SAN MATEO 26 - Nuevo Testamento en Quichua Cañar 1996

Jesusta japichingapac yuyarinacushcamanta

¹ Tucui chaicunata nishca q'uipami, Jesusca paipac yachacuccunamanca:

² —Caimanta ishcai punzha q'uipaca, pascua*f** punzha chayamugricushcataca cancunallatac yachanguichicmi. Chai punzhapimi, Runa Tucungapac shamushca*f** ñucataca, cruzpi chacatachun japichingacuna— nirca.

³ Chai punzhacunapimi Israel*f** curacunata mandac curacunapish, cunac yuyaccunapish, curacunata jatun mandac Caifaspac huasipi tandanacurcacuna.

⁴ Chaipi tandanacushpami, Jesusta umashpa pacalla ima shinapish japishpa huañuchinata yuyarinacurcacuna.

⁵ Chashna yuyarishpapish paicunaca: —Cai fiesta punzhacunapica mana japishpa, casilla saquishunlla, pacta tucui gentecuna jatarishpa ñucanchictarac imata ruhuanman— ninacurcacuna.

Jesuspac umapi mishquilla ashnacucta churashcamanta

⁶ Jesús Betania puebloman rishpaca, lepra*f** ung:uimanta alliyashca Simonpac huasipimi carca.

⁷ Jesús mizapi tiyacucpimi, shuc huarmica alabastro rumimanta ruhuashca botellapi, achca valishca mishquilla ashnacucta apamurca. Chashna apamushpami, Jesuspac umapi churarca.

⁸ Chashna ruhuacta yachacuccuna ricushpaca, p'iñarishpami: —¿Ima nishpatac cai mishquilla ashnacuctaca, yangamanta t'allinyari?

⁹ Chashna t'allina shinaca, achca cullquipi c'atushpa huacchacunaman cunachari, ashtahuan alli canman carca— ninacurcacuna.

¹⁰ Jesús chaita uyashpaca: —¿Ima nishpatac cai huarmitaca rimaricunguichic? Saquichic. Pai chashna ruhuashpaca, allitami ñucamanca ruhuashca.

¹¹ Huacchacunaca ima punzhapish mana illangachu, ashtahuanpish ñucaca mana cancunahuanca causacushallachu.

¹² Cai huarmica pai ruhuai pudishcatami ruhuashca. Ñuca huañucpi enterrangapacmi, ñucapica ña utca cai mishquilla ashnacuctaca churashca.

¹³ Cai pachapi maipipish quishpirinamanta alli huillaita huillacushpaca, cai huarmi imata ruhuashcatapish huillangacunami. Chashna huillacpica, tucui uyaccunami yuyaringacuna. Chaica chashnatacmi canga— nirca.

Judas Iscariote Jesusta japichisha nishcamanta

¹⁴ Chai q'uipami chunga ishcai yachacuccunapuramanta Judas Iscariote runa, curacunata mandac curacunapacman rishpaca:

¹⁵ —Jesusta ñuca japichingapacca, ¿mashna cullquitatac cushun ninguichic?— nirca. Pai chashna nicpi, chai curacunaca quimsa chunga cullquita cushun nircacuna.

¹⁶ Chaimanta pachami Judasca, ima shinapish Jesusta japichinata mashcashpa, chai yuyailla puricurca.

Jesús pai huañunata yuyarishpa micushcamanta

¹⁷ Levadura illac tandata micuna callari punzha chayamucpimi, yachacuccuna Jesuspacman cuchuyashpaca: —¿Maipitac can pascuata*f** yuyarishpa, micunataca allichigrishun?— nishpa tapurcacuna.

¹⁸ Chashna tapucpi Jesusca: —Puebloman rishpa, shuc runapac huasiman chayashpa cashna nigrichic: ‘Ñucanchicta yachachicca: “Ñucata japichina pachami chayamucun. Chaimanta cambac huasiman rishpa, ñuca yachacuccunahuan pascuata yuyarishpa micugrini” ninmi’ nigrichic— nirca.

¹⁹ Shinami yachacuccunaca Jesús mandashca shinallatac ruhuashpa, pascuata yuyarina micunataca allichircacuna.

²⁰ Ña tutayamucuctami Jesusca, paipac chunga ishcai yachacuccunahuan mizapi micungapac tiyarirca.

