MARCOS 13 - Nuevo Testamento en Quichua Cañar 1996

“Diosman mañana huasitaca urmachingacunami” nishpa, Jesús huillashcamanta

¹ Diosman mañana huasimanta Jesús llucshicucpimi, paipac yachacuccunamanta shucca: —Yachachic, ¡cai sumac jatun rumicunata, cai sumacta ruhuashca huasicunata riquiyari!— nirca.

² Chashna nicpi Jesusca: —¿Cai jatun huasicunallata ricushpachu mana amiricungui? Caipica shuc rumillapish pircashcaca mana saquiringachu, tucuimi urmachishca canga— nirca.

Cai pacha tucuringapacca, jaicapi mana tiyashca llaquicuna tiyanamanta

³ Chashna nishca q'uipaca, Olivos urcumanmi rircacuna. Chaiman chayashpa, Diosman mañana huasi chimbapurapi Jesús tiyaricpimi, Pedro, Jacobo, Juan, Andrespish paicunalla Jesusman tapushpaca:

⁴ —Can huillashcaca, ¿ima punzhatac pactangayari? Can huillashcacuna ña pactamucuctaca, ¿imata ricushpatac yachashun?— nircacuna.

⁵ Shina nicpi Jesusca cashnami nirca: —Pi cancunata ama pandachichunca, alli yuyaihuan puringuichic.

⁶ Achcacunami ñuca shutipi shamushpa: ‘Ñucami Quishpichic Cristoca cani’ nishpa, achcacunata llullashpa pandachingacuna.

⁷ Cancunaca quiquin llactapipish, caru llactacunapipish ‘ima mundo macanacuicunami tiyan’ ninacuctapish uyanguichicmi. Chaita uyashpapish, ama mancharinguichicchu. Chashna achca llaquicunaca tiyangallatacmi. Chashna tucucpipish, cai pachaca manarac tucuringachu.

⁸ Shuc llactapi causaccunaca, caishuc llactapi causaccunahuan macanacungacunami. Shinallatac llactacunata mandaccunapurapish macanacuchingacunami. Mai llactacunapica allpa chucchuipish, ima mana p'ucucpi yarcaipish tiyangami. Chai tucui llaquicunaca, ashtahuan llaquicuna tiyangapac callarillami canga.

⁹ Ashtahuanpish cancunaca alli yuyaihuan puringuichic. Cancunataca japishpa, mandaccunapac ñaupaman apangacunami. Tandanacuna huasicunapipish azutingacunami. Ñucata c'aticushcamantaca, cancunapac llactapi mandaccunapacmanpish, jatun llactata mandaccunapacmanpish apangacunami. Chashna apacpica, paicunaman ñucamanta huillanguichicmi.

¹⁰ Cai pacha manarac tucuricpimi, quishpirinamanta cai alli huillaica tucui llactacunapi causaccunaman huillashca canga.

¹¹ Mandaccunapacman cancunata japishpa apacpica, ‘¿imatatac nishun?’ nishpa, ama chai yuyailla canguichicchu. Cancuna rimai callaricpica, Taita Dios imata rimana yuyaita cucpica rimanguichicllami. Mana cancunapac yuyaimantachu rimanguichic, ashtahuanpish Diospac Espiritumi rimana yuyaitaca cunga.

¹² Huauquica, quiquin huauquitami huañuchichun japichinga. Taitapish, quiquin churita huañuchichun japichingami. Shinallatac churicunapish, taita mamata p'iñashpa huañuchichingacunami.

¹³ Ñucata c'aticushcamantaca, cancunataca tucuimi p'iñangacuna. Chashna p'iñacpipish, tucuringacaman chai llaquicunata apactaca Taita Diosca quishpichingami.

¹⁴ Ashtahuanpish chai millanayac mapayachic manapish chaipi cana caipac tiyacucta ricushpaca, Judea llactapi causaccunaca urcucunapi miticugrichun. (Maijanpish cai quillcashcata ricucca, alli entendinguichic).

¹⁵ Chai punzhacunapica, maijanpish huasi jahuapi*f** cashpaca, huasi ucumanta ima charishcata apangapacllapish ama uricuchun.

¹⁶ Shinallatac chagrapi caccunaca, huasimanta churanata apangapacllapish ama cutichun.

