Iovani 1 - Rapa Nui

He haꞌamata

¹ ꞌI te hora era kai aŋa ꞌā te ao, ko ai era ꞌana te Vānaŋa, ꞌe rā Vānaŋa ararua ko te ꞌAtua ꞌe a ia he ꞌAtua.

² Ko ai nō era ꞌana te Vānaŋa ꞌi rā hora ararua ko te ꞌAtua.

³ ꞌE hai Vānaŋa te ꞌAtua i aŋa ai i te meꞌe taꞌatoꞌa; ꞌina e tahi meꞌe i ai i taꞌe aŋa hai ia.

⁴ Mai i a ia e ravaꞌa ena te ora parautiꞌa ꞌe rā ora pa he mōrī haka māꞌeha i te manaꞌu o te taŋata.

⁵ Te mōrī nei e māꞌeha rō ꞌana ꞌi roto i te pōꞌuri, ꞌe e ko ravaꞌa e te pōꞌuri mo haka pōhāhā.

⁶ I ai rō e tahi taŋata i uŋa mai e te ꞌAtua te ꞌīŋoa ko ⌊Iovani⌋.

⁷ I oho mai ai pa he mataꞌite mo vānaŋa o ruŋa i rā mōrī mo haka moe o te taŋata taꞌatoꞌa i te rāua manaꞌu ꞌi ruŋa i rā mōrī hai vānaŋa era ꞌāꞌana.

⁸ Taꞌe ko Iovani te mōrī; a ia he kope uŋa nō mai mo haka ꞌite mai ko ai rā mōrī.

⁹ ꞌE, te mōrī haka māꞌeha i te taŋata taꞌatoꞌa e ko roa he oho mai ki te ao.

¹⁰ I noho rō te Vānaŋa ꞌi ruŋa i te henua, ꞌe, ka ai atu hai ia te ꞌAtua i aŋa ai i te ao, kai ꞌite e te taŋata ko ai a ia.

¹¹ Ki te ao aŋa era e ia i oho mai ai, ꞌe kai tapa atu e te rahi raꞌa o tōꞌona taŋata.

¹² ꞌE te nuꞌu toꞌo ꞌe haka moe i te manaꞌu ꞌi ruŋa i a ia, ki a rāua i vaꞌai ai i te parau mo riro he ŋā poki o te ꞌAtua.

¹³ A rāua he ŋā poki o te ꞌAtua taꞌe ꞌō ꞌo te poreko mai roto i te viꞌe ararua ko te taŋata, ꞌo te ai ko poreko haka ꞌou ꞌā mai te ꞌAtua.

¹⁴ Tū Vānaŋa era i riro rō he taŋata ꞌe i noho rō ꞌi muri i a tātou. Ko takeꞌa ꞌana e tātou tōꞌona pūai, pūai vaꞌai e te ꞌAtua Matuꞌa ki tāꞌana Poki era e tahi mau nō. Te haŋa o te ꞌAtua mo tātou ꞌe te parautiꞌa o ruŋa ōꞌona i haka takeꞌa mai ai ꞌi ruŋa i a ia.

¹⁵ I vānaŋa rō a Iovani o ruŋa i a ia ꞌe pē nei i kī ai: «Ko ia tāꞌaku meꞌe kī atu era: “ꞌI tuꞌa ōꞌoku ka oho mai ena e tahi taŋata ꞌata hōnui ki a au ꞌo te ai ꞌi raꞌe ki tōꞌoku poreko iŋa ko ai era ꞌana a ia”».

¹⁶ ꞌE, ꞌi te riva rahi ōꞌona, he haꞌamaitai nō mai te aŋa i a tātou.

¹⁷ Hai ⌊Mōtē⌋ te ꞌAtua i haka ꞌite mai ai i tāꞌana roŋo mo tātou, ꞌe hai Ietū Kiritō i haka ꞌite mai ai i tōꞌona haŋa mo tātou ꞌe i te parautiꞌa o ruŋa i a ia.

¹⁸ ꞌIna e tahi taŋata i takeꞌa i te ꞌAtua; o tāꞌana Poki nō era e tahi, he ꞌAtua, noho ꞌi muri i a ia, i takeꞌa ꞌe i haka ꞌite mai o ruŋa.

He vānaŋa iŋa o Iovani Papatito o ruŋa i te Kiritō

¹⁹ He vānaŋa nei ꞌa Iovani ꞌi te hora uŋa e te nuꞌu hōnui ⌊hūrio⌋ i te ⌊oromatuꞌa⌋ ꞌe i te ⌊rēvita⌋ mai Hērutarema mo ꞌite ko ai mau a Iovani. He ꞌui e rā nuꞌu: —¿He Kiritō rō koe?

