Maarko 7 - A Buk 1896 (Bible Portions)

7 A PAKANA.

¹ Ma ra kum te Faresaio, ma ta magan ko diat a kum tenatimtimu, diat wān taka Ierusalema, diat tolug ugai korom i.

² Ma diat boboi ta magan a nu diat a nuna kum tara wawera diat wagan adiat utna ma limadiat i duru ku, ma pa diat kiki a muka pa a limadiat.

³ Kuma diat a kum te Faresaio, ma ra kum tara Iudaia rap, ba pa diat kiki na kuru mun a limadiat, pa diat wagan, kuma diat taram u ra wawera a nudiat a kum takana.

⁴ Ma ba diat wan talili ko ra bug, pa diat wagan, ba pa diat kiki‐a‐muka pa; ma magoro a kum lig lenkuma, diat urunioat uni ma taram uni, lenkumi, a duri a kum la na inim, ma ra kum la na tutun ma ra kum la na barasa kai.

⁵ Ma diat a kum te Faresaio ma ra kum tenatimtimu diat tiri tana lenkumi, Lelawai kuma diat a num kum tara wawera pa diat taram u ra wawera a nudiat a kum takana, ma diat wagan a diat utna ma pa diat ki muka pa a limadiat.

⁶ Ma i piri ta diat, lenkumi, Isaia i ā parofesai na kuru un muat, a kum tara waruwaruka, lenkumi. “A kum tara kumi diat ururuni iau ma buli na wadiat, ma ra nuknukidiat i welwelik kon iau.

⁷ Pa i ka a nudiat lotu korom iau, kuma a nudiat wawera diat wawera uni, a onowa ra tara ku.

⁸ Muat paki‐ruai a nakakon a nun Nara, ma muat pam‐a‐kotoi ku a kum wawera a nu ra tara.”

⁹ Ma i piri ta diat, lenkumi, Muat patpatuk ku u ra wetula a nun Nara, ma muat taram ku u ra numuat wawera biaku.

¹⁰ Kuma Mosese i ā piri, lenkumi, Un ururu u diara Tamam ma Nam: ma bia bulug, Te i piri ululi un Tamana ba Nana, auaka ba di um dokoi;

¹¹ Ma muat ma, Muat lena, Ba te i piri tan Tamana ba Nana, lenkumi, A nug ta lig i ka korom ui i Kabano, a pipilaina kumi, di watabui un Nara;

¹² Pa muat nemi ba in warauti balet tamana ba nana;

¹³ Ia kuma muat pakiuai uni a pirapira a nun Nara u ra numuat wawera muat wera diat uni: ma magoro a lig lenkuma muat peti.

¹⁴ Ma i wata balet korom i diat a kum tara, ma piri ta diat, lenkumi. Muat rap muat walagoro iau, ma muat manana uni:

¹⁵ Pa ta lig taka na maru ru tara, ba i ruk uni i pet‐a‐durupa ia;

¹⁶ A kum lig ku diat pari koni, diat ku, diat pet‐a‐durupai a tara.

¹⁷ Ma ba i ruk balet u ra ruma ko diat a kum tara, a nuna kum tara wawera diat tiri korom i kup a pipilaina a nu ra pirapira welwelara.

¹⁸ Ma i piri ta diat, Muat bakai bulug, pa muat manana lenkuma ni? Pa muat nunurai ut, a lip rap diat wan u ra balara tara taka na maruna ku pa diat pet a durupai ia;

¹⁹ Kuma pa diat ruk u ra nuknukina, diat ruk u ra in balana ku, ma di og‐uai koni? I piri lenkumi ba in pet kokoina a kum utna rap.

²⁰ Ma i piri, lenkumi, A lig i pari ko ra tara, ia ku i pet a durupai a tara.

²¹ Kuma i pari ko ra baladiat a kum tara, a kum kankanap pikoina,

²² A pet na tinauru, a winalog, a umum biaku a tara, a pet walog, a kogkog akaina, a pet akakai, a waruwaruka, a garagara, a matana wetabua; a pirapira ululi, a amaman ma ra loglog biaku;

²³ A kum akaina lig rap kuma diat pari ko ra bala ra tara ma diat pet‐a‐durupai.

²⁴ I wan ko ra bual kuma, ma wan igen u ra papara bual Turo ma Saidonu. Ma i ruk u ra ruma, ma pa i nemi ba te i nunura ia, ma i kana wan a wino larapai.

²⁵ Ma ra tebuan a tebaran pikoina i ogi na tunalik wawina i walogoroi uni, ma i wan ma puka pari na ra kakina.

²⁶ A tebuan Eleni ia, di butatai u Suria Foiniki. Ma i arig tana in lu‐ruai a tebaran kon a tunalik wawina.

²⁷ Ma Iesu i piri tana, Auakak ba diat mauru pa mun a kum nat: kuma pa i ka ba di rakani a utna a nu ra kum nat ma ogi ta ra kum pap.

²⁸ Ma ia i urunioat lenkumi, Maio, Tadaru: kuma diat a kum pap na tudu ra tebel diat ani a mutamuta na utna a nu ra kum nat.

²⁹ Ma i piri tana, un wan ma; a tebaran i pari kon a tumlik wawina, a binabalu bi u ra num pirapira kuma.

³⁰ Ma i wan u ra nuna ruma, ma i boboi na tunalik i nep u ra ininep, ma ra tebaran i a pari koni.

³¹ Ma i wan balet ko ra bual Turo, ma i wan aluru Saidonu kai, u ra tai na Kalilaia, i wan aluru kai a kum pitpitin Tekapoli.

³² Ma diat kipi koromi a muana i bauret ma tatekatol; ma diat arig i in paki a limana uni.

³³ Ma i kip igeni a muana kon diat a kum tara, u ra bual diara ma ku i ai, ma i warukta a kalkalina limana u ra teligana, ma i kara, ma tukta a karamen‐a‐wana;

³⁴ Ma i tatada kai u ra maua, ma i maluor ma piri tana, Efata, a pipilaina kumi, Din papai.

³⁵ Ma di papai na ru teligana, ma di palai a lig i a do kotoi a karamen‐a‐wana, ma i pirapiri na kuru.

³⁶ Ma i pira bat diat koniku diat wapua te uni; ma ba i tikal bat diat, diat pet‐a‐gati a nudiat pirapuanai korom diat a kum tara.

³⁷ Ma diat kakaian akit uni ma diat lena, I pam na kuru a lig rap: i pam walogoro pa diat a kum bauret, ma ra kum tara mutmut diat a pirapiri.