SAN MATEO 25 - Nuevo Testamento en Quichua Cañar 1996

Chunga solteracunamanta chimbapurashpa Jesús parlashcamanta

¹ Chai punzhapica jahua pacha Taita Dios mandacucca, chunga solteracuna cazarac noviohuan tupangapac michata japichishpa, llucshic shinami canga.

² Chai chunga solteracunamantaca, pichcacunaca allichirishca, alli yuyaiyucmi carcacuna. Cutin pichcacunaca mana allichirishca, mana alli yuyaiyucchu carcacuna.

³ Chai mana alli yuyaiyuccunaca michata apashpapish, aceite tucuricpi cutin churangapacca mana aparcacunachu.

⁴ Ashtahuanpish caishuc pichca alli yuyaiyuccunaca, michatapish shinallatac aceite tucuricpi churangapacpish aparcacunami.

⁵ Novio mana utca shamucpica, chai chunga solteracunaca suiñui aticpimi suiñurcacuna.

⁶ Chashna suiñucucpimi, chaupi tuta shinataca: ‘¡Ñami novio shamun, tupangapac llucshichic!’ nishpa, caparishca uyarirca.

⁷ Chashna caparicta uyashpami, chunga solteracunaca jatarishpa, michata allichi callarircacuna.

⁸ Shina allichicushpami, chai mana alli yuyaiyuc solteracunaca chai alli yuyaiyuc solteracunataca: ‘Ñucanchic michacunaca ñami huañugrin. Asha aceiteta caraichic’ nircacuna.

⁹ Shina nicpi chai alli yuyaiyuc solteracunaca: ‘Cancunaman caracpica, ñucanchicmanpish, cancunamanpish tucuringami. Chaimanta c'atuccunapacman rishpa, cancunallatac randigrichic’ nircacuna.

¹⁰ Shina chai pichca solteracuna randingapac ricpica, ñapish novioca chayamurcallami. Chashna chayamucpica, pichca allichirishcacunaca noviohuan boda huasiman yaicucpica, punguta huichcarcacunami.

¹¹ Ña punguta huichcashca q'uipami, caishuc pichca solteracuna chayamushpaca: ‘Amito, punguta pascai’ nishpa c'ayarcacuna.

¹² Chashna c'ayacpimi, ucumanta novioca: ‘Cancunataca mana ricsinichu’ nirca.

¹³ Chai shinallatac Runa Tucungapac shamushca*f** ñuca ima punzha, ima horas cutimunata mana yachashcamantaca, alli yuyaihuan chaparacuichic.

Chunga cullquimanta Jesús chimbapurashpa parlashcamanta

¹⁴ Shinallatac jahua pacha Taita Dios mandacucca, shuc amo caru llactaman ringapac paipac serviccunata c'ayashpa, paipac cullquita mirachichun saquic shinami.

¹⁵ Shina saquishpaca, paicuna ima shina ruhuaipacta ricushpami, shucmanca pichca talento*f** cullquita, shucmanca ishcai talento cullquita, shucmanca shuc talento cullquita cushpa rirca.

¹⁶ Chai pichca talento cullquita japic runaca, chai japishca cullquihuanca randishpa c'atushpami, pichca talento cullquihuan mirachirca.

¹⁷ Chai ishcai talento cullquita japic runapish, chai shinallatacmi mirachirca.

¹⁸ Ashtahuanpish amo saquishca shuc talento cullquita japic runaca, allpata jutcushpami pambashpa churarca.

¹⁹ Tauca huatacuna q'uipa chai amo cutimushpaca, paipac serviccuna mashna cullquita mirachishcatami tapurca.

²⁰ Chashna tapucpi, chai pichca talento cullquita japic runa chayashpaca: ‘Amito, caipimi can saquishca pichca talento cullquitaca, pichca talento cullquihuan mirachircani’ nirca.

²¹ Chashna nicpi amoca: ‘Canca allitami ruhuashcangui. Ñucapacta alli yuyaihuan, allita ruhuacmi cangui. Ashallapipish allita ruhuashcamantaca, achcatami canmanca mingasha. Cunanca ñucahuan cushicungapac ucuman yaicui’ nirca.

²² Ishcai talento cullquita japic runa q'uipata chayashpapish: ‘Amito, caipimi can saquishca ishcai talento cullquitaca, ishcai talento cullquihuan mirachircani’ nirca.

²³ Chashna nicpi amoca: ‘Canca allitami ruhuashcangui. Ñucapacta alli yuyaihuan, allita ruhuacmi cangui. Ashallapipish allita ruhuashcamantaca, achcatami canmanca cusha. Cunanca ñucahuan cushicungapac ucuman yaicui’ nirca.

²⁴ Shinallatac shuc talento cullquita japic runa chayashpaca: ‘Can amoca manapish cushpa chasquiclla, manapish tarpushpa tandachiclla, p'iña cashcata yachashpami,

²⁵ manchaihuan can saquishca cullquitaca allpata allashpa, pambashpa huacaichircani. Caica cambac cullqui’ nirca.