¹⁷ Chai punzhacunapica huicsayuc huarmicunapish, chuchucuc huahuayuc huarmicunapish, ¡aij, imachari tucunga!

¹⁸ Cancuna miticushpa rina punzhaca ama tamia punzhacuna cachun, Taita Diosman mañaichic.

¹⁹ Chai punzhacunaca achca llaquimi canga. Taita Dios cai pachata ruhuashca punzhamanta pacha cunancamanca, chashna llaquica manarac tiyashcachu, cutinpish manatac tiyangachu.

²⁰ Chai llaqui punzhacunata Dios mana ashata chaupicpica, pipish mana causai pudinmanchu. Ashtahuanpish Taita Diosca pai acllashcacunata c'uyashcamantami, chai llaqui punzhacunataca chaupisha nishca.

²¹ Chai punzhacunapi maijanpish cancunata: ‘Riquichic, Quishpichic Cristoca caipimi, chaipimi’ nicucpipish, pacta cringuichicman.

²² Chai punzhacunapica ‘ñucami Cristoca cani’ nishpa llullaccunapish, shinallatac ‘Diosmantami huillacunchic’ niccunapish tiyangami. Chaicunaca pi mana ruhuaipaccunatapish, pi mana ricushcacunatapish ruhuashpa ricuchingacunami. Chashna ruhuashpaca, Taita Dios acllashcacunatapish ima shinapish pandachinatami yuyangacuna. Chashna cacpipish paicunaca mana pandaringacunachu.

²³ Ashtahuanpish cancunaca alli yuyaihuan puringuichic. Ñucaca imalla tucuna cashcataca, ñami cancunamanca huillani.

Apunchic Jesucristo ima shina cutin shamunamanta

²⁴ Chai ima mundo llaqui punzhacuna tiyashca q'uipaca, intipish amsayangami, quillapish mana achicyachingachu.

²⁵ Lucerocunapish jahuamanta urmangami. Jahua cielopi imalla tiyac jatuncunapish chucchungami.

²⁶ Chashna tucucpica, Runa Tucungapac shamushca*f** ñucataca imatapish ruhuaclla cashcahuan, sumaimana achiclla cashcahuan achicyachishpa, p'uyupi shamucuctami ricungacuna.

²⁷ Chashna shamushpaca, ñuca angelcunatami cachasha. Paicunami ñuca acllashcacunataca cai pachapi tiyac mai llactacunamantapish tandachinga.

²⁸ Higo yura ima shina tucucta ricushpa, yuyaita japichic. Chai yurapi p'angacuna cutin huiñashpa jundarimucta ricushpaca, ña usiai punzhacuna chayamucuctami yachanguichic.

²⁹ Shinallatac cai ñuca huillashcacuna pactamucucta ricushpaca, Runa Tucungapac shamushca ñuca cutimuna pungullapi cashca shinata yachanguichic.

³⁰ Cunan punzha causaccuna manarac huañucpimi, cai ñuca huillashcacunaca pactanga. Chaica chashnatacmi canga.

³¹ Jahua pachapish, cai pachapish tucuringami. Chashna tucucpipish, ñuca huillashcacunaca pactacungallami.

³² Shina cacpipish ima punzha, ima horas ñuca cutimuna cashcataca pi mana yachanchu. Jahua pachapi cac angelcunapish mana yachanchu. Ñuca Diospac Churi cashpapish mana yachanichu, ashtahuanpish ñuca Taitallami yachan.

³³ Cancunaca ñuca ima horas cutimunata mana yachashcamantaca, alli yuyaihuan riccharishca shina chaparacuichic, Diosman mañaracuichic.

³⁴ Tucui caicunaca, shuc amo caru llactaman ric shinami. Pai manarac rishpami, paita servic runacuna imallata ruhuana cashcataca mandashpa saquin. Huasita cuidactapish ‘alli chaparangui’ nishpami saquin.

³⁵ Shinallatac cancunapish, Huasiyuc ima horas cutimunata mana yachashcamantaca, alli yuyaihuan riccharishca shina chaparacuichic. Paica tutayamuctachari, chaupi tutatachari, gallo cantai horastachari, mana cashpaca pacarinatachari cutimunga.

³⁶ Chashna cungailla chayamushpaca, cancunataca pacta suiñucucta japinman.

³⁷ Cancunata ‘chaparacuichic’ nishpaca, tucui mashnacunatami chashna nini— nirca.