Tito 2 - Tayta Diospa Wilakuynin

Shumaq yachasinanpaq Tituta yäsishqan

¹ Qamqa Jesucristupa wilakuynin nishqannöla wawqi panikunata yachasiy.

² Awkinkunata yachasinki lutanta imatapis mana rurayänanpaq, alilata rurar pïmaypitapis respitash kayänanpaq y shumaq yarpachakuskir imatapis rurayänanpaq. Saynöpis yachasinki Tayta Diosman lapan shonqunwan yärakuyänanpaq, kuyapäkuq kayänanpaq y imachöpis pacienciakuq kayänanpaq.

³ Chakwankunatapis yachasinki Tayta Dios munashqannöla shumaq kawayänanpaq, pitapis mana tumpayänanpaq y upyalaman mana churakash kayänanpaq. Saypa trukanqa wakintapis yachasiyäsun ali kawayänanpaq.

⁴ Saynöpis jipash kaq warmikunata yachasiyäsun runanta y wawankunata kuyayänanpaq.

⁵ Saynöpis yachasiyäsun shumaq yarpachakuskir imatapis rurayänanpaq, majanta mana jarukuyänanpaq, wayincho rurayninkunata shumaq rurayänanpaq, kuyapäkuq kayänanpaq y runanta wiyakuyänanpaqpis. Sayno ali kawaqta rikarmi Tayta Diospa palabranta pipis manakaqman churanqasu.

⁶ Saynöla maqtakunatapis tantiyasinki shumaq yarpachakur alilata rurayänanpaq.

⁷ Rikakuyäshunaykipaq kikikipis ali kaway. Pitapis yachasirqa Tayta Diospa wilakuynin nishlanta formal yachasinki.

⁸ Pipis mana jamurpäshunaykipaq rasun kaqlata yachasinki. Sayno ali yachasiptikiqa contransi kaqkuna penqakur manami washansita rimayanqasu.

⁹ Ashmaykunatapis yachasinki patronninta wiyakuyänanpaq y mandashqantapis ashak ashakla rurayänanpaq. Saynöpis yachasinki shimisapa mana kayänanpaq

¹⁰ y patronninpa imantapis mana suwapäyänanpaq. Saypa trukanqa patronnin yärakunanpaq alilata rurayäsun. Jesucristuta chaskikuq ashmaykuna sayno kawaqta rikarmi runakuna tantiyakuyanqa salvamaqninsi Tayta Diospa wilakuynin ali kashqanta.

¹¹ Lapan runakunata salvananpaqmi Tayta Dios kuyapämashpansi Jesucristuta kachamurqan.

¹² Paymi tantiyasimansi kikinsi munashqansino kawanansipa trukan jusalikuykunata kacharir pay munashqanno alilata rurar kawanansipaq.

¹³ Sayno kawarmi salvamaqninsi Jesucristo kutimushqanyaq kamarikushla shuyakuykäshun. Paymi lapanpaq munayyuq Diosninsi kar lapan runakuna rikay chipipiykar kutimunqa.

¹⁴ Jusalikuypita jorqamänansipaqmi wanurqan. Perdonamashpansimi shuntakamashkansi kuyashqan runakuna kanansipaq y lapan shonqunsiwan imatapis alilata ruranansipaq.

¹⁵ Wawqi Tito, kay yäsishqäkunata pitapis mana mansapaypa yachasinki, shakyäsinki y tantiyasinki. Pipis manakaqman mana churashunaykipaq shumaq kawanki.