²¹ Chashna mizapi micushpa tiyacushpami Jesusca: —Cancunapuramanta shucmi, ñucataca huañuchiccunaman japichinga. Chaica chashnatacmi canga— nirca.

²² Chashna nicpica, munai llaquirishpami caishuc chaishuc Jesusmanca: —Apunchic Jesús, ¿canta japichicca ñucachu cani?— nishpa tapurcacuna.

²³ Chashna tapucpi Jesusca: —Cancunapuramanta ñucahuan cai platollapitac tandata jucuchishpa micucllatacmi, ñucataca japichigrin.

²⁴ Runa Tucungapac shamushca*f** ñucataca, Dios quillcachishcapi nishca shinallatacmi huañuchingacuna. Ashtahuanpish ñucata japichic runaca, ¡aij, imachari tucunga! Chai runaca mana huacharishca cashpachari ashtahuan alli canman carca— nirca.

²⁵ Chashna nicpi Jesusta japichic Judasca: —Yachachic, ¿canta japichicca ñucachu cani?— nishpa, Jesusman tapurca. Chashna tapucpi Jesusca: —Ari, canllatacmi cangui— nirca.

²⁶ Chashna micucushpami, Jesusca tandata japishpa Taita Diosta pagui nishpa chaupishpa, chaupishpa yachacuccunaman cushpa: —Japichic, micuichic. Caica ñuca aichami— nirca.

²⁷ Shinallatac vino vasota japishpapish, Taita Diosta pagui nishpa yachacuccunaman cucushpaca: —Cai vasomanta tucuilla ubiaichic.

²⁸ Cai vaso vinoca, achcacunapac juchacunata perdonashpa quishpichingapac jichana ñuca yahuarmi. Chaihuanmi Taita Diosca shuc mushuc ari ninacuita pactachigrin.

²⁹ Ñucaca ninimi: Dios maipi mandacucpica cancunahuan mushuc vinota ubiangacamanmi, cai uvasmanta vinotaca cutinca manatac ubiasha— nirca.

Jesusca Pedrota “ñucata mana ricsinichu ninguimi” nishcamanta

³⁰ Cantota cantashca q'uipami, Olivos urcuman rircacuna.

³¹ Chaiman chayashpami Jesusca: —Dios quillcachishcapica: ‘Michictaca huañuchishami. Ña huañuchicpica, ovejacunaca caita chaitami shiguaringacuna’ ninmi. Chashna nishca shinallatacmi, cunan tutallatac tucui cancunaca ñucata saquishpa caita chaita ringuichic.

³² Shina cacpipish Taita Dios ñucata causachishca q'uipaca, cancuna manarac Galilea llactaman ricpimi, ñaupashpa risha— nirca.

³³ Chashna nicpi Pedroca: —Caishuccuna canta saquishpa ricpipish, ñucaca manatac saquishachu— nirca.

³⁴ Chashna nicpi Jesusca: —Cunan tutallatacmi gallo manarac cantacpi, quimsa cutin ñucataca ‘mana ricsinichu’ ningui. Chaica chashnatacmi canga— nirca.

³⁵ Chashna nicpi Pedroca: —Canhuan pacta huañuna cacpipish, ‘mana ricsinichu’ nishpaca, manatac nishachu— nirca. Shinallatacmi tucui yachacuccunaca nircacuna.

Getsemaní huertapi Taita Diosman Jesús mañashcamanta

³⁶ Chai q'uipami Jesusca, paipac yachacuccunahuan Getsemaní huertaman rirca. Chaiman chayashpaca: —Chainicpi ñuca Taita Diosman mañangacaman, cancunaca caillapi tiyacuichic— nirca.

³⁷ Chashna nishpami Jesusca Pedrotapish, Zebedeopac ishcai churicunatapish pushashpa rirca. Chashna rishpaca paipac shungupi llaquihuan cashpami, mai llaquiri callarirca.

³⁸ Chaimantami Jesusca: —Ñuca shungupica, huañuna nanaihuan shinami munai llaquiricuni. Cancunaca ñuca shinallatac, ama suiñushpa caillapi chaparacuichic— nirca.

³⁹ Shina nishpaca, Jesusca ashata chainicman rishpami pambapi tuparicta cumurishpa, Taita Diosman mañashpaca: —Ñuca Taitalla, ima shinamanta cai jayacta ubiana shina llaquicunata ñuca mana apana cacpica, jarcaiyari. Shina cacpipish ama ñuca munashcata ruhuaichu, ashtahuanpish can munashcata ruhuai— nirca.

