Lukaa 3 - Buk Taabu Matakin

Ioaanes a Tena Baapitaaiso i warawaai

¹ Baa i wenoina ma lima na kilaala na naagagon anun Kaaisaar Tiberio, Pontio Pilaato a ngaala na mukmuga i naagagon u ra papaar Iudaia, ma Erodes i mukmuga u ra papaar Gaalilaia, ma tenalik Pilipo i mukmuga u ra ru papaar Ituraaia ma Traakoniti, ma Lisaanio i mukmuga u ra papaar Aabilene

² ma Aanaas ma Kaaiapaas diaar lo a pinapaam na mukmuga na tena wetabaar karom God. U ra kilaala maa a pirpir anun God i waan paat karom Ioaanes, natun Saakaria baa i ki inaanga u ra bil na wanua.

³ Ma i waan u ra kum wanua raap marawaai u ra daanim Ioridaan, i warawaai naa a taara diat a nukpuku ma din baapitaaiso diat, ma God in una wa anundiat kum aakaina mangamangaan.

⁴ Welaar ma di aa timu taai u ra buk anu ra propet Aaisaia naa, “In ingaan raa i wewataai u ra bil na wanua lenbi, ‘Muaat a paam aara aakapi anu ra Tadaaru, muaat a paam kado anuna kum aakapi.

⁵ A kum maale raap din punang diat ma a kum tiltil raap ma ra kum taangaai din kil kado diat. A kum aakapi baa i pagol din wakadoi, ma a kum wanua i tungtung, din punang kadoi.

⁶ Ma a taara raap diat a babo a warwalaaun anun God.’” Aais 40:3-5

⁷ A kor na taara diat waan paat karom Ioaanes kupi in baapitaaiso diat. Ma i piri taan diat naa, “Aai, muaat a kum natu ra kum wui! Woi maa i piri naa muaat a kalaa ino ko ra naagagon na binabaalu anun God baa in waan paat?

⁸ Muaat a paam a kum utnaa baa in wapuaanai naa muaat aa nukpuku. Ma koku muaat nuki naa God pa in naagagon muaat maa kabina muaat a wuna taara anun Aabaraam. Iaau piri taa muaat naa, God i pet laar paai kupi in paam apaat paa a wuna taara anun Aabaraam ko ra kum waat bi.

⁹ Di aa ung taa a naawa naa ra kum kapkabina diwaai, ma a kum diwaai raap baa pa diat wa ta koina waindiat, din bur wa diat, ma din ong ta diat u ra nguan.”

¹⁰ A kor na taara diat tiri naa, “Aawa maa miaat a paami?”

¹¹ I baalu diat naa, “Ia baa anuna ta ruina maalu na minong, in taar taa tin taan te baa pa nuna tina maalu na minong, lenkaai maa u ra utnaa na winangaan.”

¹² Ma raa kum tena lolo tatakom diat waan paat kupi in baapitaaiso diat. Ma diat tiri naa, “Tena wawer, aawa maa miaat a paami?”

¹³ Ma i baalu diat naa, “Koku muaat lo a tatakom i ngaala taa ra toto di aa naagagon taai.”

¹⁴ Ma raa kum tena wineium diat tiri naa, “Ma miaat, aawa maa miaat a paami?” Ma i baalu diat naa, “Koku muaat pet na kaankaan biaa paa ku a maani ko ra taara, ma koku muaat wetakun warwaruga, muaat a gaaia paa ku anumuaat wedok.”

¹⁵ A taara diat kiki walaang kup Kaarisito. Baa diat walangoro Ioaanes, diat nuki naa kanaapi Kaarisito ma mi ia waan paat.

¹⁶ Ma Ioaanes i piri taan diat raap naa, “Iaau baapitaaiso muaat ma ra palaa, iaku ia baa i ngaala taang in waan paat, in baapitaaiso muaat ma ra Takado na Nion ma ra nguan. Ma iaau, iaau kinalik aakit taana.

¹⁷ I paam paa anuna saaol u ra limaana kupi in ong weraana a panina wit ko ra wit mulu. Baa ia wali raap taai in ung ungaai anuna wit u ra nuna ruma na wit, ma in tun wa a kum panpanina u ra nguan baa pa in maat.”

