Maarko 13 - A Buk 1896 (Bible Portions)

13. A PAKANA.

¹ Ma ba i pari ko ra ruma na lotu, ra pa diat a nuna kum tara wawera i piri tana, lenkumi, Tenawawera, Un bobo a kum wat gala ma ra kum ruma galapi bi!

² Ma Iesu i piri tana, U bobo ni a kum ruma galapi kumi? kura ut ta bug ba pa ta wat in tana wedaun un te bulug, din reg‐a‐pari rapuai.

³ Ma ba i ki u ra tagai Olive na ra ruma na lotu, Petero ma Iakobo ma Ioane ma Aniderea diat tiri‐a‐winoi un i,

⁴ Un wapua miat U nagaian duk din peti a kum lig kuma? Awa bulug a wakinilag i puā ba in pot na wewoatpai a kum lig kumi?

⁵ Ma Iesu i pira kabinpai ta diat, Muat katom kaduk te in ben a rara‐ua muat.

⁶ Kuma magoro diat diat a wan urin u ra iag, ma diat lena, Iau kumi a Karisito; ma diat a ben a rara‐ua diat a magoro na kum tara.

⁷ Ma ba muat walogoro u ra wineum ma ra wewapua u ra wineum, koniku muat garā uni; i ka ba in wan pat a kum lig kuma; ma pa ba ut a tintinipina.

⁸ Kuma ra un‐a‐tara diat a weum ma ra un‐a‐tara bulug, ma ra matanitu diat weum ma ra matanitu bulug: ma kura kai a kum kuria u ra kum bual; ma ra kum minolo kai: a kum lig kuma a kabina ku u ra gala na tapunuk.

⁹ Ma muat ma, muat katom: kuma diat a taram‐a‐ruai muat korom diat a kum tara nakakon; ma din raputa muat u ra kum ruma na lotu; muat a turu kai na ra matadiat a kum tadaru nakakon ma ra kum kig kuma muat nemi iau, ma kup ta wakinilag korom diat.

¹⁰ Ma din wapua a muka a wewapua auakak korom diat a kum un‐a‐tara rap.

¹¹ Ma ba diat ben muat ma taramaruai muat korom diat diat a nakakon muat, koniku muat nunukdokodoko muat u ra pirapira muat a pirapiri uni: muat piri ku u ra lig kuma din tari ta muat u ra pakan a bug kuma: kuma pa muat a piri, a Niono Tabu ku in piri u ra balamuat.

¹² Ma ra tenalik din tar uai tenalik in mat, ma ra tamana din tar‐uai na tunalik; ma ra kum nat diat a weum ma tamadiat ma nadiat, ma um doko diat.

¹³ Ma ra kum tara rap diat a mag muat akit kuma muat nemi iau: ma ia ba in turu patpatuan in tuk u ra tintinipina, ia kuma din walaunpai.

¹⁴ Ba ta bug muat bobo a lig na milmiluan, i turu u ra pakana di watabui uni, (ia ba i luki auakak ba in manana uni) i auakak u ra kum tara diat tana u Iudaia diat a laun u ra kum tagai:

¹⁵ Ma ia ba i ki na te u ra ruma koniku i pari i ai, ma konima in ruk u ra ruma, lena, in rakanpai ta lig koni:

¹⁶ Ma ia ba i ki u ra pinapam koniku i wan talili u ra taman kup a nuna malu.

¹⁷ A kum peu diat ba diat kip bala ma diat kai diat wagātu u ra pupukai kuma!

¹⁸ Ma muat arig koniku din peti a lig bi u ra pupukai na mudian.

¹⁹ Kuma a kum bug na gunugut in wan pat, pa ta gunugut diara welara mai, tak u ra pam kabinpa a lig rap ba Nara i pam marakam a rakrakan bual in tuk u ra pupukai kumin, ma pate balet din peti lenkuma na muru pa in rap.

²⁰ Ma ba Tadaru pa i pam a tiktik pa a kum bug kuma, pa ta tara i lalaun: ma ia, i ā pam a tiktikpa a pupukai kuma, kuma i nem diat a kum tara na walwaliana, diat ba i tikan‐walipa diat.

²¹ Ma kumi, ba te in piri ta muat, lena, Boboi, a Karisito kumi; ba, boboi, ia kuma; koniku muat taram uni:

²² Kuma magoro a kum Karisito waruwaruka ma ra kum parofita waruwaruka diat a wan pat, ma diat weai ta muat a kum wakinilag ma ra kum lig na kakaian, ba diat a ben a rara‐tamai uni a kum tara na walwaliana.

²³ Muat katom, Boboi, iau wapua‐a‐mukata muat uni.

²⁴ Ma ba i rap a pupukai na gunugut kuma, a make in ria ma ut, ma ra kalag kai pa in puā a kapakapa,

²⁵ Ma ra kum nagnag kai diat a manunu pari ko ra lagit, ma ra kum dekdek na lig i ra maua diat a takunakuna.

²⁶ Ma diat a bobo na Tu‐ra‐Muana ba in wan pat u ra kum bakut ma ra dekdekina ma nuna mărămără galapi.

²⁷ Ma in tul‐a‐weranua diat a kum agelo, ma diat a watolug ugai diat a nuna kum tara na walwaliana tak’ u ra wat na matara dadaip, ma tak’ u ra paparina na tudu ra maua i welwelik akit, ma tak’ u ra paparina welwelik akit u ra maua.

²⁸ Kumi, muat walogoro a nuna pirapira welwelara ko ra diwai na fiki: ba kakakana i kalom kubai, ma i taradono marakam, muat nunurai uni a pupukai na uan i matiti;

²⁹ Lenkuma kai muat, ba muat bobo a kum lig kumi diat pot na wewoatpai, muat nunurai uni i matiti ku, i turu na ra bonanaka.

³⁰ A ligtatuna iau pira ta muat, A tauntara kumi pa in wan igen, ba pa din pet a wewaotpai a kum lig kumi.

³¹ Din wan igen a maua ma na tudu ra maua: a nug kum pirapira ku pa diat wan igen.

³² Ma pa ta muana i nunurai a bug kuma ba ra pakana bug kuma, a kum agelo u ra maua, ma ra Tunalik kai pa diat nunurai, a Tamana ku i nunurai.

³³ Muat katom, muat ki lauma ma papet: kuma pa muat nunurai u nagaian a pupukai kuma in wan pat.

³⁴ Lenkuma ra muana, i wan igen ko ra nuna ruma ma i ki na waira u ra ugana bual, ma i tari ta diat a nuna kum wetula a nakakon, ma i waputata diat taktakai a nuna pinapam, ma i tulai a tena warua‐ruma in bobourai.

³⁵ Kumi, muat bobo urai: kuma pa muat nunurai ta bug a Tadaru a nuna na ruma in wan pat, ba u ra malurap duk, ba u ra liwan a bual, ba u ra kurakurekatu na kereke, ba u ra malana;

³⁶ Kaduk in wan wakaian, ma i bobo muat muat inep ma ku.

³⁷ Ma ra lig bi iau pira ta muat, iau piri bulug korom a tara rap, Bobo‐urai.