⁴⁰ Jesús chashna mañashca q'uipa, yachacuccunapacman cutimushpaca, paicuna suiñucucpimi tuparirca. Chaimantami Pedrotaca: —¿Manachu ashallatapish ñuca shinallatac riccharishca cai pudircanguichic?

⁴¹ Imapish mana alli yuyaicuna ama japichunca, riccharishpa Taita Diosman mañacuichic. Cancunapac shungu alli yuyaita charicpipish, cancunapac cuerpoca shaicunllami— nirca.

⁴² Cutinllatac Jesús mañangapac rishpaca: —Ñuca Taitalla, jayacta ubiana shina llaquicunata ñuca apanata mana jarcaipac cacpica, can munashca shina cachun— nishpami mañarca.

⁴³ Jesús chashna mañashpa cutimushpaca, yachacucuccunataca suiñucucpimi tuparirca. Paicunapac ñahuicunaca suiñuihuan huañucushpami, mana pascarisha nirca.

⁴⁴ Chashna cacpimi cutinllatac Taita Diosman mañangapac Jesús rishpaca, puntaman mañashca shinallatac mañarca.

⁴⁵ Chashna mañashca q'uipa, yachacuccunapacman Jesús cutimushpaca: —¿Cancunaca samashpa suiñucunguichicllachu? Ña jatarichic, ñami Runa Tucungapac shamushca*f** ñucataca, juchayuc runacunaman japichina horasca pactamushcami.

⁴⁶ Jatarishpa jacuchic. Ñucata japichicca ñami chayamucun— nirca.

Jesusta japichishcamanta

⁴⁷ Jesús chashna nicucpiracmi, chunga ishcai yachacuccunapuramanta Judasca, tauca runacunahuan shamurca. Chai runacunaca curacunata mandac curacunapish, cunac yuyaccunapish cachacpimi espadacunahuan, caspicunahuan Jesusta japingapac shamurcacuna.

⁴⁸ Jesusta japichic Judasca, chai runacunamanca: “Maijantami ñuca muchani, chaimi Jesusca. Chaita japinguichic” nishcami carca.

⁴⁹ Jesuspacman Judas cuchuyashpaca: —Yachachic, ¿allillachu cangui?— nishpami, chayashcahuan Jesusta mucharca.

⁵⁰ Chashna muchacpimi Jesusca: —Uyai. Can imata ruhuangapac shamushca cashpaca, ruhuailla— nirca. Shina nicpimi, paihuan shamuc runacunaca Jesusta huaicashpa japircacuna.

⁵¹ Chaipimi Jesushuan caccunapuramanta shucca, espadata llucchishcahuan jatun mandac curapac servic runapac rinrita p'itirca.

⁵² Chashna ruhuacta Jesús ricushpami: —Saqui, espadata maipi huacaichinapi huacaichi. Maijanpish espadahuan macanacuctaca, espadallahuantacmi huañuchishca canga.

⁵³ Cunanllatac ñuca Taitaman huaranga huaranga angelcunata ñucata huacaichichun mañacpica, cunanllatacmi cachanman. Chaitaca, ¿manachu yachangui?

⁵⁴ Ashtahuanpish Taita Dios angelcunata cachacpica, ¿ima shinatac Dios quillcachishcapi cashnami tucunga nishcaca pactangayari?— nirca.

⁵⁵ Shinallatac Jesusca paita japiccunataca: —¿Ñucataca shuhuata shinachu japingapac, cancunaca espadacunahuan, caspicunahuan shamunguichic? Punzhantami Diosman mañana huasipica yachachicurcani. Chashna yachachicucpipish, mana japircanguichicchu.

⁵⁶ Ashtahuanpish ñaupa huillaccunaman Dios quillcachishca pactachunmi, tucui caicunaca tucushca— nirca. Chaipimi Jesuspac yachacuccunaca paillata saquishpa, tucui miticushpa rircacuna.

Mandaccunapuralla tandanacushcapacman Jesusta apashcamanta

⁵⁷ Jesusta japishpaca, curacunata jatun mandac Caifaspac huasimanmi aparcacuna. Chaipica mandashcacunata yachachiccunapish, cunac yuyaccunapish tandanacushcami carcacuna.

