Santiago 3 - Tayta Diospa Wilakuynin

Lutanta mana parlanansipaq nishqan

¹ Kuyay wawqi panikuna, lutanta yachasiyaptikiqa Tayta Diosmi juzgayäshunki. Sayno kaykaptinqa shuntakäyashqaykicho lapayki yachasikuq kaylataqa ama munayaysu.

² Pipis shiminta dominakurqa jusaynaqmi kanman. Say runaqa cuerpuntapis jusalikuypita dominakunmanmi. Shiminsita dominakuyta mana kamäpakurmi jusalikuykansi.

³ Musyashqansinöpis cawallupa shiminman frënuta churaparkurmi munashqansipa purisinsi.

⁴ Jatunkaray büquita wayra apaptinpis taksha timonlawanmi manijan munashqanpa apananpaq.

⁵ Upinaykaqla shanshapis ratarkurqa jirkata ruparmi ushan. Saynölami shiminsipis takshala kaykarpis yalimashpansi imaykamanpis jitarpamansi.

⁶ Noqansi parlashqansipis ninanömi kaykan. Mana alikunata parlarmi ali kawakuq runatapis mana ali kawayman churansi. Shiminsiqa takshala kaykarpis dominamashqami pasaypa mana ali kawansi. Nina imatapis rupar ushashqannömi mana ali parlashqansipis kaykan. Lutankunata parlarqa Satanás munashqantami ruraykansi.

⁷ Ima uywatapis runakunaqa manshuyäsiyta yachayanmi: chucaru kaqkunata, pajaqkunata, culebrakunata y lamarcho kaqkunatapis.

⁸ Shimintami isanqa pipis dominakuyta kamäpakunsu. Runapa shiminqa chucaru uywano y venënunömi kaykan.

⁹ Say shimilansiwanmi Tayta Diospa jutintapis joqarkunsi y runa mayinsipa washantapis rimansi. Kikin niraqta Tayta Dios kamaykämashqaqa manami sayno rimashwansu.

¹⁰ Say shimilansiwanmi alitapis mana alitapis parlansi. Kuyay wawqi panikuna, ama sayno kashunsu.

¹¹ ¿Juk pukyulapita pochquq yaku y mishkiq yaku yarqamunmansuraq?

¹² ¿Hïgus jachapis aceitünasta wayunmansuraq? ¿Üvapis hïgusta wayunmansuraq? ¡Manami! Saynöpis manami juk pukyulapitaqa pochquq yaku y mishkiq yaku yarqamunsu. Sayno kaykaptinqa lutankunata parlanansipa trukan alilata parlashun.

Rasunpaypa yachaq kar imano kawanansipaqpis nishqan

¹³ Qamkuna kaqcho mayqanpis yachaq y tantiyaq karqa mana yachaq tukuylapa alikunata rurasun. Sayno kawaptinraqmi yachaq kashqan musyakanqa.

¹⁴ Runa mayinta chikir shonquncho nanapararqa ama yarpäsunsu yachaq kashqanta. Sayno alabakurqa manami rasun kaqtasu parlaykansi.

¹⁵ Yachaq tukuyqa manami Tayta Diospitasu kaykan, sinöqa runapa yarpayninpita y Satanáspitami.

¹⁶ Chikinakur y nanaparänakur kawarqa pasaypa mana alimi kawansi.

¹⁷ Tayta Dios yachayta qomashqami isanqa pay munashqanno kawansi. Saymi pïmaywanpis ali kawansi, kuyanakunsi, ali shonqu kansi, kuyapäkunsi, alikunata imaypis ruransi, pïmaytapis ali rikansi y rasun kaqlata parlansi.

¹⁸ Runa mayinsiwan ali kawashqansita rikakurmi wakin runakunapis tantiyakuyanqa runa mayinwan ali kawayänanpaq. Saynöpami lapansipis Tayta Dios munashqanno kawashun.