Mataio 20 - A Buk 1896 (Bible Portions)

20. PAKANA.

¹ Kuma a matanitu ko ra maua diara welara ma ra petpalig, ba i pari u ra malana kabot lena in ben diat a kum tenawogoro u ra nuna pinapam‐na‐vaine.

² Ma ba i pakta diat mun lena in dok diat taktaka na denarion ku rā bug i tula diat u ra nuna pinapam na‐vaine

³ I pari balet u ra tul a pakan a bug, ma i bobo rā tara bulug ba diat turu bia ku u ra matanabug;

⁴ ma i piri ta diat, Muat bulug muat wan u ra pinapam‐na‐vaine, ma ra lig ba i takado, kura ag tari ta muat. Ma diat taram.

⁵ I pari balet u ra nom na pakan a bug, ma u ra limadi ma watdi a pakana kai, ma i pet lenkuma.

⁶ U ra no pakana ma ra i pari balet, ma i bobo ta tara bulug ba diat turu bia ku; ma i tiri diat, lena, Lelawai kuma muat turu bia tau ku u ra kudulana bug kumi?

⁷ Ma diat piri tana, Kăbi pa te i ben miat. I piri ta diat, Muat bulug muat a wan u ra pinapam‐na‐vaine.

⁸ Ba malurap ma a tadaru na pinapam i piri ta ra nuna wetula lena, Un watapa diat a kum tena‐wogoro, un tari ta diat a nudiat wedok, ma un dok a mukapa diat ba diat murumuru, un dok a murumuru diat ba diat muka.

⁹ Ma diat ba diat ben diat u ra no pakana ma ra, di tari taktakai a nudiat denarion.

¹⁰ Ma diat ba di ben a mukapa diat, diat kanapi lena din tari ta gala ta diat; ma diat kai di tari ta diat taktakā na denarion ku.

¹¹ Ma ba diat rakanpai diat alalai a petpalig,

¹² Ma diat lena, Diat a kum tintinipina bi diat papam u rā pakan a bug ku, miat ku miat lo a kinikip i ra bug kumi, ma ra uan pi kai, ma u dok welara miat ku ma diat!

¹³ Ia kai i piri ta ra pa diat lena A tepag, pa ta lig i pakol iau peti korom ui: dara wepak ma ui kup ra denarion, ni?

¹⁴ Un rakanpa a num lig, un wan ku; kuma iau ligna tari ta ra tintinipina bi lenkuma iau tari tam.

¹⁵ Pa i ka duk ba iau ku iau nakokon u ra nug utna? pikoina duk a matam kăbi iau a koina?

¹⁶ Len kai kuma a kum tintinipina, kura diat a muka, ma diat ba diat muka kura a tintinipina ma diat.

¹⁷ Ma ba Iesu i wan toto u Ierusalem, i benigenpa diat a winunu ma ruadi a nuna tara‐na‐wawera, ma i wapua diat u ra akapi lena,

¹⁸ Boboi, dat wan toto u Ierusalem; ma din taram‐arua na Tu‐ra‐muana korom diat a kum tadaru na pinapet ma ra kum tenatimtimu, ma kura diat a nakokon un i lena diat a umua i;

¹⁹ ma diat a taram‐arua i korom diat a Tara‐igen, ba diat a tatauru un i ma diat a rapu i, ma diat a akwatai u ra kabai: ma tul a bug in lalaun balet.

²⁰ Ma ra nadiara na tun Sebedaio i wan korom i, ma ru na tunalik muana, ma i tutudug korom i, ma i arig kup ta lig tana.

²¹ Ma i tiri lena, Awa kuma u lig kupi? I piri tana Un nakokon u diara ru na tunalik bi lena, ta pa diara in ki u ra waot na limam, ma rā pa diara u ra mai ra na limam u ra num matanitu.

²² Ma Iesu i piri lenkumi, Pa mutul nunurai a lig kuma mutul arig kupi: muru inim larapai duk a la ba ag inimi kalikmaku? Diara piri lena, Mira inim larapai.

²³ I piri balet ta diara, A ligtatuna, kura muru inim a mag la: ma pa iau nakokon a kiki u ra waot na limag ma u ra maira na limag, din tari korom diat ku ba a Tamag i tokonotai kup diat.

²⁴ Diat a win unu, ba diat walogoroi, diat lig na murudina.

²⁵ Ma Iesu i watapa diat korom i, ma i piri ta diat, Muat nunurai lena, a kum tadaru a nu ra Tara‐igen diat nakokondokopa diat, ma ra nudiat uiana, diat nakokon u diat.

²⁶ Koniku in lenkuma taka namuat: ia ba i lig na tadaru un muat, kura ut a numuat wetula ia:

²⁷ ma ia ba i ligna muka un muat, kura ut a numuat papalai ia:

²⁸ Lenkuma na Tu‐ra‐muana pa i wan pat lena din taram korom i, i wan kag urin lena in taram ku, ma in wekulbat diat a mogoro ba in wiruana diat.

²⁹ Ba diat wan taka Ieriko a tara‐na‐kaiya diat patap un i.

³⁰ Ma boboi, ru muana diara pula diara ki u ra papara akapi, ba diara walogoroi lena Iesu i wan akit nadiara, diara wata i lena, Tadaru, na Tun David, un mari mira.

³¹ Ma ra tara‐na‐kaiya diat wadubat diara lena diara papaki ku: ma diara wewatai akit, lena, Tadaru, na Tun David, un mari mira.

³² Ma Iesu i turu ma i watapa diara, ma i tiri diara lena, Awa kuma muru nemi ba ag peti un muru?

³³ Diara piri tana, Tadaru mira ligna bobo.

³⁴ Ma Iesu i mari diara, ma i tukta a matadiara: ma diara bobo ma ut, ma diara patap un i.