Proverbios 4 - Tayta Diospa Wilakuynin

Alita rurar kawananpaq yäsishqan

¹ Wamrakuna, taytayki yäsiyäshushqaykita shumaq chaskikuyay. Sayno chaskikurqa tantiyakuq runami kayanki.

² Alita rurayänaykipaqmi qamkunata yachasï. Yachasishqäta imaypis ama qonqäyaysu.

³ Noqapis taytäpa makinchömi winashkä. Mamäpis kuyamarmi ashmamash.

⁴ Kuyamarmi papänï nimarqan: <

⁵ Tantiyakuq kayta imanöpapis ashiy. Yachasishqäkunata imaypis ama qonqaysu.

⁶ Tantiyakuytaqa kuyanki. Imaypis ama kacharinkisu. Saynöpami lutan ruraykunaman jatikankisu.

⁷ Tantiyakuq kanaykipaqqa imatapis kachaykur yachakuy.

⁸ Tantiyakuq kaptikiqa pïmaypis valurashushpayki respitayäshunkipaqmi.

⁹ Tantiyakuq karqa kuyaylapaq coronashnömi kankipaq>>.

¹⁰ Yäsishqäkunata chaskikuy, hïju. Chaskikurqa aska watami kawankipaq.

¹¹ Noqa yachasï shumaq tantiyakuykur kawanaykipaqmi. Ali nänipa purinaykipaqmi yachaykäsï.

¹² Ali nänipa purirqa manami mana aliman chankisu. Cörrirpis manami ishkinkisu.

¹³ Yachasishqäkunata mana qonqaypa ruray. Saykunata cäsukurqa ali kawaytami tarinkipaq.

¹⁴ Yaqa runakuna kawayashqannöqa ama kawaysu. Paykuna jusalikuyaptinpis qamqa jusalikuysu.

¹⁵ Mala mäñanta ama qatiraysu.

¹⁶ Say runakuna mana jusalikurqa jamaytapis manami tariyansu. Pitapis mana jusalikasirqa punuytapis manami tariyansu.

¹⁷ Mikanaypanöraq y yakunaypanöraqmi jusalikuyta munayan. Paykunaqa imanöpapis runa mayinta atacaytami munayan.

¹⁸ Alita ruraq runakuna kawayashqanqa pasa waraptin asikyashqannömi kaykan. Pasa waraylanta mas asikyashqannömi say runakunapis waranlanta waranlanta kuyaypaq munaypaq kawayan.

¹⁹ Runakuna jusalikur kawayashqanqa yanawyaykaq sakaynömi kaykan. Sayno karmi jusalikuyashqantapis tantiyayansu.

²⁰ Tantiyasishqäkunata chaskikuy, hïju. Nishqäkunata imaypis yarparay.

²¹ Yäsishqäkunata imaypis ama qonqaysu. Nishqäkunata umakuy.

²² Nishqäkunata yachakuqkunaqa ali kawaytami tariyanqa. Qeshyayänanpa trukanqa sänumi kawayanqa.

²³ Shonquyki alita yarpaptinqa alimi kawanki. Sayno kaykaptinqa lutanta mana yarpänaykipaq shonquykita shumaq cuidakuy.

²⁴ Runa mayikita ama tumpaysu. Imaypis ama lulakuysu.

²⁵ Jusalikuyman mana ishkinaykipaq shumaq cuidakuy.

²⁶ Imano kawaykashqaykitapis shumaq tantiyakuy. Nänipita mana yaqaypa aywaqno imaypis alilata ruray.

²⁷ Lutan ruraykunataqa ama ruraysu. Jusalikuypitaqa witikuy.