¹⁸ Baa Ioaanes i warawaai karom diat ma ra Koina Wewapua i wadekdek diat ma ra mongoro na pirpir kupi diat a puku anundiat mangamangaan.

¹⁹ Ma Ioaanes i pirpir dekdek karom Erodes a mukmuga, kabina maa i taulaa balet ma Erodiaa, a tabuan anun tenalik. Ma i pirpir dekdek u ra kum aakaina utnaa raap kaai baa Erodes ia paam taai.

²⁰ Ma Erodes i paam balet ku aakaina mangamangaan baa i waruk taa Ioaanes u ra ruma na karabus.

Ioaanes i baapitaaiso Iesu

²¹ Baa Ioaanes i baapitaaiso a taara raap, i baapitaaiso kaai Iesu. Ma baa i aaraaring, a maawa i tapaapa,

²² ma a Takado na Nion i waan pari, i ung a panina welaar ma ra ina buna, ma i ki taau nate un Iesu. Ma in ingaan raa taanginaanga u ra maawa i piri lenbi, “Ui Natunglik, a naat na wakwakaak, iaau gaaia aakit un ui.”

A niluluk na wuna taara anun Iesu

²³ Iesu i turpaa anuna pinapaam baa i 30 duk anuna kilaala na lalaaun. Ia a natun Iosep, a nuknuki ra taara ku lenmaa. Iosep a natun Eli,

²⁴ Eli a natun Maataat, Maataat a natun Lewi, Lewi a natun Melki, Melki a natun Iaanaa, Iaanaa a natun Iosep,

²⁵ Iosep a natun Maatatio, Maatatio a natun Aamos, Aamos a natun Naaum, Naaum a natun Esli, Esli a natun Naagaai,

²⁶ Naagaai a natun Maat, Maat a natun Maatatio, Maatatio a natun Semein, Semein a natun Iosek, Iosek a natun Iodaa,

²⁷ Iodaa a natun Ioaanaan, Ioaanaan a natun Resaa, Resaa a natun Serubaabel, Serubaabel a natun Salaatiel, Salaatiel a natun Neri,

²⁸ Neri a natun Melki, Melki a natun Aadi, Aadi a natun Kosaam, Kosaam a natun Elmaadaam, Elmaadaam a natun Er,

²⁹ Er a natun Iosua, Iosua a natun Elieser, Elieser a natun Iorim, Iorim a natun Maataat, Maataat a natun Lewi,

³⁰ Lewi a natun Simion, Simion a natun Iuda, Iuda a natun Iosep, Iosep a natun Ionaam, Ionaam a natun Eliaakim,

³¹ Eliaakim a natun Melea, Melea a natun Menaa, Menaa a natun Maataataa, Maataataa a natun Naataan, Naataan a natun Dewid,

³² Dewid a natun Iese, Iese a natun Obed, Obed a natun Boaas, Boaas a natun Saalmon, Saalmon a natun Naason,

³³ Naason a natun Aaminadaab, Aaminadaab a natun Aadmin, Aadmin a natun Aarni, Aarni a natun Esrom, Esrom a natun Peres, Peres a natun Iuda,

³⁴ Iuda a natun Iaakob, Iaakob a natun Aaisaak, Aaisaak a natun Aabaraam, Aabaraam a natun Teraa, Teraa a natun Naakor,

³⁵ Naakor a natun Seruk, Seruk a natun Raagaa, Raagaa a natun Pelek, Pelek a natun Eber, Eber a natun Saalaa,

³⁶ Saalaa a natun Kaainaan, Kaainaan a natun Aapaakaad, Aapaakaad a natun Sem, Sem a natun Noaa, Noaa a natun Laamek,

³⁷ Laamek a natun Maatusaalaa, Maatusaalaa a natun Enok, Enok a natun Iaared, Iaared a natun Maalelel, Maalelel a natun Kaainaan,

³⁸ Kaainaan a natun Enos, Enos a natun Set, Set a natun Aadaam, Aadaam a natun God.