Proverbios 3 - Tayta Diospa Wilakuynin

Tantiyakuq kananpaq yäsishqan

¹ Hïju, yachasishqäkunata ama qonqankisu. Mandamientükunata mana qonqaypa yarparanki.

² Yarpararqa aska watami kushish kawankipaq.

³ Imaypis qonqankisu kuyakuq kayta y rasun kaqlata parlayta. Mana qonqänaykipaq kunkaykiman saykunata walqakuy. Imaypis yarparänaykipaq shonquykiman qelqay.

⁴ Saynöpami Tayta Diospis y runakunapis ali rikayäshunkipaq.

⁵ Lapan shonquykiwan Tayta Diosman yärakuy. Yachaq kashqaykimanqa ama atiënikuysu.

⁶ Imata ruranaykipaqpis Tayta Dios munashqanno ruranaykipaq yarpachakuy. Sayno kawaptikiqa pay yanapäshunkimi.

⁷ Ama aläpa yachaq tukuysu. Saypa trukanqa Tayta Diosta mansapakushpayki lutan ruraykunata kachariy.

⁸ Sayno kawar sänu kaptikimi tuluykikunapis ankash kanqa.

⁹ Tayta Diosta adorar imaykipis kashqanpita y chakraykicho punta poquqkunapita ofrendata apay.

¹⁰ Sayno aparqa wayikipis kichkishqanyaqmi mikuynikikunata tawqanki. Üvatapis saysikata shuntaptikimi uylluykikunapita vïnupis liwanqaraq.

¹¹ Tayta Dios corrigishuptiki ama jaqayaysu, hïju. Jaqayänaykipa trukanqa chaskikuy.

¹² Kuyashqan surinta papänin corrigishqannömi Tayta Diospis kuyashqan kaqtaqa corrigin.

¹³ Kushishqami kawanqa tantiyakuq y ali yarpayyuq runaqa.

¹⁴ Tantiyakuq kayqa qellayyuq y qoriyuq kaypitapis mas alimi kaykan.

¹⁵ Kuyaylapaq rumikunapitapis masmi välin. Tantiyakuq kaymanqa imayka munashqaykipis manami tinkunsu.

¹⁶ Tantiyakuyqa aluq kaq makinwanmi aska wata kawayta kamaripäshunki. Isuq kaq makinwannami kapuqyuq kanaykipaq y pïmaypitapis ali rikash kanaykipaq yanapäshunki.

¹⁷ Saynöpami piwanpis mana rimanakuypa kuyaypaq munaypaq kawanki.

¹⁸ Tantiyakuq karqa aska watami kushish kawanki.

¹⁹ Tayta Diosmi tantiyakuq kayninwan kay pasatapis jana pasatapis kamarqan.

²⁰ Yachayninwanmi qochakuna y mayukuna kananpaq yakutapis pashtasimurqan. Saynölami tamyamunanpaq pukutaytapis kamarqan.

²¹ Tantiyakuq kayta imaypis ama qonqaysu, hïju. Shumaq yarpachakurir imatapis ruranki.

²² Tantiyakuq kaynikiwanmi ali kawanki. Runakunapis respitayäshushpayki ali kashqaykitami parlayanqa.

²³ Tantiyakuq karqa mana mansariypami ali kawanki. Jusalikuymanpis manami jatikankipaqsu.

²⁴ Saynöpis mana mansariypami ali pununkipaq.

²⁵ Fiyu runakunata elaqpita desgracia päsaptinpis qamtaqa manami päsashunkipaqsu.

²⁶ Sayno kawanaykipaqqa Tayta Diosmi imaypis yanapäshunkipaq. Paymi ima nakaypitapis sapäshunkipaq.

²⁷ Yanapayta kamäpakuykarqa pishipakuqtaqa jukla yanapanki.

²⁸ Kaykaptinqa runa mayikita ama <> ninkisu.

²⁹ Yärakuykäshuptikiqa runa mayikipa contran sharkunaykipaq yarpaylapis yarpaysu.

³⁰ Achäquita mana ashipaykäshuptikiqa piwanpis ama rimanakuysu.

³¹ Fiyu runakuna rïcuyäyaptin ama envidiakuysu. Mana alita rurayaptinpis ama ruraysu.

³² Fiyu runakunataqa Tayta Dios rikaytapis manami munansu. Ali ruraq runakunatami isanqa kuyan.

³³ Lutan ruraq runakunataqa aylluntintami Tayta Dios maldicionan. Ali ruraq runakunatami isanqa aylluntinta bendicionninta kamaripan.

³⁴ Runa mayinta manakaqman churaqkunataqa kikintami Tayta Dios manakaqman churan. Humildi kaqkunatami isanqa kuyapar yanapan.

³⁵ Tantiyakuq runakunataqa pïmaypis respitayanmi. Mana tantiyakuq runakunatami isanqa pipis respitansu.