Mataio 12 - A Buk 1896 (Bible Portions)

10 PAKANA MA 2.

¹ U ra pupukai kuma Iesu i wan akit u ra kum pinapam na padi u ra bug tabu; ma diat a nuna tara na wawera diat molo, ma diat kitakilapapa a kurakura padi, ma diat ani.

² Ma diat a kum te Faresaio ba diat boboi, diat piri tana, Boboi, a num tara na wawera diat pet a lig ba di watabui u ra bug tabu.

³ I piri ta diat, Pa muat luki utbai duk a lig kuma David i a petai ba i molo, ma diat kai ba diat weuru ma i;

⁴ kuma i ruk u ra ruma a nun Nara, ma i anpa a mandrai‐na‐tamtama, ia ba di watabui korom i, korom diat kai diat weuru ma i, a diat ku a kum tenapinapet?

⁵ Pa muat luki kai u ra wewapua lena, A kum tenapinapet u ra ruma‐na‐wetu diat pet a mampa a bug tabu ma pa diat rara uni.

⁶ Iau kai iau piri ta muat lena, Rā i tana kumin i gala u ra ruma‐na‐wetu.

⁷ Ba muat a nunuratai mun a pipilai ra pirapira kumi, iau nemi ku a maramari ma pate a wekul, pa muat a takunai diat pa diat rara.

⁸ Kuma na Tura‐muana a Tadaru i ra bug tabu ia.

⁹ Ma i wan taka iai ma i ruk u ra nudiat ruma‐na‐lotu;

¹⁰ ma boboi, i ki uni rā muana ba i mat a limana. Ma diat tiri Iesu lena, I ka duk ba di wakadelpa te u ra bug tabu, ba pate? kuma diat ligna takuna i.

¹¹ Ma i tiri diat uni lena, O oi na muana ta pa muat, ba rā ma ku a nuna sipi, ma i pukatau u ra babag u ra bug tabu, pa in wan duk, in pami ma in lo‐atotoi na te taka iai?

¹² Ma lelawai duk a muana, i ka akit u ra sipi, ni? Ia kuma i ka uni ba di pet a lig awakak u ra bug tabu.

¹³ Ma i piri ta ra muana, Un kado a limam. Ma i kadoi; ma i lalaun balet le ra limana balet.

¹⁴ Ma diat a kum te Faresaio diat pari u na taman, ma diat pigit a na maden.

¹⁵ Ma ba Iesu i nunurai i wan taka iai: ma mogoro na tara diat patap un i: ma i wakadelpa diat rap:

¹⁶ ma i pirabat diat lena, koniku diat pirapuana i:

¹⁷ ba in wewaot uni a pirapira Isaia a parofita i wapuamukatau uni lena,

¹⁸ Boboi, a nug wetula, ia ba iau tikan‐walipa i; a nug nat na wakaek, a niog i kaia akit un i: ag pakita a niog un i, ma in wapua a nakokon ba i takado korom diat a Tara‐igen.

¹⁹ Pa in pirapuli, ma pa in wewatai u na te; ma pa in te in walogoro a igana u ra kum akapi.

²⁰ A wuwuru ba i talupa pa in pet‐boro‐matuai, ma pa in pukdokoua a malu na lama ba i mi kubai, un ta bug na wanua in tuluai uni a nakokon ba in uianatau.

²¹ A kum Tara‐igen kai, kura diat a nurutau u ra iana.

²² Ma di benpa te korom i ba a tebaran i og i, i pula ma i mutmut kai: ma Iesu i wakadelpa i, kuma ia ba i mutmutpa, i pirapira, ma i bobo ma ut.

²³ Ma diat a kum tara‐na‐kaiya diat kakaian rap uni, ma diat piri lena, Ia bi na Tun David ni?

²⁴ Ma diat a kum te Faresaio ba diat walogoroi diat piri lena, A muana bi, ba ia ku, pa i lurua diat a kum tebaran; i lurua diat u ra dekdek a nun Beelisibul ku a tadaru a nu ra kum tebaran.

²⁵ Ia kai i nunura a nuknukidiat, ma i piri ta diat, A matanitu ba i turu werantau ia ku, kura ku din wabapuai; a taman kai, ba a ruma, ba i ki werantau ia ku, pa in tana takum:

²⁶ Ba Satan i lurua Satan, i tana werantau ia ku, ma in tana takum lelawai a nuna matanitu?

²⁷ Ba iau lurua diat a kum tebaran u ra dekdek a nun Beelisibul, lelawai a kum tepamuat? diat kai diat lurua diat u ra dekdek a nun oi? Kuma diat ba diat a nakokon muat.

²⁸ Iau kai ba iau lurua diat a kum tebaran u ra dekdek ko ra Nion Nara, i wan pat uni korom muat a matanitu a nun Nara.

