Aŋa o te ꞌĀpōtoro 3 - Rapa Nui

He haka ora iŋa i te vaꞌe o te taŋata e tahi

¹ E tahi mahana he oho a Pētero ararua ko ⌊Iovani⌋ ki te ⌊Kona Haꞌamuri ꞌAtua⌋ ki te pure o te hora toru o te ahi-ahi.

² ꞌI ira e noho rō ꞌā e tahi taŋata vaꞌe rehe-rehe mai tōꞌona poreko iŋa ꞌā. Paurō te mahana e maꞌu e haka rē era i a ia ꞌi muri i te ꞌōpani te ꞌīŋoa ko Nehe-nehe mo no-noꞌi hai meꞌe tara ki te nuꞌu uru.

³ I takeꞌa era e tū taŋata vaꞌe rehe-rehe era i a Pētero ararua ko Iovani e oho ꞌā mo uru ki roto, he no-noꞌi hai moni.

⁴ He noho ararua he uꞌi ki tū taŋata era, ꞌe he kī e Pētero: «Ka uꞌi mai rā koe».

⁵ He uꞌi e tū taŋata era, e manaꞌu era he vaꞌai hai moni.

⁶ He kī ia e Pētero: «ꞌIna ōꞌoku moni ꞌe ꞌina ōꞌoku piru. Tāꞌaku meꞌe ai ꞌī e au he vaꞌai atu: hai ꞌīŋoa o Ietū Kiritō o Nātāreta, ka māroa koe ka haꞌere».

⁷ I kī era a Pētero i te meꞌe nei, he ꞌa-ꞌaru a te rima mataꞌu mo haka eꞌa ki ruŋa. ꞌI tū hora ꞌā he ora rō ꞌai te vaꞌe o tū taŋata era.

⁸ I rere a ruŋa i māroa ai ꞌe he haꞌamata he haꞌere. He uru ki roto i te Kona Haꞌamuri ꞌAtua ꞌi muri i a kuā Pētero hai vaꞌe mau ꞌā ōꞌona koia ko rere-rere e haꞌahana-hana era ki te ꞌAtua.

⁹ Te nuꞌu taꞌatoꞌa takeꞌa i rā taŋata e haꞌere ꞌā ꞌe e haꞌahana-hana ꞌana ki te ꞌAtua

¹⁰ he māere ꞌi tū meꞌe era ꞌo te aŋi-aŋi ko tū taŋata no-noꞌi era i te moni ꞌi te kona ꞌōpani era ko Nehe-nehe.

E tātara ꞌā a Pētero ꞌi te Taupeꞌa o ⌊Toromono⌋

¹¹ Rā taŋata vaꞌe rehe-rehe era kai haŋa mo oho mai muri i a Pētero ararua ko Iovani. Te nuꞌu taꞌatoꞌa, ꞌi te māere ꞌi tū meꞌe topa era, he tāhuti ki te kona ꞌi ira o kuā Pētero, he kona kī he Taupeꞌa o Toromono o te Kona Haꞌamuri ꞌAtua.

¹² I takeꞌa era e Pētero, he kī: «¿He aha rā kōrua i māere ai, e te itaraera ē? ¿He aha e uꞌi mai ena pa he meꞌe ena ē: o māua i haka haꞌere i te taŋata nei hai mana mau ꞌā o māua, ꞌo ꞌo te rava moꞌa ꞌe haꞌatura o māua ki te ꞌAtua?

¹³ Te ꞌAtua o ⌊ꞌAparahama⌋, o Itaꞌata, o Hākovo, tupuna o tātou, ko haka nui-nui ꞌā i tōꞌona tāvini ko Ietū vaꞌai e kōrua ki te nuꞌu ra-rahi ꞌe taꞌe haŋa e kōrua ꞌi te hora haŋa e Pirato mo haka eꞌa.

¹⁴ Kai haŋa a kōrua mo kī mo haka eꞌa i te taŋata aŋa i te meꞌe tī-tika ꞌe ꞌina he hara; he taŋata taparahi-taꞌata i haŋa e kōrua mo haka eꞌa.

¹⁵ »Pē ira a kōrua i tiŋaꞌi i haka mate ai i te taŋata vaꞌai mai i te ora ꞌāpī ꞌina he hopeꞌa raꞌa. ꞌE, ka ai atu pē ira, ko haka ora ꞌā e te ꞌAtua mai te mate; a māua he mataꞌite.

¹⁶ Te meꞌe i haka ora i te taŋata takeꞌa ena e kōrua he ⌊haka moe i te manaꞌu⌋ ꞌi ruŋa i a Ietū. ꞌE, ꞌo te haka moe i te manaꞌu ꞌi ruŋa i a Ietū, i ora tahi ai tōꞌona māui-ui, pa he meꞌe takeꞌa ena e kōrua.

¹⁷ »E kuā taina ē, ko ꞌite ꞌana a au hora tiŋaꞌi era e kōrua ꞌe e te kōrua nuꞌu ra-rahi i a Ietū, ꞌina kōrua kai aŋi-aŋi he aha te kōrua meꞌe i aŋa.

¹⁸ Pē ira te ꞌAtua i haka tano ai i te meꞌe kī ꞌi muꞌa ꞌā ki tāꞌana perofeta taꞌatoꞌa mo haka ꞌite: tāꞌana Kiritō e mate rō.

¹⁹ »ꞌO ira, ⌊ka huri te manaꞌu ki te ꞌAtua⌋ ꞌe ꞌai ka haka tapa rō mai roto i te hara, ki haka kore atu ai e ia i te kōrua hara.

²⁰ Mo aŋa pē ira, e tuꞌu rō te hora he ŋaroꞌa e kōrua i te haka haŋu iŋa o te ꞌAtua i te kōrua vārua hai uŋa atu i a Ietū, he kope haꞌataꞌa mai te hora raꞌe era ꞌā mo Kiritō o kōrua.

²¹ »ꞌE mo te hora nō nei a Ietū Kiritō ana noho ꞌi te raŋi ꞌātā ki te haka riva-riva iŋa e te ꞌAtua i te meꞌe taꞌatoꞌa, pa he meꞌe haka ꞌite mai hai tāꞌana ŋā perofeta era o muꞌa ꞌā.

²² I haka ꞌite rō e ⌊Mōtē⌋ ki te tātou tupuna: “Te ꞌAtua e haꞌataꞌa rō mai roto i a kōrua i te perofeta e tahi pa he haꞌataꞌa iŋa nei i a au. E haꞌatura te meꞌe taꞌatoꞌa ka kī atu ena.

²³ Te nuꞌu taꞌatoꞌa taꞌe haka roŋo ki nei perofeta, he haka kore mai roto i te nuꞌu haka tere e te ꞌAtua”.

²⁴ »Te perofeta taꞌatoꞌa, mai a ⌊Tamuere⌋ pe muꞌa, i vānaŋa takoꞌa rō o ruŋa i te ŋā mahana nei.

²⁵ A kōrua he hakaara o rā ŋā perofeta, ꞌe mo kōrua rā hōrea kī era e te ꞌAtua ki te tātou tupuna ko ꞌAparahama pē nei ē: “E haꞌamaitai rō e au te hau taꞌatoꞌa o te ao hai hakaara ōꞌou”.

²⁶ »Ki a tātou ki te itaraera i uŋa raꞌe mai ai e te ꞌAtua i te tāvini haꞌataꞌa era ōꞌona, mo haꞌamaitai mai e ia hai haka eꞌa i a tātou mai roto i te hara».