2 Iovani 1 - Rapa Nui

He ꞌaroha

¹ A au, te pūꞌoko haka tere o te nūnaꞌa taŋata ⌊haka moe i te manaꞌu⌋ ꞌi ruŋa i a Ietū, he ꞌaroha atu ki a koe, e te viꞌe haꞌataꞌa e te ꞌAtua māꞌana ē, ꞌe ki taꞌa ŋā poki. E haŋa rahi rō atu ꞌana a au ki a kōrua, ꞌe taꞌe nō ko au, pē ira takoꞌa ꞌana te nuꞌu ko ꞌite ꞌana i te parautiꞌa

² ꞌo te ai ꞌi roto i te tātou māhatu te hāpī parautiꞌa ꞌātā ki te hora hopeꞌa.

³ Ka ai te riva rahi, te ꞌaroha ꞌe te haumārū o te ꞌAtua he Matuꞌa, ꞌe o Ietū Kiritō, he Poki ꞌāꞌana, ꞌi ruŋa i a tātou taꞌatoꞌa, he nuꞌu oho a te ara o te parautiꞌa ꞌe o te haŋa ki te rua.

Te parautiꞌa ꞌe te haŋa

⁴ Ko koa riva-riva ꞌana a au ꞌo te ꞌite pē nei ē: e ai rō ꞌana te tētahi nuꞌu o roto i a kōrua e tano rō ꞌana te noho iŋa ki te hāpī parautiꞌa o te ꞌAtua, pa he meꞌe kī mai e ia.

⁵ ꞌE hora nei, ꞌī a au he ani atu ki a kōrua: e haŋa tātou ki te rua. Te roŋo nei he haŋa ki te rua taꞌe o te hora nei, he meꞌe ko haka ꞌite mai era ꞌā mai te hora haka moe i te manaꞌu ꞌi ruŋa i a Ietū.

⁶ Mo ai o te tātou haŋa ki te rua, e haka tano ꞌana a tātou i te roŋo o te ꞌAtua. ꞌE rā roŋo ko te meꞌe nei: e haŋa ki te rua, he meꞌe ko ŋaroꞌa era ꞌā e tātou mai muꞌa ꞌā.

E uꞌi kōrua ꞌo reo-reo atu

⁷ ꞌI te kona taꞌatoꞌa o te ao e noho mai ena meꞌe rahi nō atu nuꞌu reo-reo e kī ena kai oho mai a Ietū hai hakari taŋata. Te kope kī pē ira he kope haꞌavare ꞌe he kope taꞌe haŋa ki te ⌊Kiritō⌋.

⁸ ꞌIna ko haka roŋo, ꞌo ŋaro rō i a kōrua te meꞌe taꞌatoꞌa riva-riva aŋa e tātou, ꞌo taꞌe ravaꞌa e kōrua i te meꞌe hōrea mai era e te ꞌAtua.

⁹ Te kope ꞌāmui hai hāpī kē i te hāpī parautiꞌa ꞌa Ietū ꞌina he ꞌAtua o muri i a ia, ꞌe te kope haka tano oho i a ia ki rā hāpī ꞌi muri i a ia te ꞌAtua Matuꞌa ꞌe te Poki.

¹⁰ ꞌE mo tuꞌu atu o te taŋata ki te kōrua hare e hāpī ꞌā o ruŋa i te ꞌAtua, ꞌe tāꞌana meꞌe hāpī taꞌe he hāpī parautiꞌa ꞌa Ietū, ꞌina ko toꞌo ki roto i tuꞌu hare ꞌe ꞌina ko ꞌaroha.

¹¹ Te kope ꞌaroha ki a ia e peꞌe ꞌā ki te aŋa taꞌe tano o rā taŋata ꞌe e ꞌāpiti ꞌā ki a ia.

He ꞌaroha

¹² Meꞌe rahi tāꞌaku meꞌe haŋa mo kī atu ki a kōrua, ꞌe ꞌina a au kai haŋa mo pāpaꞌi atu. Tōꞌoku haŋa he oho atu ki a kōrua ena, ꞌe he vānaŋa atu e au mau ꞌā, ki ko-koa tahi ai a tātou.

¹³ Te ŋā poki o tuꞌu taina haꞌataꞌa takoꞌa era e te ꞌAtua māꞌana ꞌī e ꞌaroha atu ena mo kōrua. ꞌIorana.