⁵⁸ Pedroca caru carullatami chai huasi pungu pambacaman c'atishpa rirca. Chashna rishpaca, Diosman mañana huasita cuidaccunahuanmi Jesusta ima ruhuacta ricungapac canzhallapi saquirirca.

⁵⁹ Curacunata mandac curacunapish, tucui mandaccunapura tandanacushcacunapish, Jesusta huañuchingapacmi manapish cashcacunata nichun, llullashpa huillaccunata c'ayarcacuna.

⁶⁰ Shina cai tucui llullashpa huillaccuna chayashpa llullacpipish, imamanta juchanchinataca mana tarircacunachu. Shina cacpipish ishcai llullashpa huillac runacuna shamushpaca:

⁶¹ —Cai runaca: ‘Diosman mañana huasita urmachishpapish, quimsa punzhapica cutin shayachishallami’ nircami— nircacuna.

⁶² Chashna nicpi curacunata jatun mandac cura jatarishpa Jesustaca: —Cai tucuita nicucpipish, ¿manachu imata ningui?— nirca.

⁶³ Chashna nicpipish, Jesusca imata mana nircachu. Chaimantami jatun mandac curaca: —Causac Diospac shutipimi huillachun nini. ¿Canchu Diospac Churi Quishpichic Cristoca cangui?— nirca.

⁶⁴ Shina nicpi Jesusca: —Ña canllatac nishcanguimi. Ashtahuanpish ñucaca cancunamanca cashnami nini: Cunanmanta pacha Runa Tucungapac shamushca*f** ñucataca, imatapish ruhuaclla Taita Diospac alli maquiman tiyacuctami ricunguichic. Shinallatac jahua pachamanta p'uyupi shamucuctapish ricunguichicmi— nirca.

⁶⁵ Shina nicpi jatun mandac curaca munai p'iñarishpami, paipac churanata lliquishpaca: —Paita juchanchingapacca, piman ña mana ashtahuan tapunachu canchic. Cai runaca Dios tucushpa Diosta p'iñachicushcataca, ña cancunallatac uyashcanguichicmi.

⁶⁶ Paillatac cashna nicpica, ¿cancunaca imatatac ninguichic?— nishpami, chaipi caccunamanca tapurca. Shina nicpi paicunaca: —¡Pai chashna rimashcamantaca, huañunami can!— nircacuna.

⁶⁷ Chashna nishpaca, ñahuipi t'ucashpami macarcacuna. Cutin maijancunaca huactashpami:

⁶⁸ —Diosmanta huillac Quishpichic Cristo cashpaca, maijantac canta huactanchic huillai— nircacuna.

Pedroca Jesusta “mana ricsinichu” nishcamanta

⁶⁹ Chai huasi pungu pambapi Pedro tiyacucpimi, shuc servic huarmi cuchuyashpaca: —Canpish Galilea llactamanta Jesushuan puricmi cangui— nirca.

⁷⁰ Shina nicpi Pedroca tucui chaipi caccunapac ñaupapimi: —Mana ricsinichu, pimantachari nicungui— nirca.

⁷¹ Shina nishpa Pedro chai huasi pungu pambamanta llucshicucpica, cutinllatac shuc servic huarmi paita ricushpaca: —Paipish Nazaret pueblomanta Jesushuan puricmi carca— nishpami, chaipi caccunamanca parlarca.

⁷² Chashna nicpica, cutinllatacmi Pedroca: —Taita Diospac shutipimi nini: Chai runataca mana ricsinichu— nirca.

⁷³ Chashna nishca q'uipallatacmi, chaipi caccuna Pedropacman cuchuyashpaca: —Canpish chaipurallatacmi cangui. Cambac rimaipish ricsinallami— nircacuna.

⁷⁴ Shina nicpica, cutinllatacmi Pedroca: —Taita Diospac shutipimi nini: Pimantatacpish rimacunguichicchari, chai runataca mana ricsinichu— nirca. Pai chashna nicucllapitacmi, galloca cantarca.

⁷⁵ Chaipimi Pedroca: “Manarac gallo cantacpimi, quimsa cutin ñucataca mana ricsinichu ningui” nishpa Jesús huillashcataca yuyarirca. Chaimantami Pedroca canzhaman llucshishpa, munai llaquirishpa huacarca.