Proverbios 9 - Tayta Diospa Wilakuynin

Fiestaman qayasiq warmiman tantiyakuyta tinkusishqan

¹ Tantiyakuyshi wayinta ali sharkasinaq. Kamaränanpaqshi qanchis jorconkunata laqlaykur jawisinaq.

² Wayi ushaytanashi uywakunata pishtaykur ali alilata yanukasinaq. Saynöshi ali vïnuta ruraykur mikuynintinta mësaman sirvisinaq.

³ Sirviskirnashi ashmayninkunata kachanaq marka janaqanman aywaykur qayakuyänanpaq.

⁴ Qayakurshi niyänaq: <<¡Mana tantiyakuq maqtakuna jipashkuna! ¡Fiestaman shayämuy!>> Mana yarpachakuqkunatapis qayakurshi niyänaq:

⁵ <

⁶ Mana ali ruraykunata kachariyay. Kacharirqa alimi kawayankipaq. Tantiyakuq runano shumaq kawayay>>.

Tantiyakuq y mana tantiyakuq runa imano kashqanpis

⁷ Shimisapa runaqa corrigiptikipis ashlishunkimi. Lutanta ruraykashqanta niptikipis olqutupäshunkimi.

⁸ Awilan ashmash runaqa anyapaptiki chikishunkimi. Tantiyakuq runami isanqa anyapaptikipis kuyashunki.

⁹ Tantiyakuq runaqa tantiyasiptiki masmi tantiyakunqa. Ali runaqa yachasiptiki masmi yachakunqa.

¹⁰ Tantiyakuq kaytaqa qalaykunki Tayta Diosta mansapakurmi. Santu Tayta Diosta reqiqkunaqa yachaqmi kaykan.

¹¹ Yachaq karqa aska watami kawankipaq.

¹² Tantiyakuq karqa mas tantiyakuqmi rikakunkipaq. Awilan ashmash karqa mana ali rikashqami kankipaq.

Mana tantiyakuq kayta juiciuynaq warmiman tinkusishqan

¹³ Mana tantiyakuq kayqa tulu shimi, juiciuynaq y toqshun sakish warminömi kaykan.

¹⁴ Wayi punkunman karpis o marka janaqanman karpis jamakun

¹⁵ saypa päsaq ali kawaqkunata inkitar ninanpaq:

¹⁶ <<¡Mana tantiyakuq maqtakuna y jipashkuna! ¡Kayman shayämuy!>> Saynölami mana yarpachakuqkunatapis qayar nin:

¹⁷ <>.

¹⁸ Sayno nishqanta cäsupaqkunaqa manami musyayansu wanuyänanpaq kashqanta.