3 Iovani 1 - Rapa Nui

He ꞌaroha

¹ A au, te pūꞌoko haka tere o te nūnaꞌa taŋata ⌊haka moe i te manaꞌu⌋ ꞌi ruŋa i a Ietū, he ꞌaroha atu ki a koe, e Kāio ē, e te taina haŋa rahi ōꞌoku ē.

He vānaŋa a ⌊Iovani⌋ o ruŋa i a Kāio

² E te taina, e ani rō ꞌana a au ki te ꞌAtua mo riva-riva ōꞌou ꞌi te meꞌe taꞌatoꞌa ꞌe mo haka pūai atu i tuꞌu hakari, pa he pūai ena ꞌā o tuꞌu haka moe iŋa i te manaꞌu ꞌi ruŋa i a ia.

³ He koa nō tāꞌaku aŋa ꞌi te hora tuꞌu mai o te tētahi taina ꞌaꞌamu mai ꞌina koe he haka tapa mai roto i te ara o te parautiꞌa.

⁴ ꞌIna he meꞌe hopeꞌa o te koa pa he meꞌe ena he ꞌite ōꞌoku pē nei ē: tāꞌaku ŋā poki e noho rō ꞌana ꞌi roto i te ara o te parautiꞌa.

⁵ E te taina, meꞌe riva-riva taꞌa meꞌe ena e aŋa mai ena he hāꞌūꞌū ki te tātou taina, ꞌe ꞌata riva-riva mo ai he taina tuꞌu atu mai te kona roa-roa.

⁶ Tētahi o rāua, e tuꞌu mai era ki nei, he vānaŋa ꞌi muꞌa i te nūnaꞌa taŋata haka moe i te manaꞌu ꞌi ruŋa i a Ietū ꞌi te rahi o tuꞌu haŋa ki a rāua. Ana vari haka ꞌou atu, e ꞌata hāꞌūꞌū nō koe hai māhatu hai meꞌe mo te rāua ara, pa he meꞌe haŋa e te ꞌAtua.

⁷ ꞌI te rāua ara haka ꞌite oho o ruŋa i a Ietū Kiritō, ꞌina he kī ki te nuꞌu taꞌe haka moe i te manaꞌu ꞌi ruŋa i a Ietū mo hāꞌūꞌū ki a rāua.

⁸ ꞌO ira, e hāꞌūꞌū e tātou, ki ai ai a tātou ananake ꞌi te haka ꞌite iŋa o rāua i te hāpī parautiꞌa o te ꞌAtua.

Haka tere iŋa kē to Riotefere ꞌe to Remeterio

⁹ I pāpaꞌi rō au e tahi parau ki te kōrua nūnaꞌa taŋata haka moe i te manaꞌu ꞌi ruŋa i a Ietū. ꞌE a Riotefere ꞌina kai tapa mai i tāꞌaku meꞌe pāpaꞌi era ꞌi te haŋa mo ai ko ia mau nō te pūꞌoko haka tere o nā.

¹⁰ Ki tuꞌu atu au, he ture e au ꞌi muꞌa o te taina taꞌatoꞌa o ruŋa i tāꞌana meꞌe taꞌe tano ena e aŋa mai ena. E haꞌaꞌino ꞌe e reo-reo e oho ena o ruŋa i a tātou. ꞌE taꞌe nō ko rā meꞌe te meꞌe e aŋa mai ena. ꞌIna he haŋa mo toꞌo ki tōꞌona hare i te taina tuꞌu ki ira. ꞌE te taina haŋa mo toꞌo i rā ŋā taina ki te rāua hare ꞌina e ia he haꞌatiꞌa, ꞌe he toꞌo mai i rā ŋā taina era e haŋa rō ꞌā he tute mai roto i te nūnaꞌa taŋata haka moe i te manaꞌu ꞌi ruŋa i a Ietū.

¹¹ E te taina, ꞌina koe ko aŋa i te meꞌe taꞌe tano aŋa e te rua; e aŋa koe i te meꞌe riva-riva. Te kope aŋa i te meꞌe riva-riva, o te ꞌAtua; ꞌe te kope aŋa i te meꞌe rake-rake, kai māhani ꞌā i te ꞌAtua.

¹² Te taina taꞌatoꞌa e vānaŋa riva-riva rō ꞌā o ruŋa i a Remeterio, ꞌe hai noho iŋa tano ōꞌona e takeꞌa ena he taŋata riva-riva. A mātou takoꞌa e vānaŋa riva-riva rō ꞌā o ruŋa i a ia, ꞌe ko ꞌite ꞌana e koe he parautiꞌa te mātou meꞌe kī.

He ꞌaroha

¹³ Meꞌe rahi tāꞌaku meꞌe haŋa mo kī atu, ꞌe ꞌina a au kai haŋa mo pāpaꞌi atu.

¹⁴ E haŋa rō ꞌā, paꞌi, a au, ꞌina ko roa hia, he piri haka ꞌou tāua ꞌe māꞌaku mau ꞌā e vānaŋa atu.

¹⁵ Ka ai te haumārū ꞌi ruŋa i a koe. Te tātou repahoa ꞌī e ꞌaroha atu ena. E ꞌaroha atu koe ki te tātou repahoa ena o nā. ꞌIorana.