²⁹ Te in ruk lelawai u ra ruma a nu ra uiana ma i rakanpa a nuna utna ba pa i do‐a‐kototai mun a uiana? ma na muru in rakanpai marakam a nuna utna.

³⁰ Ia ba pa mira paluug ma i, diara paluug ma te igen; ma ia ba pa mira kon ugai ma i, i ogoguai.

³¹ Ia kuma iau piri ta muat uni lena, Din una larapai a petakakai rap a nu ra tara, ma ra nudiat pira‐ululi kai un Nara; a pira‐ululi u ra Niono‐Tabu ku pa din una larapai.

³² Ia ba i pirapira pikoina u na Tu‐ra‐muana, din una larapai a nuna pirapira‐pikoina; ma ia kai ba i pirapira pikoina u ra Niono Tabu pa din una larapai a nuna pirapira‐pikoina, u ra pupukai kumi, ma un te bulug ba kura in muru pat.

³³ Muat pam a diwai ba in wakak, ma in wakak bulug a uaina; ba pa i lenkuma, muat pam a diwai ba in pikoina ma in pikoina bulug a uaina: kuma di nunura a diwai ko ra uaina.

³⁴ A kum bulumuru na ui muat, muat pikoina ku, ma muat a piri lelawai a kum kokoina lig? kuma a wadi i piri ku u ra lig a baladi i teg mai.

³⁵ A koina muana i uarere a koina lig ko ra nuna ka na kokoina utna: akaina muana kai i uarere akaina lig ko ra nuna ka na akakaina utna.

³⁶ Iau piri ta muat, a kum pirapira bia ku rap a kum tara diat piri, kura din tiri diat uni u ra bug na nakokon.

³⁷ Kuma, kura din pam kado ui u ra num pirapira, ma kura din mag ui kai u ra num pirapira.

³⁸ Ra magan ko diat a kum tenatimtimu ma ra kum te Faresaio diat piri tana, Tenawawera, miat ligna bobo ta wakinilag kon ui.

³⁹ I piri ta diat lena, A tauntara pikoina, ma raugana makiradiat, diat auare kup ta wakinilag, ma pa din tari ta wakinilag korom diat, a wakinilag ku in Iona a parofita:

⁴⁰ lenkuma Iona i tana tul a bug na keke ma tul a bug na marum u ra bala ra in a ien pi; len kai kuma na Tu‐ra‐muana in tana tul a bug na keke, ma tul a bug na marum u ra bala ra pia.

⁴¹ A tara Nineve kura diat a tana ugai u ra bug na nakokon ma ra tauntara kumi, ma diat a pet‐a‐puanapa a numuat petakakai: kuma diat nukpuku diat u ra wawera a nun Iona; ma boboi, rā i tana kumin i gala un Iona.

⁴² A ranandi kai ko ra matan a taubara kura in turu u ra bug na nakokon, ma in pet‐a‐puanapa a petakakai a nu ra tauntara kumi; kuma ia ut i wan urin tak u ra kali ra vuravura ba in walogoro a manana a nun Solomon; ma boboi, Rā i tana kumin i gala un Solomon.

⁴³ A tebaran ba i pari ko ra muana, i wan bolo u ra kum bual i makeke akit, kuma i auare kup ta manmanatug, ma pa i auarepai.

⁴⁴ Ma i piri lena, Ag wan talili u ra nug ruma, ia ba iau wan koni; ma ba i wan pat, i boboi lena i kapkapana, di arupai, ma di maratai kai.

⁴⁵ Ma i wan, ma i benpa ta limadi ma ruadi a tebaran bulug diat pikoina akit un i, ma diat ruk rap ma diat ki takum iai: ma pikoina kinalik na muka a muana kuma, in pikoina akit na muru. Kura ut in lenkuma kai a tauntara pikoina kumi.

⁴⁶ Ma ba i piri kubai ta diat a tara‐na‐kaiya, boboi, nana ma ra kum tetenaliklik diat turu na taman, kuma diat ligna pirapira korom i.

⁴⁷ Ma te i wapua i lena, Boboi, nam ma ra kum tetemliklik diat turu na taman, ma diat ligna pirapira korom ui.

⁴⁸ Ma i piri tan ia ba i wapua i uni lena, O oi nakug? O oi diat kai a kum tetegliklik?

⁴⁹ Ma i kado a limana korom diat a nuna tara na wawera, ma i piri lena, Boboi nag, ma diat kai a kum tetegliklik!

⁵⁰ Kuma ia ba i taram u ra wetula a nun Tamag i ki u ra maua, a teglik a muana, ma ra teglik a tebuan ia, ma nag kai.