Proverbios 31 - Tayta Diospa Wilakuynin

Mandaq Lemuelta maman yäsishqan

¹ Rey Lemueltami maman yäsir nirqan:

² Wawä kaptikimi seqaypa kuyä, hïju. Tayta Diospa bendicionninwanmi qamta tarishkä. Saymi kanan yäsishayki.

³ Warmikunaman umayki churakash ama puriysu. Sayno puriyashqanchömi reykunapis lutan ruraykunaman churakäyan.

⁴ Saynöpis manami alisu kaykan reykuna y autoridäkuna upyaman churakäyashqan.

⁵ Shinkakurkurqa Tayta Diospa leyninkunata qonqaykur pobrikunapa contran imatapis ruraykuyanmanmi.

⁶ Vïnutapis ni ima shinkäsikuqtapis ama upyaysu. Saykuna kakusun lakish y jaqayash kaqkunapaq.

⁷ Pobri kayninta y laquësankunata qonqäyänanpaq saykunata upukuyäsun.

⁸ Pïninpis mana kaqkunapa favornin sharkuy. Pobrikunata pipis ultrajananta ama kachapaysu.

⁹ Pobrikunapa y humildikunapa favornin sharkur ali arreglay.

Arukuq warmita halagashqan

¹⁰ Arukuq warmitaqa ¿piraq (ras) fácil tarinman? Arukuq warmiqa ima alhäjapitapis masmi välin.

¹¹ Ali warmimanqa runan seqaypami yärakun. Arukuq warmiwan tarqa manami muchunqasu.

¹² Ali warmiqa waran waranmi runanta yanapan.

¹³ Sayno warmiqa milwata y lïnuta ashiykurmi kushish puskakun.

¹⁴ Negociu purisiq büquinömi wayincho nistashqanta maysaypitapis apamun.

¹⁵ Saka sakala sharkurkurmi wamrankunatapis ashmayninkunatapis mikuyta qarapakun.

¹⁶ Shumaq rikapaykurmi chakratapis rantin. Arur shuntashqan qellaywanmi sayman üvata plantasin.

¹⁷ Ashak ashaklami mana qelanaypa arun.

¹⁸ Negociunta rurananpaq shumaqmi yarpachakun. Sakaypapis aksita sarirkasirmi rurayninkunata rurakun.

¹⁹ Kikin puskarkurmi awatapis awakun.

²⁰ Ali shonqu karmi pobrikunata yanapan y muchuycho kaykaqkunatapis milqaparkun.

²¹ Wayincho kaqkunata raktay raktaymi jatipan. Saymi rashta rataptinpis lakikunsu.

²² Kikinmi bayëtatapis awakun. Mödanatapis ali alilatami jatikun.

²³ Runantapis marka mayinkuna respitayanmi. Saymi runanqa nacionnincho mandaqkunawan y mayor runakunawanpis shuntakäyan.

²⁴ Negociantikunata rantikunanpaqmi mödanatapis ruran y wachkutapis awan.

²⁵ Pïmaypitapis respitasikunmi. Waray warantin imano kawananpaqpis shumaq yarpachakuskirmi kamarikun.

²⁶ Manakaqkunataqa manami imaypis parlansu. Shakya shakyalami yachasinpis.

²⁷ Wayicho rurayninkunata mana jamaypami rurakun. Dembaldiqa manami imatapis mikunsu.

²⁸ Wawankunapis y runanpis halagashpanmi niyan:

²⁹ <>.

³⁰ Ali chïna kashqanpis manakaqlapaqmi. Kuyaylapaq kashqanpis ushakaqlami. Tayta Diosta mansapakuq warmimi isanqa alabash kanqa.

³¹ Arukuq kashqanpita payta alabayay. Saynöpis lapan rurashqanpita felicitayay.