Matej 22 - I Biblija ki Arli romani čhib

Nesave prihvatinena te aven e Devlese ki gozba, a nesave na

¹ O Isus palem lelja te vaćeri lenđe ano priče:

² “O carstvo e nebosoroi slično sar kad o caro ćerela bijav ple čhavese.

³ I bičhalđa ple slugen palo okola kolai vičime ko bijav, ali on na mangle te aven.

⁴ Palem bičhalđa avere slugen hem phenđa: ‘Vaćeren e vičimenđe: Ače, o hajbai ćerdo. Pekljam najšužo guruvano mas. Sai ćerdo. Aven ko bijav.’

⁵ Ali on na dinde pažnja adalese, nego džele – jekh ki pli njiva, a aver pla bućaja,

⁶ a avera dolinde e carosere slugen, marde len hem mudarde len.

⁷ A o caro holjanđa, i bičhalđa pla vojska hem mudarđa okolen kola mudarde lesere slugen hem tharđa lengiri diz.

⁸ Tegani phenđa ple slugenđe: ‘O bijavi spremime, ali o vičime na inele dostojna te aven.

⁹ Adalese ikljoven ko droma avri tari diz hem vičinen ko bijav đijekhe kas arakhena.’

¹⁰ I adala sluge iklile ko droma hem čedinde sarijen kolen arakhle, hem e bišukaren hem e šukaren, i o than kote ćerđa pe o bijav pherdilo gostonencar.

¹¹ Kad o caro đerdinđa te dikhel e gostonen, dikhlja adari jekhe manuše kova na inele urjavdo ano e bijavesere šeja,

¹² i pučlja le: ‘Amala, sar đerdinđan akari, a na injan urjavdo ano e bijavesere šeja?’ A ov samo trainđa.

¹³ Tegani o caro phenđa e slugenđe: ‘Phanden lesere vasta hem lesere pre hem frden le avri ani naj dur tomina, kote ka ovel baro rojba hem krciba e dandengoro tari dukh.’

¹⁴ Adalese soi but vičime, a hari birime.”

O fariseja našti te dolen e Isuse ko bišukar lafi

¹⁵ Tegani o fariseja džele hem dogovorinde pe sar hovavneste te dolen e Isuse ko lafi.

¹⁶ I bičhalde koro Isus pumare učenikonen e manušencar kola podržinena e Irode te pučen le: “Učitelju, džanaja da vaćereja o čačipe hem na ićereja nikasiri strana, adalese so na dikheja koi kova, nego čačimase sikaveja oto drom e Devlesoro.

¹⁷ Vaćer amenđe so mislineja? Valjani li amen o Jevreja te platina o porez e rimesere carose ili na?”

¹⁸ A o Isus džanđa lengere bišukar mislija, i phenđa lenđe: “Sose mangena te dolen man ki zamka, dujemujengere manušalen?

¹⁹ Mothoven maje i kovanica savaja platinena o porez.” On dinde le denari,

²⁰ a ov pučlja len: “Kasiri slika hem kasoroi anav ki kovanica?”

²¹ A on phende: “E carosoro.” Tegani o Isus phenđa lenđe: “Onda den soi e carosoro e carose, a soi e Devlesoro e Devlese.”

²² Kad šunde adava, ule zadivime, i ačhavde le hem džele.

O sadukeja pučena e Isuse zako uštiba taro mule

²³ Adava dive ale koro Isus nesave sadukeja, kola vaćerena da nane uštiba taro mule, i pučle e Isuse:

²⁴ “Učitelju, o Mojsije phenđa: ‘Te nesavo ženime manuš merela, a na ačhavđa pala peste čhaven, lesoro phral valjani te lel lesere romnja te šaj oj te bijani čhave kova ka ovel nasledniko e mulesoro.’

²⁵ Ađahar, koro amende inele efta phralja. O prvo lelja romnja i mulo, a na ačhavđa pala peste čhaven, i lesiri romni uli romni e dujtone phralesiri.

²⁶ Ađahar hem mule o dujto hem o trito phral, hem ađahar sa o efta phralja.

²⁷ A palo lende sarijende muli hem i romni.

²⁸ Kasiri onda romni oj ka ovel kad ka uštel pe taro mule, a inele dindi ko sa o efta phralja?”

²⁹ A o Isus phenđa lenđe: “Tumen hovavdiljen ko adava, adalese so na haljovena ni o Sveto lil ni e Devlesoro zoralipe.

³⁰ Adalese so, kad ka ušten taro mule, o manuša ni ka len pe ni ka den pe, nego ka oven sar o anđelja ano nebo.

³¹ A zako uštiba taro mule, na čitinđen li ano Sveto lil so o Devel phenđa tumenđe:

³² ‘Me injum o Devel e Avraamesoro, e Isaakesoro hem e Jakovesoro’ kola mule odavno? A o Devel nane Devel e mulengoro, nego Devel e dživdengoro.”

³³ Kad o narodo šunđa adava, ule zadivime lesere sikavibnaja.

O najbare naredbei te mangel pe e Devle hem e pašutne

³⁴ I kad o fariseja šunde so o Isus trainćerđa e sadukejen, čedinde pe,

³⁵ i jekh olendar kova inele učitelj e zakonestar, sar te dolel e Isuse ki zamka, pučlja le:

³⁶ “Učitelju, savi najbari naredba ano zakoni e Mojsijasoro?”

³⁷ A o Isus phenđa lese: “ ‘Mang e Gospode te Devle sa te vileja, sa te dušaja hem sa te gođaja.’

³⁸ Adajai prvo hem najbari naredba.

³⁹ A i dujtoi slično akalaće: ‘Mang te pašutne sar korkore tut.’

⁴⁰ Sa o naredbe oto Zakoni hem o lila e prorokonengere terđovena ko akala duj naredbe.”

O Hrist po baroi e carostar e Davidestar

⁴¹ A sar o fariseja pana inele čedime, o Isus pučlja len:

⁴² “So mislinena e Hristestar? Kasoroi ov čhavo?” On phende lese: “E Davidesoro.”

⁴³ A ov pučlja len: “A sose onda o David, ano Duho vičini e Hriste Gospod vaćerindoj:

⁴⁴ ‘O Gospod phenđa mle Gospodese: Beš ko počasno than, oti mli desno strana, đikote na pašljarava te neprijateljen talo te pre’?

⁴⁵ Te o David vičini le ‘Gospode’, sar onda o Hrist šaj te ovel samo lesoro čhavo?”

⁴⁶ I niko na džanđa so te phenel lese ko adala lafija. Taro adava dive nijekh više na tromandilo te pučel le nešto.