1 CORINTIOS 16 - Nuevo Testamento en Quichua Cañar 1996

Criccunaman cachangapac cullquita tandachichun nishcamanta

¹ Diospaclla cac criccunaman cachangapac cullquita tandachingapacca, Galacia llactapi cac criccunaman ñuca yachachishca shina, cancunapish ruhuana canguichic.

² Cancunaca mashnata japishcamantaca, tucuillatacmi ashallatapish ch'icanyachishpa, semana callari domingo punzhaca tandana canguichic. Ñuca chayacpi ama tandana tucuchunmi, chashna ruhuachun nini.

³ Ñuca chayashpaca, cancuna acllashca criccunallatatacmi quillcata ruhuashpa, cancuna tandachishca cullquitapish Jerusalén pueblopi saquigrichun cachasha.

⁴ Shinallatac ñucapish rina cacpica, paicunaca ñucahuan ringacunallami.

Maijan llactacunallaman rina cashcata Pablo yuyarishcamanta

⁵ Ñuca rishpaca, Macedonia llactatami rina cani. Macedonia llactamantaca Corinto pueblomanmi chayasha.

⁶ Cancunapacman chayashpaca, asha punzhacunacaman saquirishapishchari, mana cashpaca tucui tamia quillacunata saquirishapishchari. Shina saquiricpica, chai q'uipa ñuca maiman rina cacpipish, imatapish ricushpa cachanguichic.

⁷ Cunanca ashata ricushpallaca mana risha ninichu. Apunchic Jesús munacpica, unaicamanmi cancunahuan saquirinata munacuni.

⁸ Ashtahuanpish Pentecostés*f** fiesta punzhacuna chayamungacamanmi, cai Efeso pueblopica cagrini.

⁹ Taucacuna ñucata p'iñacucpipish, Jesucristomanta ñuca huillanaca maipipish pungu pascashca shinami can.

¹⁰ Timoteo chayacpica, cushilla cachun paitaca alli chasquinguichic. Paica ñuca shinallatacmi Apunchic Jesucristopacta ruhuac can.

¹¹ Chaimanta cancunapuramanta maijanpish paitaca ama yangallapi churanguichicchu. Chaipac randica, pai ñucata cushilla ricungapac shamuchun ayudaichic. Ñucaca caishuc criccunahuanmi shuyacuni.

¹² Shina cacpipish huauqui Apolostaca criccunahuan rishpa, cancunata ricugrichunmi yallita mañarcani. Shina mañacpipish, mana risha nircachu. Shina cashpapish pai rina tucucpica ringallami.

Ña tucuchingapac “allilla cashca cachun” nishcamanta

¹³ Riccharishca shina tucui shunguhuan crishpa, imatapish mana manchashpa, alli sinchiyashpa c'atiraichic.

¹⁴ Shinallatac tucui imata ruhuashpapish, c'uyaihuan ruhuaichic.

¹⁵ C'uyashca criccuna, Acaya llactapi quishpirinamanta alli huillaita huillacpica, Estéfanas paipac familiandic punta cric tucushcataca cancunallatac yachanguichicmi. Paicunami shuctac criccunataca servina yuyailla causancuna.

¹⁶ Shina cashcamantami paicuna shina imatapish ruhuaccunata, shinallatac tucui allita ruhuashpa ayudaccunatapish cazuchun munani.

¹⁷ Ñuca cancunahuan mana cashpa llaquilla cacpipish, Estefanaspish, Fortunatopish, Acaicopish shamushcamantami ñucaca cushicuni.

¹⁸ Paicunami cancunata cushichic shinallatac, ñucatapish cushichircacuna. Chai shina ruhuac gentecunataca pagui nicunallami canchic.

¹⁹ Asia llactapi cac tandanacushca criccunaca “allilla cashca cachun” nishpami cachancuna. Aquilapish, Priscilapish, shinallatac paicunapac huasipi tandanacuc criccunapish Apunchic Jesushuan shuc shinalla tucushcamantami, “allilla cashca cachun” nishpa cachancuna.

²⁰ Tucui criccunami “allilla cashca cachun” nishpa cachancuna. Chuya shunguhuan muchashpa, caishuc chaishuc “allilla cashca cachun” ninacuichic.

²¹ Ñucaca Pablomi cani. Ñucami quiquin maquihuan quillcashpa, “allilla cashca cachun” nishpa cachani.

²² Maijanpish Apunchic Jesusta mana c'uyactaca, Taita Dios llaquichishca cachun. ¡Ñucanchic Apunchic Jesús, shamuilla!

²³ Apunchic Jesucristo paipac sumaimana c'uyaita tucui cancunaman cushca cachun.

²⁴ Apunchic Jesucristohuan shuc shinalla tucushcamantaca, tucui cancunatami ñucaca c'uyacunilla.