Salmo 4 - Tayta Diospa Wilakuynin

1

Salmo 4 Tayta Diosta sakaypa manakushqan

1 (1) Cantaqkunapa mandaqninpaqmi. Cuerdayuq instrumentuta tukar kay salmuta cantayanki. David qelqashqan salmu.

¹ 1 (2) Sapämaqnï Tayta Dios, manakamushqäta wiyaykalämay. Conträkuna sharkuyaptin qammi favornï sharkushkanki. Kananpis kuyapämar wiyaykalämay.

² 2 (3) Yachaq tukuq runakuna, ¡imayyaqraq manakaqkunata jitapäyämanki! ¡Imayyaqraq lutankunata yarpar lulakuyänalaykipaq yarpachakuykäyanki! Selah

³ 3 (4) Kay nishqäta tantiyakuyay: Tayta Diosqa munashqanno kawaqkunata kuyanmi. Saymi manakuptï yanapäman.

⁴ 4 (5) Rabyakurpis ama jusalikuyaysu. Saypa trukanqa cämaykikunacho shumaq yarpachakuyay. Selah

⁵ 5 (6) Tayta Diospaq sacrificiuta apar payman yärakuyay.

⁶ 6 (7) Aska runakunami niyan: <<¿Piraq yanapämäshun ali kawayta tarinapaq?>> Tayta Dios, imaypis ali rikaykayälämay.

⁷ 7 (8) Saysika trïguta cosechar y aypala üvata shuntar runakuna kushikuyashqanpitapis masraqmi qamqa kushikasimanki.

⁸ 8 (9) Noqaqa jawkalami punuküpis. Lapan mana alikunapitapis sapämaptikimi kushish kawä.