1 CORINTIOS 12 - Nuevo Testamento en Quichua Cañar 1996

Diospac Espirituca imata ruhuac cachun cuc cashcamanta

¹ C'uyashca criccuna, Diospac Espíritu imata ruhuac cachun cuc cashcatami yachachun munani.

² Cancuna manarac cric cashpaca, mana rimaric ruhuashcalla dioscuna umashcami carcanguichic. Chaitaca cancunallatac yachanguichicmi.

³ Chashna cashcamanta Diospac Espíritu maijanta rimachicucpica: “Jesusca ima llaquipish tucushca canman” nishpaca, mana ninmanchu. Shinallatac maijanpish Diospac Espíritu mana rimachicucpica: “Jesusca Mandacmi” nishpaca, mana ninmanchu.

⁴ Tandanacushca criccunapurapica, ch'ican ch'ican imata ruhuaccunami tiyan. Shina cacpipish chai ruhuanata cucca Diospac Espiritullami.

⁵ Ch'ican ch'ican servinami tiyan. Shina cacpipish tucui chaicunataca Apunchic Jesusllami ruhuachicun.

⁶ Ch'ican ch'ican imata ruhuaipaccunami tiyan. Shina cacpipish Taita Diosllatacmi tucuipi, tucui imatapish ruhuachicun.

⁷ Tucuipac allipacmi, Taita Diosca tucui ñucanchicman allicunata ruhuachishpa, paipac Espíritu ñucanchic shungupi cashcata ricuchicun.

⁸ Taita Dios paipac Espirituta cushpami, maijancunataca alli yuyaihuan rimachin. Cutin maijancunamanca chai Espiritullatacmi alli yachaicunata cun.

⁹ Cutin maijancunaca chai Espiritullamantatacmi alli cric tucuncuna. Cutin maijancunaca ungushcacunata jambiccunami tucuncuna.

¹⁰ Cutin maijancunaca pi mana ruhuaipacta ruhuaccunami tucuncuna. Cutin maijancunaca Dios ima nishcata huillaccuna tucuncuna. Cutin maijancunaca alli Espirituyuc cashcata, mana alli espirituyuc cashcata yachaccunami tucuncuna. Cutin maijancunaca jaicapi mana uyashca rimaicunata rimaccunami tucuncuna. Cutin maijancunaca chai rimai imata nisha nicushcata entendichiccunami tucuncuna.

¹¹ Ashtahuanpish tucui caicunataca imatapish ruhuac Diospac shuclla Espiritullatacmi, maijanman cusha nishca shina imata ruhuaccuna cachun cun.

Tandanacushca criccunaca shuc cuerpo shina cashcamanta

¹² Cuerpoca shuclla cashpapish, ch'ican ch'ican partecunatami charin. Chashna cashpapish shuc cuerpollami can. Chashnallatacmi Cristopac cuerpomanta nishpapish shuclla can.

¹³ Chashna shuclla cuerpo tucungapacmi, tucui ñucanchicca israel*f** cashpa, mana israel cashpa, amopacta ruhuac cashpa, mana amopacta ruhuac cashpapish, Taita Diospac shuclla Espirituhuan bautizarishca canchic. Shinallatac Taita Diosca chai Espiritullatatacmi yacuta ubiachic shina, ñucanchicmanca curca.

¹⁴ Cuerpoca mana shuc partellatachu charin, ashtahuanpish ch'ican ch'ican partecunatami charin.

¹⁵ Chaquica: “Ñucaca mana maqui cashcamantaca, mana cuerpopacchu cani” nishpapish, cuerpopac canataca mana saquinchu.

¹⁶ Rinripish: “Ñucaca mana ñahui cashcamantaca, mana cuerpopacchu cani” nishpapish, cuerpopac canataca mana saquinchu.

¹⁷ Tucui cuerpo ñahuilla cacpica, ¿ima shinatac uyanchicman? Shinallatac tucui cuerpo rinrilla cacpica, ¿ima shinatac mutquinchicman?

¹⁸ Ashtahuanpish Taita Diosca ch'ican ch'ican partecunatami, maipimi alli cana cacpi cuerpopica churashca.

¹⁹ Tucui cuerpo shuc parte shinalla cacpica, ña mana cuerpo shina canmanchu.

²⁰ Chashna cuerpopi ch'ican ch'ican partecuna tiyacpipish, cuerpoca shucllami.

²¹ Ñahuica maquitaca: “Cantaca mana ninichu” nishpaca, mana ninmanchu. Shinallatac umapish chaquitaca: “Cantaca mana ninichu” nishpaca, mana ninmanchu.

²² Ashtahuanpish imapacpish mana valic partemi, cuerpopacca mai valic can.

²³ Maijanmi yangalla cac partetami ashtahuan cuidarishpa, alli churarinchic. Shinallatac maijanmi pinganayaclla cac partetami, tucuimanta yalli jarcarishpa churarinchic.

²⁴ Ashtahuanpish tucui mashna ricunalla partecunataca, mana jarcarishpa churarinachu. Taita Diosca yangalla cac parteta ashtahuan jarcarichunmi, cuerpotaca ruhuashca.

²⁵ Cuerpopi tiyac partecuna ama ch'icanyarinacushpa, caishuc chaishuc ayudanacuchunmi, chashnaca ruhuashca.

²⁶ Cuerpopi shuc parte llaqui tucucpica, caishuc partecunapish llaquirincunami. Shinallatac shuc parte allita japicpica, tucui partemi cushicuncuna.

²⁷ Cancunaca Cristopac cuerpo shina cashpami, ch'ican ch'ican partecuna canguichic.

²⁸ Taita Diosca tandanacushca criccunapurapica, puntaca Jesús acllashca huillaccuna tiyachun, q'uipaca Dios ima nishcata huillaccuna tiyachun, chaipac q'uipaca yachachiccuna tiyachunmi munan. Shinallatac pi mana ruhuaipacta ruhuaccuna, jambiccuna, ayudaccuna, pushaccuna, jaicapi mana uyashca rimaicunata rimaccuna tiyachunmi munan.

²⁹ Mana tucuichu Jesús acllashca huillaccuna, Dios ima nishcata huillaccuna, yachachiccuna, shinallatac pi mana ruhuaipacta ruhuaccuna can.

³⁰ Shinallatac mana tucuichu ungushcacunata jambiccuna, jaicapi mana uyashca rimaita rimaccuna, shinallatac chai rimashca imata nisha nicushcata entendichiccuna can.

³¹ Tucui caicunamantaca, imapish ashtahuan valishca ruhuaicunatami ruhuanata munaichic. Shina cacpipish tucui caicunamanta yallica, ashtahuan alli causanatami ñucaca yachachigrini.