1 CORINTIOS 4 - Nuevo Testamento en Quichua Cañar 1996

Jesusmanta huillaccuna imata ruhuashcamanta

¹ Cancunaca ñucanchicta Cristopacta ruhuaccunalla cashcata, shinallatac Diosmanta pipish mana yachashca huillanata huillaccuna cachun, Dios mingashca cashcatami yuyana canguichic.

² Maijanta imata ruhuachun churashpaca, pactachic cashcatami ricushun nincuna.

³ Cancuna cashpa, maijan mandac cashpapish, ñucata taripashpa ima shina juchanchinataca mana manchanichu. Ñucallatacpish ima shina alli cashcata, mana alli cashcataca mana nirishachu.

⁴ Ñuca yuyaica imata mana juchanchinchu. Chaita nishpaca, “jucha illacmi cani” mana ninichu. Ñuca ima shina cashcataca, Apunchic Jesucristomi taripashpa ricuchinga.

⁵ Shinashpaca maijanta juchanchina cacpipish, Apunchic Jesús cutimungacaman amarac imata juchanchinguichicchu. Paimi amsapi imalla pacashcacunatapish, shungu imata yuyashcatapish punzhapi shina tucui ricuchinga. Shina cacpimi, Taita Diosca quiquin imata ruhuashcata ricushpa alli ninga.

⁶ C'uyashca criccuna, Apolostapish shinallatac ñucallatatacpish ima shina cashcata ricuichic. Caicunataca cancunapac allipacllatacmi rimani. Caitaca ñucanchic shina pipish quillcashcapi nishca shinamanta ama yallita ruhuachun, shinallatac “paimi alli, caishucca mana allichu” nishpa ama rimachunmi quillcani.

⁷ Shinashpaca, ¿pitac cantaca: “Canmari chaishuccunata yalli alli cangui” ningayari? Tucui can charishcacunaca, ¿manachu Dios cushca? Cutin Dios cushcacunallahuantacca, ¿ima nishpatac can quiquinllatac charishca shina, jatun tucunguiyari?

⁸ Cancuna tucui ima illashcata charishpaca, chayuccuna cashcatami yuyanguichic. Mana ñucanchichuan cashpapish, jatun mandaccuna shina cashcatami yuyanguichic. ¡Cancunaca mandaccunatac cashpaca, allimari canguichicman! Shina cacpicarin, ñucanchicpish cancunahuan mandanchicmanmi.

⁹ Ñuca yuyaipica, Jesús acllashca ñucanchic huillaccunataca huañuchingapac Dios huashayachishpa, churashca shinami canchic. Chaimantami cai pachapi causac tucui gentecunapacpish, angelcunapacpish asina tucushcanchic.

¹⁰ Ñucanchicca Cristota c'aticushcamantaca imata mana yachac, upacuna shina cashcatami yachanchic. Cutin cancunaca Cristomanta yachaccuna cashcatami yuyanguichic. Ñucanchicca imatapish mana ruhuaipaccuna cashcatami yachanchic. Cancunaca imatapish ruhuaipaccunalla cashcatami yuyanguichic. Ñucanchictaca mana ricunachishpa, p'iñaccuna cashcatami yachanchic. Cutin cancunaca: “Ñucanchictaca tucuimi alli nincuna” nishpami yuyanguichic.

¹¹ Cunancamanmi yarcaihuan, yacunaihuan, causana huasi illaclla, churana illaclla tucushpa, llaquita apashpa, gentecuna macashcapish canchic.

¹² Shinallatac ñucanchic quiquin maquihuan imallata ruhuashpami shaicushcanchic. C'amishpa rimaccunamanca, Taita Dios allicunata cushca cachun ninchicmi. Shuccuna llaquichicpipish, llaquita apanchicllami.

¹³ Ñucanchicta ima millaita rimacpipish, c'uyai shunguhuanmi cutichinchic. Cunan punzhacamanmi cai pachapi imapac mana valishca, millana mapata shina ñucanchictaca charincuna.

¹⁴ Mana pingaichingapacchu caicunataca quillcani, ashtahuanpish ñuca quiquin huahuacunata shina c'uyashcamantami, cai rimaicunahuanca cunashpa yachachini.

¹⁵ Cancunaca Cristomanta yachachiccunata chunga huarangata charishpapish, mana tauca taitacunata charinguichicchu. Alli huillaita ñuca huillacpi, cancuna Jesucristota crishpa paihuan shuc shinalla tucushcamantaca, cancunapac taita shinaca ñucami cani.

¹⁶ Shina cashcamanta ñuca causashca shinallatac, cancunapish causaichic.

¹⁷ Chaimantami Apunchic Jesusta alli cric, ñuca c'uyashca huahua shina cac Timoteota cachagrini. Paimi ñuca Apunchic Jesucristota crishpa, ima shina causanata yachachishpa yuyachinga. Ñucapish chashnallatacmi tandanacushca criccunamanca maipipish yachachicuni.

¹⁸ Maijan cancunaca: “Pabloca ña mana ricungapac shamungachu” yuyashpami, “ñucami alli yachac cani” niricunguichic.

¹⁹ Ashtahuanpish Apunchic Jesús munacpica, utcami cancunata ricungapac risha. Chaipimi chai jatun tucushpa, “alli yachac cani” niccunataca mana shimillahuan nicushcata uyasha nini, ashtahuanpish imatapish ruhuac cashcatatac ricusha.

²⁰ Dios mandacucpi causanaca mana shimillahuan “allimi cani” nirinachu, ashtahuanpish imatapish ruhuac cashcatatac ricuchinami.

²¹ Ñuca cancunapacman shamushpaca, ¿llaquichingapacchu shamuchun ninguichic? Mana cashpaca, ¿alli shungu c'uyaihuanchu shamuchun ninguichic?