Salmo 88 - Tayta Diospa Wilakuynin

1

Salmo 88 (87) Wanuypita salvananpaq manakushqan

1 (1) Kay salmutaqa cantanansipaqmi Corépita miraqkuna qelqayarqan. Cantaqkunapa mandaqninpaqmi. Mahalat. Ezra casta runa Hemán qelqashqan salmumi kaykan.

¹ 1 (2) Salvamaq Tayta Diosnï, sakaypapis junaqpapis yanapaykamänaykipaqmi manakamü.

² 2 (3) ¡Manakamushqäta wiyaykalämay! ¡Ruwakamushqäta awniykalämay!

³ 3 (4) Fiyupami nakaykä. Wanuypis janächönami.

⁴ 4 (5) Wanunäpaqna kashqantami pïmaypis yarpäyan. Pasaypanami aywapakaykä.

⁵ 5 (6) Ayakuna jitaräyashqancho jitaraykaqnömi kaykä. Guërracho wanusish runa pamparaykaqnömi kaykä. Kachariykushqayki runanönami kaykä. Chipyaq qonqaykushqayki runanönami kaykä.

⁶ 6 (7) Mansariypaq pasapa shiminman qaykamaqnömi fiyupa sakayman qarpariykamashkanki.

⁷ 7 (8) Fiyupa rabyar castigamaptikimi lamarpa ölancho talpukashno kaykä. Selah

⁸ 8 (9) Lapan amïgükunata nawpäpita qarquriykuptiki japalänami rikakushkä. Paykuna rikamaytapis manami munayannasu. Carcilcho wataraykaqnömi maypa qeshpiytapis kamäpaküsu.

⁹ 9 (10) Waqaykälarmi qaprayarküna. Waran waranmi ruwakamü, Tayta Dios. Makïta joqarkurmi qamta ruwakamü.

¹⁰ 10 (11) Milagrukunata ruraptikipis ¿wanushkunaqa rikayanqasuraq? Pamparaykäyashqanpita agradëcikuyäshunaykipaq ¿sharkamunqasuraq? Selah

¹¹ 11 (12) Kuyakuq kashqaykita ¿sepultüracho parlayanqasuraq? Ali kashqaykita ¿ayakuna wilanakuyanqasuraq?

¹² 12 (13) Wanukurqa lapantapis qonqaykuyanqami. Alikunata rurashqaykita y espantaypaq rurashqaykitapis ¿pilaqa yarpanqasuraq?

¹³ 13 (14) Noqami isanqa yanapämänaykipaq qamlata manakamü, Tayta Dios. Saka sakalami qamta ruwakamü.

¹⁴ 14 (15) Tayta Dios, ¿imanirtaq qonqaykamanki? ¿Imanirtaq noqapita pakakunki?

¹⁵ 15 (16) Maqta kashqäpita pasami pasaypa nakar awja puntalanpa wanuypita qeshpishkä. Mana awantaypaq castïgukunawanmi nakasimashkanki. Mastaqa mananami awantayta puëdïnasu.

¹⁶ 16 (17) Fiyupa rabyashpayki castigamaptikimi pasaypa mansakash kaykä.

¹⁷ 17 (18) Nakaylami imay hörapis tumapaykäman. Say nakaykunawanmi yakucho shenqaykaqno kaykä.

¹⁸ 18 (19) Amïgükunatapis y ayllükunatapis nawpäpita qarqushkankimi. Kananqa yanawyaykaqchönömi lakish kaykä.