SAN MATEO 22 - Nuevo Testamento en Quichua Cañar 1996

Jesús bodamanta chimbapurashpa parlashcamanta

¹ Cutinllatacmi Jesusca, yuyaita japina parlohuan cashna nirca:

² —Jahua pacha Taita Dios mandacucca, shuc jatun mandac paipac churita cazarachicushpa,

³ paipac serviccunata bodaman c'ayashcacunata c'ayac cachacpi, mana shamusha nic shinami.

⁴ Mana shamusha nicpica, cutinllatacmi caishuc serviccunata cashna nishpa cacharca: ‘Jatun micuita ruhuangapacca, jatun huagracunatapish, shuctac huira animalcunatapish huañuchichun mandarcanimi. Ñami tucui allichishca. Chaimanta bodaman shamuichic nicunmi nigrichic’ nishpa cacharca.

⁵ Chashna cutin c'ayacpipish, mana uyashpami maijancunaca chagraman rircacuna. Shinallatac maijancunaca c'atunamanmi rircacuna.

⁶ Shinallatac shuccunaca, jatun mandac c'ayac cachashca serviccunataca japishpami, macashpa huañuchircacuna.

⁷ Chashna ruhuacpimi, jatun mandacca munai p'iñarishpa, chai huañuchic runacunataca huañuchishpa, chai pueblota rupachichun soldadocunata mandashpa cacharca.

⁸ Chai q'uipami jatun mandacca, paita serviccunataca: ‘Ñami bodaca tucui allichishca. C'ayashcacuna mana shamusha nishcamantaca, paicunallatacmi mana shamuipac cashcata ricuchincuna.

⁹ Chaimanta cunan cancunaca mai ñancunaman llucshishpa, pipish ricuricta pushamuichic’ nishpa cacharca.

¹⁰ Chashna cachacpi serviccunaca mai ñancunaman llucshishpa, pipish ricurictami alli cachun, mana alli cachun bodaman c'ayamurcacuna. Chashnami boda huasipica, gentecunaca jundarca.

¹¹ Chashna huasipi junda cacpimi, jatun mandac ucuman yaicushpaca, mana bodapi churarina churanata churashca runata ricurca.

¹² Chaita ricushpaca: ‘Uyai. ¿Ima nishpatac canca mana bodapi churarina churanata churashca caipica cangui?’ nirca. Chashna nicpi chai runaca upallami carca.

¹³ Chaimantami jatun mandacca miza allichiccunata cashna nirca: ‘Cai runataca chaqui maquita huatashpa, canzhaman llucchishpa purapi shitaichic. Chaipica huacaihuan quiru canirinami tiyan’ nirca.

¹⁴ Cai parlo nishca shinallatac c'ayashcacunaca achcami, acllashcacunaca ashallami— nishpami, Jesusca yachachirca.

“¿Impuestotaca paganachu canchic?” nishpa, Jesusman tapushcamanta

¹⁵ Chai q'uipami fariseocunaca,*f** Jesusman imata tapucpi ima mana allita nicpica juchanchishun nishpa, tandanacushpa yuyarircacuna.

¹⁶ Chashna yuyarishpami, paicunapac yachacuccunapuramanta, shinallatac mandac Herodespac runacunapuramanta tapuchun cacharcacuna. Shina cachacpi tapuccuna rishpaca: —Yachachiclla. Canca imapish cashcallatami yachachingui, shinallatac Taita Dios munashca shina causachunpish, allimi yachachingui. Canca pitapish mana manchashpa, mana piman tucushpa yachachic cashcatami yachanchic.

¹⁷ Chaimantami cashna tapuc shamunchic: Roma*f** llactata jatun mandac Cesarman*f** impuestotaca paganaca, ¿mandashcapi nishca shinaca alli canga? Mana cashpaca, ¿manachu alli canga?— nishpa tapurcacuna.

¹⁸ Shina tapucpi Jesusca, paicuna mana alli yuyaihuan tapuc shamushcata yachashpami paicunataca: —Mishqui shimi jayac shungucuna, ¿ima nishpatac ñucataca pandachishun nicunguichic?

¹⁹ Impuestota pagana cullquita ricuchichic— nicpica, shuc denario*f** cullquitami ricuchircacuna.

²⁰ Chashna ricuchicpi Jesusca: —Cai cullquipica, ¿pipac ñahuitac, shinallatac pipac shutitac tiyacun?— nishpa tapurca.

²¹ Chashna tapucpimi paicunaca: —Jatun mandac Cesarpacmi— nircacuna. Shina nicpi Jesusca: —Shinashpaca jatun mandac Cesarpac cashcataca, jatun mandac Cesarllamantac cuichic, shinallatac Diospac cashcataca, Diosllamantac cuichic— nirca.