²⁰ He pāhono e Iovani: —Taꞌe a au he ⌊Kiritō⌋.

²¹ He ꞌui haka ꞌou: —¿Ko ai ia a koe? ¿Ko te perofeta era ko ꞌĒria? He kī e Iovani: —Taꞌe a au ko ia. He ꞌata ꞌui e tū nuꞌu era: —¿Ko koe ia te perofeta era mo oho mai? He pāhono: —ꞌIna.

²² He kī: —¿Ko ai ia a koe? Ka hoki nei, paꞌi, mātou e ai te mātou meꞌe mo kī o ruŋa ōꞌou ki te nuꞌu uŋa mai. ¿E ai rō ꞌana taꞌa meꞌe mo kī mai o ruŋa i a koe?

²³ He pāhono e Iovani: —A au he reꞌo e ohu ꞌana ꞌi te kona ꞌone taꞌe noho taŋata: «Ka mātaki e tahi ara tī-tika mo te Kiritō», pa he kī iŋa era e te perofeta era ko ꞌItaia.

²⁴ Tētahi o tū nuꞌu uŋa era mo vānaŋa ki a Iovani he ⌊fariseo⌋.

²⁵ He ꞌui e rā nuꞌu: —Mo ai ia taꞌe koe he Kiritō, taꞌe koe ko ꞌĒria, ꞌe taꞌe takoꞌa koe he perofeta, ¿he aha ia koe e ⌊papatito⌋ ena?

²⁶ He kī e Iovani: —A au e papatito nei hai vai; ꞌe, nā ꞌi roto i a kōrua te kope e tahi kai ꞌite ꞌā e kōrua ko ai mau a ia.

²⁷ I tuꞌa i a au ka tuꞌu mai ena. ꞌE, ꞌi tōꞌona hōnui, e ko tano a au mo noi mo kume i te hau o tōꞌona kirivaꞌe.

²⁸ Te meꞌe taꞌatoꞌa nei i topa ai ꞌi te kona te ꞌīŋoa ko Vētānia, ꞌi te rua pāꞌiŋa o te rio era ko Horotana, he kona ꞌi ira a Iovani e papatito era.

A Ietū he Māmoe o te ꞌAtua

²⁹ ꞌI te rua mahana, he takeꞌa e Iovani i a Ietū ka pū e oho atu era. He kī ki te nuꞌu o ira: «¡Ka uꞌi rā kōrua i te taŋata era ai! ¡A ia he Māmoe o te ꞌAtua, he tūtia mo haka kore i te hara o te taŋata!

³⁰ O ruŋa i a ia tāꞌaku vānaŋa kī atu era pē nei ē: “E ko roa ka tuꞌu mai ena te taŋata ꞌata hōnui ki a au ꞌi te meꞌe era ꞌi raꞌe ki tōꞌoku poreko iŋa ko ai era ꞌana a ia”.

³¹ ꞌI muꞌa ꞌā ꞌina a au kai ꞌite ko ai a ia. E papatito e oho nei a au hai vai mo haka ꞌite ki te itaraera ko ai a ia».

³² He kī haka ꞌou e Iovani: «Ko takeꞌa ꞌana e au te topa iŋa o te ⌊Vārua Maitai⌋ mai te raŋi pa he pāroma, ꞌe te noho iŋa ꞌi ruŋa i a ia.

³³ ꞌI rā hora kai ꞌite hia ꞌana a au ko ai rā kope. O te ꞌAtua uŋa mai era i a au mo papatito hai vai i kī mai: “Taŋata ena ka takeꞌa ena e koe ko topa ꞌana te Vārua Maitai ꞌe ko noho ꞌana ꞌi ruŋa i a ia, māꞌana e papatito hai Vārua Maitai”.

³⁴ Ko takeꞌa ꞌana e au i rā meꞌe, ꞌe ko au te mataꞌite: a ia he Poki o te ꞌAtua».

He nuꞌu hāpī raꞌe ꞌa Ietū

³⁵ ꞌI te rua mahana, ꞌi rā kona haka ꞌou ꞌā a Iovani ananake ko tāꞌana nuꞌu hāpī e rua.

³⁶ I takeꞌa era ka vari a Ietū, he kī e Iovani: «¡Ka uꞌi, he Māmoe rā o te ꞌAtua!».

³⁷ I ŋaroꞌa era i rā vānaŋa, he eꞌa he oho rā ŋā kope ꞌi tuꞌa.

