HEBREOS 8 - Nuevo Testamento en Quichua Cañar 1996

Jesusca mushuc ari ninacuita pactachic cashcamanta

¹ Cancunaman ñucanchic nicushcamanta ashtahuan yallica, curacunata jatun mandac curatami charinchic. Paica jahua pachaman rishpami, Taita Dios maipi mandacucpi alli maquiman tiyacun.

² Paica cura shinami, Diospaclla cac huasipi curacuna ruhuana cashcata ruhuacun. Chai huasica mana gentecuna ruhuashca shinallachu, ashtahuanpish Mandac Diosllatac ruhuashcami can.

³ Tucui curacunata jatun mandac curacunami, Diosman imallata cushcacunata chasquishpa cungapac, animalcunata huañuchishpa Diosman cungapacpish acllashca can. Shina cashcamantami Apunchic Jesucristopish Diosmanca imallatapish cuna can.

⁴ Cai pachapi Moisés mandashcata ruhuashpa, Diosman cushpa, rupachic curacuna tiyashcarac cacpica, paica cai pachapi cashpaca, curallapish mana canmanchu carca.

⁵ Diosman mañana carpa huasita Moisés ruhuagricucpimi, Taita Dios rimashpaca: “Riqui, urcupi ima shina ruhuana cashcata canman ricuchishca shina, chai huasita ruhuangui” nirca. Shina cashcamantami cai pachapi cac curacuna imallata Diosman ruhuashpaca, jahua pachapi imalla tiyashcata ricuchic llandu shinalla ruhuacuncuna.

⁶ Ashtahuanpish curacunata jatun mandac ñucanchic curaca, Apunchic Jesucristomi. Paica caishuc curacuna ruhuana cashcata atishpami, ruhuangapac chasquishca. Paica tucuimanta yalli valishca Dios cushcacunahuanmi Taita Dioshuanpish, gentecunahuanpish mushuc ari ninacuita pactachirca.

⁷ Punta ari ninacui alli cashca cacpica, q'uipa ari ninacuica mana tiyanmanchu carca.

⁸ Shina cacpipish gentecuna mana alli pactachic cashcata ricushpami, Mandac Diosca: “Israel*f** gentecunahuan, Judá gentecunahuan mushuc ari ninacuita ruhuana punzhacunaca pactamungami.

⁹ Cai ari ninacuica, mana paicunapac ñaupa taitacunahuan ari ninacushca shinachu canga. Paicunataca ñuca maquihuanmi, Egipto llactamanta llucchircani. Shina cashpapish chai ari ninacushcata mana pactachishcamantaca saquircanillami.

¹⁰ Chai punzhacuna q'uipaca israelcunahuan ari ninacushpaca, ñuca mandashcacunataca paicunapac yuyaipimi yuyarichun churasha. Shinallatac paicunapac shungupipish, quillcashca shina cachunmi churasha. Ñucaca paicunapac Diosmi casha, shinallatac paicunaca ñuca huahuacunami canga.

¹¹ Chashna cacpica pipish paipac ricsishcacunaman shinallatac paipac aillucunamanpish ‘Mandac Diostaca ricsiyari’ nishpaca, ña mana ningachu, ashtahuanpish uchillacunamanta pacha callarishpa, jatuncunacamanmi tucui mashna ñucataca ricsic chayangacuna.

¹² Ñucaca tucui paicuna mana alli ruhuashcacunatami perdonasha, shinallatac paicunapac juchacunatapish ña mana ashtahuan yuyarishachu” ninmi.

¹³ Mushuc ari ninacuimanta Taita Dios rimashpaca, ñaupa ari ninacushcaca ña mauca cashcatami ricuchin. Chai maucayashcaca ña tucurimugricuc shinami can.