Santiago 4 - Tayta Diospa Wilakuynin

Mana jusalikuypa kawanansipaq nishqan

¹ ¿Imanirtaq pelyalar y qayapänakular kawaykäyanki? Shonquykikunacho mana ali yarpay kaptinmi sayno kaykäyanki.

² Wakinkuna imaykayuqpis kaqta rikarmi qamkunapis paykunano kayta munayanki. Saymi imaykanöpapis tariyta munar runa mayikitapis wanusiyanki. Sayno rurarpis Tayta Diosta mana manakurmi munayashqaykita tariyankisu.

³ Manakaqkunacho ushayänaykipaq kaptinmi manakurpis chaskiyankisu.

⁴ ¡Mana wiyakuq jusasapa runakuna! ¿Manaku musyayanki mana alikunata rurar Tayta Diospa contran kayashqaykita? Pipis mana alikunata rurarqa Tayta Diospa contranmi kaykan.

⁵ ¿Manaku criyiyanki Tayta Diospa palabran nikashqanta? Saychömi nimansi mana alikunata ruraptinsi noqansiman kachamushqan Espíritu Santu rabyakushqanta.

⁶ Sayno karpis kuyapämansimi. Saymi palabranchöpis kayno qelqaraykan: <>.

⁷ Sayno kaykaptinqa mana yachaq tukuylapa Tayta Dios nishqanta cäsukuyay. Diabluta ichipäyay. Ichipäyaptikiqa qeshpikunqami.

⁸ Tayta Dioswan imaypis kawayay. Sayno kawayaptikiqa paypis qamkunawanmi kaykanqa. ¡Jusasapakuna! Makikikunata awikuyashqaykino jusalikuykunata kachariyay. Janan shonqula cäsukuyänaykipa trukanqa lapan shonquykikunawan Tayta Diosta cäsukuyay.

⁹ Jusalikuyashqaykipita seqaypa lakikur waqayay. Asikuyänaykipa trukanqa waqayay. Kushikuyänaykipa trukanqa lakikuyay.

¹⁰ Tayta Diosta cäsukur mana yachaq tukuypa kawayay. Sayno kayaptikiqa yanapäyäshunkimi.

Mana jamuräkuq kanansipaq nishqan

¹¹ Wawqi panikuna, mayqaykikunapis ama jamuränakuyaysu. Pitapis jamurarqa Tayta Dios kuyanakunansipaq nimashqansi mandamientutami manakaqman churaykansi. Tayta Diospa mandamientunqa manami manakaqman churanansipaqsu kaykan, saypa trukanqa cäsukunansipaqmi.

¹² Tayta Diosmi leyninkunata qomashkansi. Paylami nimäshun jusayuq o jusaynaq kashqansita. Paylami munayyuq kaykan salvamänansipaq o infiernuman qaykamänansipaqpis. Sayno kaykaptinqa ¿pitaq qam kanki runa mayikita jamuränaykipaq?

Ima päsananpaq kashqanta mana musyashqansi

¹³ Wakinnikiqa nikäyanki: <>. Sayno niqkuna, shumaq wiyakayämay.

¹⁴ Manami musyansisu waraykuna ima päsamänansipaq kashqantapis. Pukutay yurirkamur elaqakäkushqannölami noqansipis ushakaqla kaykansi.

¹⁵ Sayno kaykaptinqa kayno nishwan: <>.

¹⁶ Sayno niyänaykipa trukanqa imata rurayänaykipaqpis factaykäyankimi. Sayno parlayashqayki manami alisu.

¹⁷ Alikunata ruranansipaq kashqanta musyaykar mana rurarqa jusalikuykansimi.