Tito 1 - Tayta Diospa Wilakuynin

Carta qalaykunan

¹ Noqa Pablo, Tayta Diospa sirviqnin y Jesucristupa apostolnin karmi, Tayta Dios akrashqan kaqkunata wilakuyninta yachaykäsï Jesucristuman yärakur pay munashqanno kawayänanpaq.

² Tayta Dios kay pasata manaraq kamar promitishqannölami pay akrashqan kaqkuna gloriacho imayyaqpis kawayanqa. Tayta Diosqa manami lulakunsu, sinöqa promitishqanta imaypis cumplinmi.

³ Tiempu chämuptinnami wilakuyninta wilakuqkunawan salvamaqninsi Tayta Dios promitishqanta cumpliykan. Sayno cumplirmi noqatapis wilakunäpaq churamash.

⁴ Tito, noqa yärakushqäno Jesucristuman yärakurmi kuyay surïno kaykanki. Papäninsi Tayta Dios y salvamaqninsi Jesucristo kuyapäshushpayki ali kawanaykipaq yanapaykuläshunki.

Jesucristupa wilakuqninkuna imano kayänanpaq kashqanpis

⁵ Creta islapita shakamur qamta nirqä arreglaypaq kaqkunata arreglanaykipaq y markan markan aywar wawqi panikuna shuntakäyashqancho mayor wawqikunata churanaykipaqmi.

⁶ Mayor wawqi kananpaqqa pïmaypitapis ali rikash kayanman. Saynöpis juk warmiyuqla kayanman. Surinkunapis Tayta Diosman yärakur alilata ruraq y mamantawan taytanta cäsukuq kayanman.

⁷ Tayta Diosta sirviq kaykarqa y wawqi panikunata rikaq kaykarqa mayor wawqikuna kayäsun pïmaypitapis mana jamurash, mana runa tukuq, mana ajayshïtu, mana upyaq, mana pelyaq y imatapis mana chaskipakuq.

⁸ Saypa trukanqa kayäsun posädasikuq, alilata ruraq, ali yarpayyuq, Tayta Dios munashqanno kawaq y tantiyakuykur imatapis ruraq.

⁹ Jesucristupa wilakuyninta yachakuyashqannöla ali yachasiq kayäsun. Saynöpami Tayta Dios munashqanno kawayänanpaq wawqi panikunata shakyäsiyanqa y lutan yachasikuqkunatapis lutanta mana yachasiyänanpaq shumaq tantiyasiyanqa.

Lutan yachasikuqkunata mana chaskipäyänanpaq yäsishqan

¹⁰ Askaqmi lutan yachasikuqkuna puriykäyan wawqi panikunata engañayashpan. Paykuna mana tantiyakurmi Israel runakunano cuerpunta señalakuyänanpaq yachaykäsiyan.

¹¹ Wakin wawqi panikunata maynami lapan castantinta sayno engañayash. Paykuna lutanta yachaykäsiyan imatapis sakyayänan raykulami. Sayno lutanta yachasiyänanta ama kachapaysu.

¹² Juk Creta runami kayno qelqarqan: <>.

¹³ Rasun kaqtami say runa qelqarqan. Saymi lutan yachasikuqkunata olqutupaypa tantiyasinki Tayta Dios munashqanno kawayänanpaq.

¹⁴ Saynöpis tantiyasinki Israel runakuna lutan yachasiyashqanta mana chaskipäyänanpaq. Lutanta yachasikuqkunaqa Tayta Diospa palabranta mana cäsukurmi kikinkunapa yarpaylanpita yachaykäsiyan.

¹⁵ Lutanta yarpaq y mana cäsukuq karmi imapis mana ali kashqanta yarpäyan. Jesucristupa wilakuyninta chaskikuqkunami isanqa tantiyakuyan Tayta Dios kamashqankuna lapanpis ali kashqanta.

¹⁶ Say lutan yachasikuqkuna nikäyan: <>. Sayno niyaptinpis lutankunata rurar kawayashqanta rikarmi runakuna tantiyayan Tayta Diosta mana cäsukuykäyashqanta. Paykunaqa Diosta mana cäsukur runa mayinta chikiyashpanmi imatapis alitaqa rurayansu.