Tito 3 - Tayta Diospa Wilakuynin

Imaypis alilata rurayänanpaq yäsishqan

¹ Wawqi panikunata yachasinki mandaqkunata y autoridäkunata respitar wiyakuyänanpaq y alilata imaypis rurayänanpaq.

² Saynöpis yachasinki washarima mana kayänanpaq, pitapis mana wajupäyänanpaq, ali shonquyuq kayänanpaq y pïmaywanpis ali rikanakur kawayänanpaq.

³ Jesucristuta manaraq chaskikurqa noqansipis wakin runakunanölami mana tantiyakushpansi Tayta Diosta wiyakurqansisu. Jusalikuykunata kachariytapis manami kamäpakurqansisu. Chikinakur rimanakurmi kawarqansi.

⁴ Sayno kawaykashqami Tayta Dios kuyakuq kar

⁵ salvamashkansi. Manami alita rurashqansipitasu salvamashkansi, saypa trukanqa jusayuq kaykashqapis kuyapämashpansimi salvamashkansi. Jusansipita maylamashpansimi Espíritu Santuta kachamur mushuq kawayta qomashkansi.

⁶ Espíritu Santuta sayno kachamush salvamaqninsi Jesucristo noqansi rayku wanush kaptinmi.

⁷ Jusayuq kashqapis dembaldilami perdonamashkansi herenciansita chaskir paypa nawpancho imayyaqpis kawanansipaq.

⁸ Kay nishqäkuna lapanpis rasun kaqla kaptin wawqi panikunata mana qelanaypa yachasinki. Sayno yachasiptikimi tantiyakuyanqa Tayta Dios munashqanno imaypis alikunata rurayänanpaq. Kay yachasishqäkuna lapan runakunapaq alimi kaykan.

⁹ Wakin runakunaqa unay ayllunkuna pï kayashqanpita y Israel runakunapa costumbrinkunalapitami apänakuyan. Saykunapita piwanpis ama apänakuysu. Apänakushqayki manakaqlapaqmi kanqa.

¹⁰ Say apänakasiqkunataqa ishkay kutiyaqla tantiyasinki. Sayno tantiyasiptikipis mana cäsuyäshuptikiqa qarqurinki.

¹¹ Musyashqaykinöpis say runakunaqa jusalikuylacho kawarmi Tayta Diosta wiyakuyansu. Sayno kayashqanpitami Tayta Dios castiganqa.

Carta ushanan

¹² Noqa yarpaykä wawqinsi Artemasta karpis o Tíquicuta karpis qam kaqman kachamuytami. Mayqanpis chämuptinqa Nicópolisman jukla shamunki saycho tinkunansipaq. Tamya killa päsashqanyaq saycho taytami yarpaykä.

¹³ Abogädu Zenaswan Apolos viäjita yarquyänanpaq kamarikuyaptin ima nistäyashqantapis lapayki kamaripäyanki.

¹⁴ Sayno yanaparmi wawqi panikuna yachakuyanqa wakin kaqtapis yanapäyänanpaq. Sayno rurarqa Tayta Dios munashqannömi kawayanqa.

¹⁵ Kaycho kaykaq wawqi panikuna lapanmi salüdunta apasikayämun. Saynöla noqapa salüdütapis wawqi panikunata qoykulanki. Lapaykipis ali kawayänaykipaq Tayta Dios kuyapäyäshushpayki yanapaykuyäläshunki. [Amén.]