa ꞌana ꞌō e rāua mo maꞌu e kōrua i te tāpaꞌo ena ꞌi ruŋa i te kōrua hakari.

¹⁴ Tāꞌaku meꞌe mau nō mo teꞌo-teꞌo he meꞌe aŋa era e Ietū Kiritō, Pūꞌoko Haka Tere o tātou. Hai mate iŋa era ōꞌona ꞌi ruŋa i te tātaurō i taꞌe ai haka ꞌou ai a au he ꞌekaravo o te meꞌe o te ao nei, ꞌe ꞌina he pūai toe o te ŋā meꞌe nei mo haka tere mai i a au.

¹⁵ ꞌE, ki te mata o te ꞌAtua, ꞌina e tahi hauhaꞌa o te meꞌe he hore ꞌo he taꞌe hore o te kiri o te kinoŋa. Te meꞌe hauhaꞌa mōꞌona he haka ꞌāpī atu i a koe e te Vārua Maitai.

¹⁶ Ka ai te haumārū ꞌe te riva rahi o te ꞌAtua ꞌi ruŋa i te nuꞌu taꞌatoꞌa haka tere i a rāua hai meꞌe kī atu ena e au; a rāua he itaraera parautiꞌa o te ꞌAtua, te auraꞌa, he nuꞌu haꞌataꞌa e te ꞌAtua māꞌana.

¹⁷ Mo haka hopeꞌa atu: e ko haŋa a au mo taꞌe haka au haka ꞌou mai o te kope e tahi o ruŋa i tāꞌaku meꞌe hāpī. ꞌI ruŋa i tōꞌoku hakari, paꞌi, a au e maꞌu nei i te more tuai, he tāpaꞌo: ki a Ietū a au e tāvini nei.

¹⁸ E te taina, ka ai ꞌi ruŋa i a kōrua taꞌatoꞌa te riva rahi o te tātou Pūꞌoko Haka Tere ko Ietū Kiritō. ⌊ꞌĀmene⌋.