Proverbios 6 - Tayta Diospa Wilakuynin

Pipa garantianpis mana yaykunanpaq yäsishqan

¹ Hïju, reqinakushqaykitapis o jäpa runatapis garantizash karqa

² kikilaykimi trampaman jeqakuykuqno kaykanki.

³ Garantizashqaykipita salvakunaykipaq penqayta jitaykurmi amïguykita ninki garantian manana kanaykipaq.

⁴ Tiempu päsananta ama shuyaraysu, sinöqa jukla pägananpaq ninki.

⁵ Runapita luychu qeshpishqanno y trampapita pishqu salvakushqanno garantizashqaykipita salvakunki.

Qela runata yäsishqan

⁶ Qela runa, pitishkuna mana qelanaypa arushqanta rikakuy. Imano aruyashqantapis rikakur yachakuy.

⁷ Pitishpaqa manami mandaqnin ni patronnin ni capatazninpis kansu.

⁸ Sayno kaykarpis usya killacho cosëcha kashqanyaqmi mikuyninta shuntakuyan.

⁹ Qela runa, ¿imay hörayaqraq punuräkunki? ¿Imay hörayaqraq jitaräkunki?

¹⁰ Junaq intiyaq punukurqa jamaylapaq wanurqa y ruyru maki karqa

¹¹ pasaypa pobrimi rikakunki. Ali armash suwa suwapäshuptiki taqlaykar quëdaqnömi kanki.

Lutan ruraq runakuna imano kayashqanpis

¹² Fiyu runa y lutan ruraq runaqa pïmaytapis lulapälarmi purin.

¹³ Sayno runaqa nawinwanpis, chakinwanpis y dëdunwanpis sëñapaytami yachan.

¹⁴ Lutankunalata yarpachakurmi pïmaytapis rimanakasir y pelyasir purin.

¹⁵ Sayno kashqanpitami paytaqa ima desgraciapis elaqpita päsanqa. Mana yarpashqan hörami pasaypa ushakanqa.

Imakuna Tayta Diosta rabyanäsishqanpis

¹⁶ Tayta Diosta pasaypa rabyanäsishqankunaqa qanchismi kaykan:

¹⁷ runa mayinta manakaqman churashqan, lulakushqan, jusaynaq runakunata wanusishqan,

¹⁸ lutankunata rurayänanpaq yarpachakushqan, jusalikuyman uman churakash kashqan,

¹⁹ rantiy testïgu kashqan y wawqipurata chikinakasishqan.

Jukpa warminwan mana pununanpaq yäsishqan

²⁰ Taytayki yäsishushqaykita imaypis yarparay, hïju. Mamayki yachasishushqaykitapis ama qonqaysu.

²¹ Nishushqaykita shonquykicho imaypis yarparay. Kunkaykimanpis saykunata walqakuy.

²² Saykunami maypa aywaptikipis alita ruranaykipaq yäsiyäshunki. Punuptikipis sapäshunkimi. Rikcharkuptikipis ali yarpaytami qoshunki.

²³ Yäsikuykunaqa sariraykaq mechëruno y yachasikuykunaqa aksinömi kaykan. Tantiyasikuykuna y anyapäkuykunaqa ali kawaymanmi apan.

²⁴ Yäsikuykunata cäsukurqa runanta qanrataq warmipita witikunkipaqmi. Say niraq warmi inkitashuptikipis manami cäsupankipaqsu.

²⁵ Kuyanaylapaq kaptinpis manami rikapankipaqsu. Qemsipäshuptikipis manami cäsupankipaqsu.

²⁶ Prostitüta warmiwan kakurqa pobri kaymanmi chanki. Runanta qanrataq warmiwan kakurmi isanqa wanuyman chanki.

²⁷ Pipis shanshaykaq carbonta oqlakurqa ¿manasuraq mödananta rupakunman?

²⁸ Shanshaykaq carbonta jarurqa ¿manasuraq chakinta rupakunman?

²⁹ Saynölami juk runapa warminwan punuq runapis mana ali kawayman chanqa.

³⁰ Juk ladrón mikanar suwakuptinqa imanir suwakushqantapis runakuna tantiyayanmi.

³¹ Sayno kaykaptinpis suwakuykaqta taripaykurqa qanchis kuti mastami suwakushqanpita pägasiyanqa. Saymi lapan imaykantapis rantikuskir päganqa.

³² Mikanaypita suwakuqta mana kuyaparqa jukpa warminwan punuq runataqa peor manami kuyapäyanqasu. Sayno kaq runaqa mana tantiyakuq karmi wanuyta ashiykan.

³³ Say runataqa ashlirmi maqayanqa. Wanushqanyaqmi pïmaypis payta jamuräyanqa.

³⁴ Warmipa runan musyaykurqa fiyupa rabyakushpan manami perdonanqasu. Tinkushqanchömi mana kuyapaypa maqanqa.

³⁵ Aykata pägaptinpis ni imata qaraykuptinpis manami rabyanaynin päsanqasu.