²² Chaita uyashpaca, mana amirishpami upalla rircacunalla.

Huañushcacuna causarinata mana criccuna Jesusman tapushcamanta

²³ Chai punzhallapitacmi, huañushcacuna causarinata mana cric maijan saduceocunaca*f** Jesusman cashna nishpa tapuc shamurcacuna:

²⁴ —Yachachic, ñaupa taita Moisés ñucanchicta mandashpaca: ‘Shuc runa manarac huahuata charishpa huañucpica, chai huañushcapac huauquillatac chai saquirishca viuda huarmihuan cazarashpa, huañushca huauquipac randi huahuata charichun’ nishcami.

²⁵ Ñucanchicpurapica, canchis huauquindicmi causarcacuna. Chai huauquindiccunamanta punta huauqui cazarashpaca, manarac huahuata charishpami huañurca. Saquiric q'uipa huauquimi chai huarmihuanca cazararca.

²⁶ Chashnallatacmi q'uipa huauquipish, ashtahuan q'uipa huauquipish tucurca. Tucui canchis huauquindiccunatacmi chashna tucurca.

²⁷ Chai tucui huañushca q'uipaca, chai huarmipish huañurcami.

²⁸ Chashna canchis huauquindiccunahuantac cazarashca cashcamantaca, huañushcacuna causarina punzhapica, ¿maijanpac huarmitac canga?— nircacuna.

²⁹ Chashna nicpi Jesusca: —Cancunaca Dios quillcachishcapi ima nicushcatapish, Taita Dios imatapish ruhuaclla cashcatapish mana yachashpami, yalli pandaricunguichic.

³⁰ Huañushcacuna causarina punzhapica, c'aricunapish, huarmicunapish mana cazarangacunachu, ashtahuanpish paicunaca jahua pachapi cac angelcuna shinami cangacuna.

³¹ Huañushcacuna causarinamanta Taita Dios cancunaman huillashcataca, ¿manachu ricushcanguichic? Pai huillashpaca:

³² ‘Ñucaca Abrahampac, Isaacpac, Jacobopac Diosmi cani’ nishcami. Taita Diosca mana huañushcacunapac Dioschu, ashtahuanpish causaccunapac Diosmi— nirca.

³³ Jesús chashna yachachishcata gentecuna uyashpaca, munai mana amirishpami saquirircacuna.

“¿Mandashcacunamanta maijantac ashtahuan yalli cazunaca?” nishcamanta

³⁴ Saduceocunata*f** Jesús upallachishcata yachashpami, fariseocunaca*f** paicunapura tandanacurcacuna.

³⁵ Paicunapuramanta mandashcacunata shuc yachachicmi, Jesusta pandachingaraicu:

³⁶ —Yachachiclla, Moisés mandashcacunamantaca, ¿maijantac ashtahuan yalli cazunaca?— nishpa tapurca.

³⁷ Chashna tapucpi Jesusca: —‘Canta Mandac Taita Diosta tucui shunguhuan, tucui almahuan, tucui yuyaihuan c'uyangui’ ninmi.

³⁸ Cai mandashcami tucuimanta yalli ashtahuan cazunaca.

³⁹ Q'uipa mandashcapish, chai shinallatacmi: ‘Can ima shinami c'uyaringui, chashnallatac shuccunatapish c'uyangui’ ninmi.

⁴⁰ Cai ishcai mandashcacunami Moisés mandashcacunamanta, shinallatac Diosmanta ñaupa huillaccuna huillashcamantapish callari shinaca can— nirca.

Cristoca mandac Davidtapish Mandac cashcamanta

⁴¹ Fariseocuna*f** chaipi tandanacushca cacpiracmi Jesusca:

⁴² —Quishpichic Cristoca, ¿pipac aillupura cashcatatac yuyanguichic?— nishpa tapucpi, paicunaca: —Ñaupa mandac Davidpac aillupuramantami can— nircacuna.

⁴³ Chashna nicpi Jesusca: —Shinashpaca, ¿ima nishpatac Davidllatac Diospac Espíritu yuyaita cucpica, Quishpichic Cristota ‘ñucata Mandac’ nirca? David huillashpaca:

⁴⁴ ‘Mandac Taita Diosca ñucata Mandactaca: “Canta p'iñaccunata cambac chaqui sarunapi churangacaman, canca ñuca alli maquiman tiyacuilla” ninmi’ nishcami.

⁴⁵ Davidllatac ‘ñucata Mandac’ nicpica, ¿ima shinatac Cristoca Davidpac aillupurallaca cangayari?— nirca.

⁴⁶ Jesús chashna nicpica, imata mana cutichircacunachu. Chai punzhamanta pachami pi ashtahuan imata mana tapurcacuna.