³⁸ He hārui ia a Ietū, he takeꞌa e oho atu ꞌana ꞌi tuꞌa i a ia, ꞌe he ꞌui: —¿He aha te kōrua meꞌe haŋa? He kī e rā nuꞌu: —E te Maꞌori, e haŋa rō ꞌā a māua mo ꞌite ꞌi kona hē koe e noho ena.

³⁹ He pāhono e Ietū: —Ka oho mai ka uꞌi ꞌi kona hē. He oho ia he uꞌi e rā ŋā kope i tōꞌona kona noho, ꞌe he noho ꞌi muri i a Ietū mai te hora maha o te ahi-ahi ꞌātā ki te pō.

⁴⁰ E tahi o rā ŋā kope ŋaroꞌa era i te vānaŋa ꞌa Iovani oho era ꞌi muri i a Ietū ko Antarea, taina o Tīmona Pētero.

⁴¹ Te meꞌe raꞌe ꞌa Antarea i aŋa he kimi i tū taina era ōꞌona ko Tīmona. I piri era he kī: «Ko māhani ꞌana a māua i te ⌊Mētia⌋». (Mo huri i te vānaŋa nei Mētia ki te ⌊kirieko⌋: Kiritō).

⁴² He maꞌu ia e Antarea i a Tīmona ki tū kona era ꞌi ira a Ietū. I takeꞌa era e Ietū, he kī: «A koe ko Tīmona, poki ꞌa Iovani. Tuꞌu ꞌīŋoa ꞌi te hora nei ko Tefa (te auraꞌa, ko Pētero)».

He toꞌo iŋa o Ietū i a Feripe ꞌe i a Natanaera

⁴³ ꞌI te rua mahana, he eꞌa he oho a Ietū ki Karirea. ꞌI ira i piri ai ki a Feripe ꞌe he kī: «Ka oho mai koe mo taŋata hāpī ꞌāꞌaku».

⁴⁴ A Feripe o te kona e tahi o Karirea te ꞌīŋoa ko Vetetaira, he kona takoꞌa o Pētero ararua ko Antarea.

⁴⁵ He eꞌa he oho a Feripe ki a Natanaera ꞌe he kī: —Ko ꞌite ꞌana a mātou, ꞌi te hora nei, ko ai te kope haka ꞌite mai era e Mōtē ꞌi ruŋa i te ŋā puka pāpaꞌi era e ia, ꞌe haka ꞌite takoꞌa mai era e te perofeta. Ko Ietū rā kope, he poki ꞌa ⌊Kōsē⌋ era o Nātāreta.

⁴⁶ He kī e Natanaera: —¿E eꞌa mau rō mai e tahi meꞌe riva-riva mai Nātāreta? He pāhono e Feripe: —Ka oho mai, ka uꞌi e koe mau ꞌā hai mata.

⁴⁷ I uꞌi era e Ietū ka hāhine mai a Natanaera, he kī: —ꞌĪ mau te kope he itaraera parautiꞌa, e ko kī e tahi reo-reo.

⁴⁸ He ꞌui e Natanaera: —¿Pē hē koe i ꞌite ai i tōꞌoku huru? He pāhono e Ietū: —Kai piri atu ꞌana a Feripe i takeꞌa rō ai koe e au ꞌi raro i te tumu pika.

⁴⁹ He kī e Natanaera: —E te Maꞌori, ¡ko koe te Poki o te ꞌAtua, ko koe te ꞌAriki o Itaraera!

⁵⁰ He kī e Ietū ki a Natanaera: —¿He haka moe rō mai ꞌai ꞌō koe i tuꞌu manaꞌu ꞌi ruŋa i a au ꞌo te kī nō atu ōꞌoku ko takeꞌa ꞌana koe e au ꞌi raro i te tumu pika? ꞌĪ a au he kī atu: nā e ŋaroꞌa rō ꞌe e takeꞌa rō e koe meꞌe rahi nō atu meꞌe ꞌata hau ꞌi te nui-nui ki te meꞌe ena.

⁵¹ He kī ia ki te taꞌatoꞌa: «ꞌĪ a au he kī atu: e riro rō kōrua he mataꞌite o nei ŋā meꞌe, ꞌe te nui-nui e tuꞌu rō pa he meꞌe ena: e ha-hata rō ꞌā te raŋi, ꞌe e iri ꞌe e topa rō mai ꞌā te merahi o te ꞌAtua ꞌi ruŋa i a au i te ⌊Poki o te taŋata⌋».