TITO 2 - Nuevo Testamento en Quichua Cañar 1996

Cashcallatac yachachinamanta

¹ Can yachachicushpaca, Diosmanta yachachishca shinata c'atishpa yachachingui.

² Ñaupa huiñai taitacunataca mana p'iñaric, mana pucllaric, alli yuyaiyuc, alli cric, c'uyac, mana p'iñarishpa llaquita apac cachun yachachingui.

³ Shinallatac ñaupa huiñai huarmicunataca criccuna ima shinami causana shinallatac causashpa, mana huashalla parlaric, mana machac, ashtahuanpish allita yachachishpa causachun yachachingui.

⁴ Ñaupa huiñai huarmicunaca chashna causashpami, q'uipa huiñai huarmicunataca cusata c'uyanatapish, huahuacunata c'uyanatapish yachachina can.

⁵ Shina yachachicpimi, paicunapish alli yuyaihuan purishpa quiquinllatac huacaichirinatapish, cusata cazunatapish, shinallatac huasipi ima tiyashcata allita ricunatapish yachacunga. Shina cacpimi, Diosmanta huillashcataca pipish mana allichu nishpa mana rimangacuna.

⁶ Shinallatac q'uipa huiñai mosocunatapish alli yuyaihuan purichun yachachingui.

⁷ Ima ruhuaipipish canrac allita ruhuashpa ricuchingui. Yachachicushpapish ama pucllarishpa, ama nic tucushpalla yachachingui.

⁸ Shinallatac ama pi juchanchichunca, rimana cashcallata rimangui. Shina rimacpimi, maijanpish ñucanchicta p'iñaccunaca pingashpa, mana imata ni pudingacuna.

⁹ Amocunata serviccunataca amocunata cazuchun, shinallatac amocunahuan mana churarishpa, amo tucui munashcata ruhuachun yachachingui.

¹⁰ Ñucanchicta Quishpichic Diosmanta yachachishca sumac ricurichunca, ama pipacta shuhuashpa, ashtahuanpish ima ruhuanapipish alli nishca cachun yachachingui.

¹¹ Taita Dios tucui gentecunata quishpichisha nishpa, mai c'uyac cashcata ricuchishcamantami, chashnaca yachachina cangui.

¹² Chai c'uyaimi mana allita ruhuanatapish, mana alli munaicunatapish saquinata yachachishpa, cai pachapica alli yuyaihuan allillata ruhuashpa, Diosta cazushpa causanata yachachicun.

¹³ Shinallatac chai c'uyaimi, ñucanchicta Mandac Dios Quishpichic Jesucristo sumaimana cashcahuan, cutimuna cushicui punzha pactanata shuyanata yachachicun.

¹⁴ Paica juchacunata anchuchishpa tucui millaimanta quishpichingapac, shinallatac paipaclla cashpa imapish allita ruhuaccuna cachunmi, ñucanchicmanta llaquita apashpa huañurca.

¹⁵ Cai ñuca nishcacunata yachachicushpaca, cunashpa shinallatac mana allita ruhuaccunataca canllatac rimashpa cazunata yachachingui. Ama pi canta mana alli nishpa rimachun saquinguichu.