2 TIMOTEO 1 - Nuevo Testamento en Quichua Cañar 1996

Pablo “allillachu cangui” nishcamanta

¹ Ñucaca Taita Dios munashcamanta, Apunchic Jesucristo acllashca huillac Pablomi cani. Apunchic Jesucristohuan shuc shinalla tucushcamanta, pai cushami nishca causaita huillacmi cani.

² Ñuca c'uyashca huahua shina Timoteo, ñucanchic Taita Diospish, Apunchic Jesucristopish canta c'uyashpa, llaquishpa sumac causaita canman cushca cachun nishpami caita quillcani.

Jesucristomanta huillana cashcamanta

³ Ñaupa taitacuna ruhuashca shinallatac, ñucapish tucui shunguhuan Diospacta ruhuashpa, tutapish, punzhapish paiman mañacushpaca, canta yuyarishpami pagui nicunilla.

⁴ Ñucaca can huacashcataca yuyaricunillami. Shina cashcamanta cantaca ñahui ñahui ricushpa cushicunatami munani.

⁵ Can mana nic tucushpa, alli cric cashcataca yachanimi. Cambac aila Loidapish, cambac mama Eunicepish chashnallatacmi cric carca. Canpish chashnallatac cric cashcataca yachanimi.

⁶ Shina cashcamanta cambac uma jahuapi ñuca maquita churacpi, Taita Dios ima ruhuana cashcata cushcataca, nina huañugricucta causachic shina cutin causachichunmi nini.

⁷ Taita Diosca manchana yuyaita cuc espiritutaca mana cushcachu, ashtahuanpish imatapish ruhuai pudic, c'uyaita cuc, shinallatac quiquinllatac jarcarina yuyaita cuc Espiritutami ñucanchicmanca cushca.

⁸ Chashna cashcamanta ñucanchic Apunchic Jesucristomanta huillanatapish, huillacushcamanta ñuca prezu tiyacushcamantapish ama pinganguichu, ashtahuanpish alli huillaita huillacushcamanta llaquita apana cacpica, Taita Dios imatapish ruhuaclla cashcahuan ñuca shina llaquita apanguilla.

⁹ Taita Diosmi paipaclla causachun nishpami, ñucanchictaca quishpichishpa c'ayarca. Mana ñucanchic ima allita ruhuashcamantachu quishpichirca, ashtahuanpish Taita Dios c'uyashcallamantami, Jesucristohuan ñucanchic shuc shinalla tucucpi quishpichirca. Cai pacha manarac tiyacpimi, ñucanchictaca Taita Diosca c'uyashpa, chashnaca ruhuasha nishca.

¹⁰ Chashnami Quishpichic Jesucristota cai pachaman cachashpa, Taita Diosca c'uyac cashcata ricuchirca. Pai quishpirinamanta huillashpa, huañuita chingachirca, shinallatac mana chingarina causaitapish apamurca.

¹¹ Taita Diosmi cai alli huillaita huillanata ñucaman mingarca. Shinallatac huillac cachunpish, yachachic cachunpish ñucataca cacharca.

¹² Chashna huillac cashcamantami tucui cai llaquicunataca apacuni. Shina cacpipish ñuca pita crishcataca yachanimi. Shinallatac ñucaman mingashcataca, shamuc punzhacaman huacaichina cashcatapish allimi yachani. Chashna cashcamanta manatac pinganichu.

¹³ Canca ñuca ima shina alli yachachishca shinallatac, Jesushuan shuc shinalla cashcamantaca paita crishpa, paita c'uyashpa causachun ninimi.

¹⁴ Ñucanchicpi causacuc Diospac Espíritu ayudacushcamantaca, Dios mingashca sumac yachanacunataca alli huacaichingui ninimi.

¹⁵ Asia llactamanta caccunaca tucui mashna ñucataca shitashpa rishcataca, canllatac yachanguimi. Paicunapurapica Figelo runapish, Hermógenes runapish carcami.

¹⁶ Apunchic Jesusca Onesiforotapish, tucui paipac huasi ucupi causaccunatapish mai llaquichun ninimi. Paimi ñuca prezu cacpica, tauca cutin mana pingashpa ñucata ricuc shamushpa cushichic carca.

¹⁷ Roma llactaman chayashpaca, mana samarishpami taringacaman ñucataca mashcarca.

¹⁸ Chashna cashcamanta Apunchic Jesusllatac tucuita taripana punzhapica, mai llaquishca cachunmi nini. Efeso pueblopi ima shina allicunata ruhuashpa cushichishcataca, canllatacmi alli yachangui.