Proverbios 5 - Tayta Diospa Wilakuynin

Mañösa warmipita witikunanpaq tantiyasishqan

¹ Yäsishqäkunata shumaq chaskikuy, hïju. Tantiyasishqäkunata imaypis yarparay.

² Saynöpami shumaq tantiyakuykur imatapis parlankipaq.

³ Mañösa warmiqa shakya shakyala parlapashpanmi pitapis inkitan.

⁴ Paywan jatikarqa pasaypa desgraciamanmi jitarpukankipaq. Ishkan waqtanpa afilash espädawan tuksishnömi kankipaq.

⁵ Manaraqpis aykätami ushakankipaq. Wanuypis janaykichönami kanqa.

⁶ Say warmiqa ali kawananpaqpis manami yarpachakunsu. Imano kawaykashqantapis manami tantiyakunsu.

⁷ Sayno kaykaptinqa yäsishqäkunata shumaq wiyakamay, hïju. Tantiyasishqäkunata mana qonqaypa yarparay.

⁸ Mañösa warmipita witikuy. Wayi punkulanmanpis ama aywaysu.

⁹ Mañösa warmiwan kakuptikiqa lapan tarishqaykipis jukpaqmi kanqa. Fiyu runakunapa makinchömi wanushqaykiyaq nakanki.

¹⁰ Nakar arushqaykiwanmi mana reqishqayki runa rïcuyanqa. Arupakur tarishqaykipis jäpalapaqmi kanqa.

¹¹ Saymi waray warantin awkinyashpayki lakikur waqankipaq.

¹² Sayno nakarmi kayno ninkipaq: <<¿Imanirraq corrigimashqanta cäsukurqäsu? ¿Wanushsuraq karqä yäsimashqanta mana chaskikunäpaq?

¹³ Yäsiyämaptinpis manami wiyakurqäsu. Anyapäyämaptinpis manami cäsukurqäsu.

¹⁴ Pïmaypis rikaykäyämanmi desgraciacho kaykashqäta. Ichiklapami kaqlantapis oqraykushkäsu>>.

¹⁵ Warmilaykiwan contentakunki. Payqa chuya pukyuykinömi kaykan. Say pukyulaykipita upukunki.

¹⁶ Cällikunapa y pläzakunapa aywaq yakuta mana upushqaykino juk warmiwan ama kakuysu.

¹⁷ Saypa trukanqa warmilaykiwan kakuy.

¹⁸ Tayta Dios kamaripäshushqayki warmiqa bendicionmi qampaq kaykan. Sayno kaykaptinqa maqta kashqaykipita pasa tashqayki warmilaykiwan contentakuy.

¹⁹ Payqa kuyaylapaq luychunömi kaykan. Kuyashushqaykiwan waylushushqaykiwan imaypis contentakuy.

²⁰ Warmiyuq kaykarqa ¿imanirtaq juk warmiwan jatikankiman, hïju? ¿Imanirtaq mana warmiki kaykar makalaräshunkiman?

²¹ Tayta Diosqa imano kawashqansitapis musyaykanmi. Payqa imata rurashqansitapis rikaykanmi.

²² Jusalikuqkunaqa kikinpa jusanpitami nakayan. Jusalikuyashqanpitami läzuwan liyashno kayan.

²³ Mana wiyakuq kayashqanpitami wanuyanqapis. Mana tantiyakuq kayashqanpitami ushakäyanqapis.