²⁶ Shina nicpi chai amoca: ‘¡Canca mana alli ñucapacta ruhuac, millai shinallatac q'uilla runami cangui! Ñuca manapish tarpushpa tandachic, manapish imata cushpa chasquic cashcataca yachashcanguimi.

²⁷ Shina cashcamantaca, ¿ima nishpatac cullquitaca bancollapipish mana churarcangui? Ñuca cutimushpaca, bancopi churashca cullquitaca mirashca cullquindicmi japiman carcani’ nirca.

²⁸ Chai q'uipaca chaipi caccunataca: ‘Chai cullquita quichushpa, chai chunga cullquita charic runaman cuichic.

²⁹ Achcata charicmanmi, ashtahuan cushca canga. Chashna cucpica, ashtahuanmi charinga. Cutin mana charicmantaca, ashalla charishcatapish quichushcami canga.

³⁰ Cai mana valic runataca, canzhaman llucchishpa purapi shitaichic. Chaipica huacaihuanmi quiru caniringa’ nirca.

Cai pachapi causaccunata taripana cashcamanta

³¹ Runa Tucungapac shamushca*f** ñuca mandangapac cutimushpaca, sumaimana cashcahuan achicyachishpa, tucui angelcunandicmi shamusha. Chashna cutimushpaca, jatun sumaimana tiyarinapimi tiyarisha.

³² Chashna tiyaricpica, tucui llactacunapi causaccunami ñucapac ñaupaman tandaringacuna. Ña tandaricpica, caishucmanta chaishucmanta shuc michic ovejacunata chivocunamanta ch'icanyachic shinami ch'icanyachisha.

³³ Chashna ch'icanyachishpaca, ovejacunataca ñuca alli maquimanmi churasha. Shinallatac chivocunataca, ñuca lluqui maquimanmi churasha.

³⁴ Ñuca alli maqui ladoman caccunataca: ‘Ñuca Taita alli nishcacuna, ñucahuan pacta mandangapac shamuichic, japinguichic. Cai mandanataca Diosmi cai pachata ruhuashca punzhamanta pacha, cancunaman cungapac allichishpa charicushca.

³⁵ Cancunami ñuca yarcaihuan cacpipish, cararcanguichic. Yacunayaihuan cacpipish, ubiachircanguichic. Maipi samarinata mana charicpipish, pozachircanguichic.

³⁶ Churana illac cacpipish, churachircanguichic. Ungushca cacpipish, carcelpi cacpipish, ricuc shamurcanguichic’ nishami.

³⁷ Shina nicpica, cashcata ruhuaccunaca: ‘Apunchic Jesús, ¿maipitac yarcaihuan cacpi cararcanchic, yacunayaihuan cacpi ubiachircanchic?

³⁸ ¿Maipitac mana samarinata charicpi pozachircanchic, churana illaclla cacpi churanata curcanchic?

³⁹ ¿Maipitac ungushca cacpi, mana cashpaca carcelpi cacpi ricuc shamurcanchic?’ ningacunami.

⁴⁰ Shina nicpi ñucaca: ‘Tucui caicunata cai yangalla shina ñuca huauquicunaman ruhuashpaca, ñuca quiquinmanmi ruhuarcanguichic. Chaica chashnatacmi’ nishami.

⁴¹ Chai q'uipami ñucaca lluqui ladoman caccunataca: ‘Caimanta anchurichic, Taita Dios mana allichu canguichic nishcacuna. Diabloman, shinallatac paipacta ruhuac angelcunaman allichishca, mana huañuc ninamanmi shitashca cana canguichic.

⁴² Cancunaca ñuca yarcaihuan cacpipish, mana cararcanguichicchu. Yacunayaihuan cacpipish, mana ubiachircanguichicchu.

⁴³ Samarinata maipi mana charicpipish, mana pozachircanguichicchu. Churana illac cacpipish, mana churachircanguichicchu. Ungushca cacpipish, carcelpi cacpipish, mana ricuc shamurcanguichicchu’ nishami.

⁴⁴ Chashna nicpi paicunaca: ‘Apunchic Jesús, ¿maipitac can yarcaihuan cacpi, yacunayaihuan cacpi, samarinata mana charicpi, churana illac cacpi, ungushca cacpi, carcelpi cacpi, imalla illashcataca mana curcanchic?’ ningacunami.

⁴⁵ Shina nicpica ñucaca: ‘Tucui caicunata cai yangalla shinacunaman mana ruhuashpaca, ñucamanmi mana ruhuarcanguichic. Chaica chashnatacmi’ nishami.

⁴⁶ Chashnacunaca, huiñaita jatun llaquimanmi shitashca canga. Ashtahuanpish cashcata ruhuaccunaca, huiñai causaitami japinga— nirca.