Maarko 11 - A Buk 1896 (Bible Portions)

11 A PAKANA.

¹ Ma ba diat wan matiti Ierusalema, u Betefake ma Betania, u ra tagai Olive, i tulua ta ruadi ko diat a nuna kum tara wawera,

² Ma i piri ta diara lenkumi, Muru wan u ra taman na muka ta muru: ma ba muru ruk marakam i ai, muru bobo a nat na asa di pitakototai, pate utbai ta muana i ā ka uni; muru palai, ma kipi urin.

³ Ma ba te i tiri muru uni, Lelawai muru peti a lig kumi? Muru piri tana, A Tadaru i nemi; ma in tula a kakaua urin.

⁴ Ma diara wan, ma diara boboi a nat na asa di pitakototai na ra bonanaka u ra akapi; ma diara pot na palai.

⁵ Ma ta magan diat a tara diat turu kuma diat tiri ta diara, Awa kuma muru peti, ba muru palai a nat na asa?

⁶ Ma diara piri ta diat, lenkuma Iesu i a tula diara uni: ma pa diat pira bat diara.

⁷ Ma diara benpai a nat na asa korom Iesu, ma diat lagunta uni a nudiat malu; ma Iesu i ki tau uni.

⁸ Ma magoro a tara diat lagunta a nudiat kum malu u ra akapi; ma ra magan diat buru‐kutuai a kum kakakana diwai, tak’u ra kum pinapam, ma diat laguni.

⁹ Ma ra tara‐na‐kaia diat diat muka tana, ma diat kai diat murumuri, diat wewatai, Osana; I dan, ia kumi i wan u ra iana na Tadaru:

¹⁰ Dat dan u ra Matanitu i wan pat, a Matanitu a nu ra Davida a tamadat: Osana u ra maua na te akit.

¹¹ Ma i wan u Ierusalem, ma i ruk u ra ruma na lotu; ma ba i bobo taliut u ra lig rap, i wan u Betania ma diat a Winunu‐ma‐ruadi, kuma i malurap ma.

¹² Ma u na buru, ba diat pari taka Betania, i molo.

¹³ Ma ba i boboi taka na welwelik a diwai na fiki i burup kuog a dono, i wan karai koromi kuma i ligna nunurai ba ta uaina duk i tana uni: ma ba i wan tauni, pa ta lig i bobo uni, a kum dono ku; kuma pa i ua utbai a taun fiki.

¹⁴ Ma i pirapiri lenkumi uni, Koniku ta tara i wagan a num ta uaina, tak’ ura bug kumi, ma pa in rap. Ma diat a nuna kum tara wawera diat walogoroi uni.

¹⁵ Ma diat wan u Ierusalema: ma i ruk u ra ruma na lotu, ma lu‐kabin‐uai diat a kum tara diat wiura ma diat diat kul utna bala ra ruma na lotu, ma i buli kuopua a kum lu a nu ra kum tenawekiā mani, ma ra kum kinkini a nudiat diat wiura a kum tabun;

¹⁶ Ma i pira‐bat diat koniku te in lotai a ka bala ra ruma na lotu.

¹⁷ Ma i wawera diat, ma piri ta diat. Pa di timutai duk lenkumi, Din watugi a nug ruma a ruma na papet kup diat a kum tara tak’ u ra rakrakan bual rap? ma muat, muat pampai a babag a nu ra kum tena‐werara.

¹⁸ Ma diat a kum tenapinapet gala ma ra kum tenatimtimu diat walogoropai, ma diat nunuk ba diat a um dokoi lelawai: ma diat burutai, kuma diat a kum tara‐na‐kaia diat kakaian u ra nuna wawera.

¹⁹ Ma tiba na bug u ra malurap i wan pari tak’ u ra taman kuma.

²⁰ Ma u ra malana ba diat wan talili, diat boboi en a fiki i marag tuk u ra akarina.

²¹ Ma Petero i kadopoi ma i piri tana, Wenam! Rabai, un bobo, en a fiki u piri na tulatula uni i marag rap.

²² Ma Iesu i piri ta diat, lenkumi, Muat nurutau un Nara.

²³ A ligtatuna iau pira ta muat, Ba te i piri u ra tagai kumi, Din takat ui ma din og takum‐ua ui u na tai; ma pa i lăklăkon tau u ra balana; ma ba i nurutauni in pam waoatpai a lig i pirapiri uni; a lig kura din tari tana.

²⁴ Ia kuma iau pira ta muat, A kum lig rap muat arig kupi ba muat papet, muat nurutauni muat rakanpai, ma kura din tari ta muat.

²⁵ Ma ba muat turu ma papet, ba te i ā pet akakai korom muat, muat madekuai ku, koniku muat magi;

²⁶ Ma ra Tamamuat i tana u ra maua din unuai bulug a numuat pet akakai.

²⁷ Ma diat wan talili u Ierusalema; ma ba i wan wetulut u ra ruma na lotu, a kum tenapinapet gala, ma ra kum tenatimtimu, ma ra kum takana, diat wan korom i;

²⁸ Ma diat tiri tana, lenkumi, A nakakon a nun oi u petpet uni a kum lig kumi? O oi bulug i ā tari tam a nakakon un petpet uni a kum lig kumi?

²⁹ Ma Iesu i piri ta diat lenkumi, Iau kai ag tiri ta muat un ta lig, ma ba muat wapua iau uni, iau kai ag wapua muat u ra nakakon a nun oi iau pampai uni a kum lig kumi.

³⁰ A bapitaiso a nun Ioane takawai duk ia? Tak’ u ra maua duk, ba ko ra tara duk? pira tag.

³¹ Ma diat pirapiri ugai, ma diat lena, Ba dat a piri, Tak’ u ra maua; ia kai in tiri dat balet, Lelawai bakai kuma pa muat nurutau uni?

³² Ma ba dat piri lena, Ko diat a tara ku — diat buruta diat a tara‐na‐kaia: kuma diat rap diat kanapi, lena, A parofita Ioane.

³³ Ma diat piri balet tan Iesu, lenkumi, A lig bi pa miat nunurai. Ma Iesu i piri ta diat, Iau kai pa ag wapua muat u ra nakakon a nun oi iau pampai uni a kum lig kumi.